Read Santali 1 Korinthiko 1 Bible Online

1 Korinthiko 1 - Santali bible

1 Korinthiko 1

¹Isorakʼ monejoṅ ar uni hohote iń Pạul do Mạsi Jisuren mitʼṭen celań hoeakana. Iń ar boeha Sosthenes do Korinthi nagraha reakʼ Isorakʼ manḍerren hoṛko ṭhen, metakʼme ape ṭhen liń oletʼkana. Mạsi Jisu sãote jopoṛao hotete Isor do acʼakʼ monsubạ leka apeye bachao doho akatʼpea ar acʼren hoṛko hoyokʼ lạgitʼe hohoakatʼpea. Ape ṭhen ar eṭakʼ sanam jaegare okoe do aboren Probhu Jisu Mạsi Probhu menteko aṅgocede onko ṭhen ạliń do noa ciṭhi liń oleda. Uni do aboren ar onkoren hõ Probhu kanae.

³Aboren Isor Baba ar Probhu Jisu Mạsiakʼ daya ar suluk do apeko tulucʼ baṛe tahenma.

⁴Iń do siń sạṭupʼ ape lạgitʼ ińren Isoriń gunmanao joharae kana, ente Mạsi Jisu tulucʼpe mitʼ akante ape do Isorakʼ dayape ńam akada.

⁵Ona daya do noage, ape do Mạsi tulucʼpe mitʼ akante joto secʼ khon metakʼme, sanamakʼ roṛ reakʼ daṛete ar akeltepe kisạ̃ṛ akana,

⁶ente Mạsi reaṅ aleakʼ goha do apeakʼ ontorre gathao akana.

⁷Onate aboren Probhu Jisu Mạsiakʼ sodorokʼ reakʼpe ńel hohorkanre okaṭakʼ dante hõ bape khaṭo ocokʼkana.

⁸Aboren Probhu Jisu Mạsige mucạtʼ hạbicʼe ṭarhao ocopea, onate uniakʼ hijukʼ dinre ape do sanam lekan bin dusạnkope hoyokʼa.

⁹Isor doe pạtiạrgea, ar unige ape doe hohoakatʼpea jemon uniren Hopon aboren Probhu Jisu Mạsi ar ape talare helmel tahen.

¹⁰E boehako, aboren Probhu Jisu Mạsi ńutumteń nehõrape kana, sanamkoge mitʼakan tahenpe, ape talare jãhãn dola duli alo tahen ma, bickom ape do mitʼmon ar mitʼakan tahenpe.

¹¹E ińren boehako, iń do Kloe gharońjrenko hotete ape reaṅ iń baḍaekeda je, apeko talare reṭha reṭhi menakʼa mente.

¹²Iń do noań meneda, apeko modren adomkoko meneda, “Iń doń Pạulren kana” ar adomko doko meneda, “Apollosren kạnạń” ar adomko doko meneda, “Kephasren kạnạń” ar adomko doko meneda, “Iń doń Mạsiren kana.”

¹³Menkhan Mạsi do cetʼe hạṭiń akana? Ar Pạul do cetʼ ape lạgitʼe krus ocolena? Ape do cetʼ Pạul ńutumtepe bạptis ocoakana?

¹⁴Isoriń gunmanao joharae kana, iń do apeko modre Krispus ar Gaius chaḍa ar okoe hõ bạń bạptis akatʼkoa,

¹⁵jemon okoe hõ aloko lại daṛeakʼ, ape do iń ńutumtepe bạptis akana mente.

¹⁶Stephan gharońjren hõń bạptis akatʼkogea, menkhan ar jãhãe iń bạptis akatʼko reakʼ do bạń disạyeda.

¹⁷Mạsi do bạptisko lạgitʼ bae kolakadińa menkhan bhage sombat porcar lạgitʼgeye kolakadińạ. Ona bhage sombat do akel reakʼ kathate porcar do bae kol akadińạ, jemon Jisu Mạsiakʼ krus alo ạuṛiagokʼtae.

¹⁸Okoe nosṭokʼ reakʼ horteko taṛametʼ onko ṭhen Mạsiakʼ gujukʼ reakʼ katha do lelhawakʼ chaḍa ar cetʼge baṅkana; menkhan okoe bańcao bon ńam lạgidokʼkan abo ṭhen ona do Isorakʼ daṛe kana;

¹⁹Ente sostorre olakana, “Iń do akelankoakʼ akeliń maraotakoa, ar budankoakʼ bud iń ạuṛiagtakoa.”

²⁰Menkhan akelanicʼ do ukuricʼ? Bidiạwạnicʼ hõ ukuricʼ? Noa piṛhiren esetʼicʼ hõ ukuricʼ? Noa dhạrti reakʼ akel je, lelhawakʼkan ona do cetʼ Isor bae udukʼ abon kana?

²¹Isor do acʼakʼ akele ṭarhao akatʼte dhạrtirenko do akoakʼ akelte Isor bako orom daṛeadea. Onate Isor do bhage sombat reakʼ lelhatetʼ iạte biswạsiko kại khon bańcaokoe kusiyena.

²²Jihudiko do cinhạ lekate hahaṛa kạmi ńeńelko khojkana ar Junạniko do akelko ńam baṛayetʼ kana;

²³menkhan ale do kruslen Mạsiakʼ kathale porcareda. Ona katha Jihudiko ṭhen do mitʼṭen tạkicʼakʼ kana ar boṅgan hoṛ jạtrenko ṭhen do lelhawakʼge,

²⁴menkhan baṅ do Jihudige ar baṅ do Junạnige, Isor okoeye hoho akatʼko onko ṭhen do uni Mạsi kangeae Isorakʼ daṛe ar akeltetʼ.

²⁵Isorakʼ lelhatetʼ do manwakoakʼ akel khon hõ bạ̃ṛti akelanakʼ kana, ar Isorakʼ nijortetʼ do manwakoakʼ daṛe khon hõ bạ̃ṛti jorana.

²⁶E boehako, apepe hoho ocolenre cetʼ lekan hoṛpe tahẽkana ona disạipe. Manwa jạt lekate akelanko do ḍher bape hoho ocoakana, daṛeanko hõ baṅ ar bhodroko hõ ḍher do baṅ;

²⁷menkhan dhạrti do okaṭakʼ lelhawakʼe metakʼkan, onage Isor doe bachaoana, jemon akelankoe lajao ocoko. Ar dhạrti okaṭakʼ nijorakʼe metakʼkan, onage Isor doe bachaoana jemon daṛeankoe lajao ocoko;

²⁸dhạrti do okaṭakʼ nicạṛ, nihạtakʼ ar bạnukʼakʼe metakʼkan, onage Isor doe bachaoana, jemon dhạrtire menakʼakʼ koe ạuṛiakʼ ocoe;

²⁹uni do onakogeye bachaoana jemon Isor samaṅre okoe manwa hõ aloe sarhaokʼ.

³⁰Jisu Mạsi tulucʼpe mitʼakan ona do Isor khonge hoeakana. Jisu Mạsige abo lạgitʼ Isor ṭhen khone emakan akel do; unige aboren dhoromicʼ, sonoticʼ ar chaḍaoicʼ.

³¹Onatege sonot sostorre ol akana, “Sarhaokʼ kanicʼ do Probhureye sarhaokʼma.”