Read Santali 1 Korinthiko 12 Bible Online

1 Korinthiko 12 - Santali bible

1 Korinthiko 12

¹E boehako, sonot Jiuteakʼ dan reaṅ bin baḍaepe tahen do baṅ sanań kana.

²Baḍaegeape, Isor bape sewawaekan tahẽkanre ape do nonkan muṭhạnko secʼpe ạyur ocokʼkan tahẽkana one okoe doko guṅgạge.

³Ińiń baḍae ocoyetʼpea, Isorren Jiute roroṛkanko do okoe hõ bako mena, “Jisu do sarapicʼ kanae mente.” Ar sonot Jiu begor, “Jisuge Probhu” kanae mente okoe hõ bako men daṛeakʼa.

⁴Ini mitʼ sonot Jiuakʼ daya danko do judạ judạgea;

⁵ar judạ judạ dharate abo do ini mitʼ Probhuge bon sewawae kana.

⁶Abo mimitʼko do judạ judạ kạmi bon emocoakana, menkhan ini Isorge judạ judạ dharate mimitʼko talareye kạmikana.

⁷Sanamkoakʼ bhạlại lạgitʼge sonot Jiu do mimitʼ hoṛre mimitʼ lekae sodorokʼ kana.

⁸Adom adom hoṛ do uni sonot Jiu hotete akel reakʼ kathako roṛeda.

⁹Ar eṭakʼko do ini Jiu hotete pạtiạu se ruạ boge reakʼ daṛe se hahaṛa kạmi reakʼ daṛe se nạbi leka Isorakʼ katha roroṛ reakʼ daṛe se boge ar bạṛicʼ jiuko oromko reakʼ daṛe;

¹⁰ar adomko do judạ judạ pạrsite roṛ reakʼ daṛe se judạ judạ pạrsite torjoma reakʼ daṛe ini mitʼ Jiugeye kạmi ocoyeda.

¹¹Noako joto kạmi do ini sonot Jiugeye kạmiyeda. Uni do cetʼleka sanayede kan onkage onako dan mimitʼko judạ judạye emako kana.

¹²Mitʼṭen hoṛmore cetʼleka aema hạṭińko tahen ar ona hạṭińko ḍhergere hõ cetʼleka mitʼṭen hoṛmoge hoyokʼ, Mạsi hõ ṭhik onkage.

¹³Abon do baṅ dobon Jihudikan, baṅ dobon boṅgan hoṛ jạtrenkokan, baṅ dobon golamko kan, baṅ dobon sạdhinko kan, jotoge ini mitʼ sonot Jiu hotete bon bạptis akana; ar jotokoge ini sonot Jiuge bon ńam akadea.

¹⁴Hoṛmo do eken mitʼṭen hạṭińte do baṅ benao akana, ona do aema hạṭińtege tearakana.

¹⁵Jaṅgae menkhan, “Ti doń baṅkana, onate hoṛmo reakʼ hạṭiń hõń baṅkana,” Enḍekhan hoṛmo reakʼ hạṭiń baṅkana ona do baṅa.

¹⁶Luture menkhan, “Mẽtʼ doń baṅkana, onate hoṛmo reakʼ hạṭiń hõń baṅkana,” Enḍekhan hoṛmo reakʼ hạṭiń baṅkana ona do baṅa.

¹⁷Ar goṭa hoṛmoge mẽtʼ hoelen khan, enḍekhan ańjom reakʼ daṛe do okare tahẽkokʼa? Ar goṭa hoṛmoge lutur hoelen khan, enḍekhan ji reakʼ daṛe do okare tahẽkokʼa?

¹⁸Isor do cetʼlekae monejoṅkan onkage hoṛmo reakʼ hạṭińko hoṛmoreye bạisạu akada.

¹⁹Ar joto hạṭińko mitʼ lekage hoelen khan, enḍekhan hoṛmo do okare tahẽkokʼa?

²⁰Hạṭińko aemagere hõ, menkhan hoṛmo do mitʼṭengea.

²¹Mẽtʼ do ti ohoe men daṛelea, “Amakʼ do jạruṛ bạnukʼtińạ,” Bohokʼ hõ jaṅga ohoe men daṛelekina, “Abenakʼ do jạruṛ bạnukʼtińạ.”

²²Menkhan hoṛmo reakʼ oka hạṭińko nijorge aṭkarokʼkan onage bạ̃ṛti jạruṛa.

²³Hoṛmo reakʼ oka hạṭińko thoṛa manotakʼ bon metakʼkan, ona hạṭińkoge bạ̃ṛti manot bon udukʼeda; ar oka hạṭińko baṅ udugokʼkan onako do ạḍi manot salakʼ bon poṭom esetʼkakʼ kana,

²⁴menkhan oka hạṭińko bahrere udugokʼ, ona do poṭom esetʼ reakʼ jãhãn jạruṛ bạnukʼa; ar hoṛmo reakʼ oka hạṭińko jãhãn manot bạnukʼ, Isor do onakoge bạ̃ṛti manote emakada ar sanam hạṭińkoe mitʼakada,

²⁵jemon hoṛmo do alo bhaga bhạgikʼ, bickom hoṛmo hạṭińko mitʼ lekako dạndikʼ. Mitʼ hạṭiń dukokʼ khan ona sãote goṭa hạṭińge dukokʼa.

²⁶Mitʼ hạṭiń manote ńam khan enḍekhan goṭa hạṭińge ona sãote hulạsokʼa.

²⁷Ape do Mạsiakʼ hoṛmo kanape, ar mimitʼ hoṛ do ona hoṛmoren hạṭińkoge.

²⁸Isor do manḍerre pạhilte apostolko, dosarte nạbiko, tesarte cecetʼkoe dohoketʼkoa. Ona tayom noko hoṛkoe bachaoketʼkoa, one okoe do hahaṛa kạmi reakʼ ektiạriko ńamakatʼ, ar okoe do ruạ boge reakʼ daṛe, ar okoe do goṛowako reakʼ daṛe, ar okoe do calao ganao reakʼ daṛe, okoe do pạrsi torjoma reakʼ daṛe, onko sanamkoge cetʼ apostol kanako?

²⁹Sanamkoge cetʼ nạbi kanako? Jotoge cetʼ cecetʼko kanako? Sanamkoakʼge cetʼ hahaṛa kạmi reakʼ ektiạri menakʼtakoa?

³⁰Sanamkoge cetʼ ruạ bogekʼ reakʼ ektiạri menakʼ takoa? Sanamkoge cetʼ aema lekan pạrsiteko roṛeda? Sanamkoge cetʼ ona reakʼ maneko bujhạuako kana? Khạṭige baṅa.

³¹Bickomiń mena, ape do joto khon jạruṛanakʼ danko ńam baṛae lạgitʼ gagojokʼpe. Iń do apeko artetʼ sorosakʼ mitʼṭecʼ hor iń udukʼape kana: