Read Santali 1 Korinthiko 13 Bible Online

1 Korinthiko 13 - Santali bible

1 Korinthiko 13

¹Manwakoakʼ ar serma goḍetkoakʼ pạrsiteń roṛlere hõ dulạṛ bạnukʼtiń khan, raṛaṅ raṛaṅokʼkan ghonṭa ar chaṅ chaṅokʼkan kortaliń hoeakana.

²Nạbi leka roṛ reakʼ ektiạri tahentiń, ar sanam okoakʼ iń baḍae daṛeakʼ ar joto lekan akel tahentiń, se buruko ucạṛ daṛeakʼ leka purạ biswạs tahentiń, menkhan dulạṛ bạnukʼ tiń khan, cetʼ porho hõ bạnukʼtińạ.

³Jãhãnakʼge menakʼtiń ona joto do reṅgecʼ orecʼko jom ocoko lạgitʼ iń danlere ar atar giḍikʼ lạgitʼ ińakʼ hoṛmo hõń alaelere hõ, dulạṛ bạnukʼtiń khan cetʼ porho hõ bạnukʼtińạ.

⁴Dulạṛ doe soboria, dulạṛ doe susṭoba; dulạṛ do bae hiskạwa,

⁵dulạṛ do bae phulạukʼa, dulạṛ do bae becola, dulạṛ do bae hạr dogokʼa; dulạṛ do bae kaḍraokʼa; dulạṛ do bae adopa; dulạṛ do bạṛicʼ bae hisạba;

⁶dulạṛ do bedhoromakʼte bae rạskạkʼa bickom oka sạriakʼkan onateye rạskạ midokʼa.

⁷Dulạṛ do sanamakʼgeye sahaoa, sanamakʼgeye pạtiạuakʼa; sanamakʼrege ase dohoea; ar sanamakʼgeye sumbhrạua.

⁸Dulạṛ do tisge baṅ mucạdokʼa. Nạbi lekate roṛ reakʼ ektiạri cabakʼa, ar eṭakʼ pạrsite roṛ reakʼ ektiạri menakʼ khan ona do adokʼa; ar baḍaeakʼ menakʼ khan ona hõ mạutạkʼa;

⁹ente abon do jotowakʼ purạute babon baḍaea, ar nạbi lekate purạute hõ babon nạbiyeda.

¹⁰Menkhan purạwakʼ seṭerlen khan bin purạuwakʼ do mạutạkʼa.

¹¹Iń do gidrạń tahẽkanre gidrạ lekań roṛetʼ tahẽkana, gidrạ lekań hudisetʼ tahẽkana ar gidrạ lekageń bicạretʼ tahẽkana; ar ńitokʼ doń sẽṛã akana, onate gidrạ reakʼakʼko doń bạgi akada.

¹²Abo do ńitokʼ ạrsire pusṭạute babo ńeleda, menkhan unre samna sạmni bon ńel ńama. Iń do ńitokʼ okań baḍaekan ona do purạute bạń baḍaea, menkhan Isor do cetʼleka purạteye baḍaeyediń kan, unre onkage purạteń baḍaea.

¹³Menkhan ńitokʼ do biswạs, as, ar dulạṛ, noako penege tahenkana; menkhan noako modre joto khon soros utạrakʼ do dulạṛkangea.