Read Santali 1 Korinthiko 16 Bible Online

1 Korinthiko 16 - Santali bible

1 Korinthiko 16

¹Nitokʼ do Isorren hoṛko goṛowako lạgitʼ canda uṭhạu reaṅ iń metapekana. Galatiạ Paradesh reakʼ manḍerren hoṛko cetʼ lekań hukum akatʼko ape hõ onkaepe baṛe.

²Ape mimitʼko apeakʼ daṛe leka thoṛa thoṛate doho jarwaepe hapta reakʼ pạhil dinre, jemon ińiń hecʼlenre canda uṭhạu alo lagaoape.

³Ar ape ṭheniń hecʼlenre apeakʼ ona dan do Jerusalemte idi lạgitʼ okoe lek mentepe bujhạuko, onko ciṭhiń olakote Jerusalemteń kolkoa.

⁴Ar iń hõ senokʼ reakʼ lekpe bujhạu liń khan enḍekhan onko do iń sãoteko sen daṛeakʼa.

⁵Makedoniạ Prodes talateń sen paromokʼre iń do ape ṭheniń hijukʼa, ente iń do Makedoniạ talategeń parom calakʼa.

⁶Menkhan ape ṭhen do thoṛa diniń tahena, ar rabaṅ din do ape ṭhenge pasecʼ iń khemaoa, jemon jãhã secʼgeń calakʼre unrepe bondobos daṛeạń.

⁷Parom calakʼ horre ape tulucʼ ńapamokʼ do bạń menjoṅ kana; enteń asokʼ kana, Probhui aṛakʼạń khan ape tulucʼ ḍher diniń tahena.

⁸Menkhan pentekosṭ hạbicʼ iń do Ephesusregeń tahena,

⁹ente oka kạmire ḍher jo ńamokʼ onkan kạmi lạgitʼge mitʼṭen maraṅ bhạg reakʼ duạr iń lạgitʼ do jhicʼ akana; menkhan noare ḍher hoṛgeko tạkicʼ daram edeńkana.

¹⁰Ńelpe, Timothiye hecʼlen khan apeko talare jemon bin botorteye tahẽ daṛeakʼ, ente cetʼleka Probhuakʼ iń kạmikan onkage uni hõe kạmikana.

¹¹Onate okoe hõ jemon aloko neṅghaoema. Menkhan sulukte kolgotʼkaepe, jemon uni do iń ṭhene hecʼ daṛeakʼ. Ente uni do boehako sãoteye hijukʼa menteń ńel horekana.

¹²Ar boeha Apolloss reaṅ iń meneda. Iń do ạḍiń nehõrade tahẽkana jemon boehako sãote ape ṭhene calakʼ, menkhan ńitokʼ uni do calakʼ reakʼ mon bạnukʼtaea. Ar tayomteye opsorlen khan uni doe calakʼa.

¹³Ape do jagwar tahenpe, biswạsre keṭecʼte teṅgo akan tahenpe, jhũkokʼpe ar daṛeanko hoyokʼpe.

¹⁴Ar jãhãnakʼgepe cekae ona do dulạṛte onkaepe.

¹⁵E boehako baḍaegeape, Stephan gharońjren hoṛkoge Akhaearen pạhil biswạsi kanako mente, ar Isorren hoṛko sapʼ dapʼako lạgitʼ onko do apnargeko jamaṛ akana.

¹⁶Onate ape hõ nonkan hoṛko ṭhen gobolokʼ lạgitʼ iń nehõrape kana. Ar tinạkʼ do kạmireko gokʼṛokan, arko khaṭaokʼkan onko ṭhen hõ gobolokʼpe.

¹⁷Stephanos ar Phortunatus ar Akhaeakustekoko hecʼ akanteń rạskạkʼ kana; ente apeakʼ khạli jaega do onkogeko purun akada.

¹⁸Onko do ińakʼ ar apeakʼ jiuko khạtirketʼ tabona. Ape do nonkan hoṛge manotkope.

¹⁹Ạsiạ reakʼ manḍerrkoren hoṛko do apeko joharape kana. Akuilạ, ar Priskilạ do Probhure ạḍikin joharapekana, ạkinakʼ oṛakʼre menakʼ manḍerrenko salakʼ.

²⁰Ar joto boehako hõ apeko joharape kana. Ape do sonot cokʼte jopoharpe.

²¹Johartetʼ do iń Pạul nij titeń olape kana.

²²Jãhãe hoṛ Probhu bae dulạṛe khan sarapicʼe hoyokʼma. Maran atha [Probhui darae kana].

²³Probhu Jisu Mạsiakʼ daya ape sanamko tulucʼ baṛe tahenma.

²⁴Ape sanamko tulucʼ Mạsi Jisure ińakʼ dulạṛ tahenma. Amen.