Read Santali 1 Korinthiko 4 Bible Online

1 Korinthiko 4 - Santali bible

1 Korinthiko 4

¹Hoṛ do nonka lekako bujhạule ma je, ale do Mạsiren sapʼdapʼko kanale ar Isorakʼ sạri okoakʼko baḍae ocoko reakʼ bhar do alerege emakana.

²Ar okoere bhar emakan onko do udugokʼ hoyokʼtakoa je, pạtiạranko kanako mente.

³Ińakʼ bicạr do apege bicạrpe baṅ do bạisiren hoṛko hotete hoyokʼ, onate ińakʼ do jãhãnakʼ cetʼge baṅ cekakʼtińạ; metakʼme iń hõ apnarte do bạń bicạrokʼ kana.

⁴Ińakʼ bibek do saphagea, menkhan onate noa do baṅ sạbudokʼ kana je, iń doń dhoromgea. Probhuge ińakʼe bicạrtińạ.

⁵Onate Probhu hijukʼ lahare, metakʼme ona niṭ akan din lahare okaṭakʼ hõ alope bicạra. Ńutre oka okoge menakʼ uni do unre ona marsalteye ạguya ar manwa ontor reakʼ okoakʼ monsubạkoe sodora. Unre mimitʼ hoṛ do Isor ṭhen khon sarhaoko ńama.

⁶E boehako, apeakʼ porho lạgitʼge iń do ińakʼ ar Apollossakʼ kathakoń roṛeda, jemon ạliń ṭhen khonpe cetʼ daṛeakʼ baṅma, oka olakan ona bahre calakʼ do baṅ ṭhika mente. Enḍekhan ape do mitʼ hoṛ bạgikate eṭagicʼ upạrte bape gorbokʼa.

⁷Am do eṭakʼko khonem begargea mente okoe hõ bako monejoṅ kana. Nonkanakʼ cetʼ menakʼtama one okaṭakʼ do dan lekate bam ńamakatʼ? Arem ńam akatʼ khan cedakʼ begor ńamicʼ leka dom sarhaokʼ kana?

⁸Ape ńelte ńelokʼ kana ape do laharege jotowakʼpe ńam akada, ar laharegepe kisạ̃ṛ akana, ar ale begortegepe raj akana. Arpe rajlen khan do bhagege hoekokʼa; enḍekhan ale hõ ape tulucʼle raj daṛekokʼa.

⁹Ińakʼ bujre Isor do ale apostolko ses utạrko menkateye udukʼ akatʼlea, gocʼ ocokʼ lạgitʼ ṭarhao akanko lekage. Ale do goṭa dhạrtirenko ṭhen, metakʼme sermaren goḍetko ar manwako ṭhen tamasa lekale hoeakana.

¹⁰Ale do Mạsi iạte lelhale hoeakana, menkhan ape do Mạsirepe mitʼakante budankope hoeakana. Ale do nijorkoge menkhan ape do joranko. Ape do sabasiankope hoeakana ar ale do bemanotkoge.

¹¹Ale do ńitokʼ hõ reṅgecʼ ar tetaṅtele loraokʼ kana. Ale do reṅgecʼ arle laṅgaṭgea, kilạu ocokʼ kanale ar aleakʼ oṛakʼ duạr do bạnukʼtalea;

¹²ale do nij titele kạmiyeda arle khaṭaokʼ kana; ar hoṛkoko ruhetʼetʼlere hõ onko dole bhorako kana, arle khed ocokʼkanre hõ ale dole sahaoetʼ kana;

¹³arko bodnametʼlere hõ mạ̃hir seletʼle roṛ ruạṛako kana; ar ńit hạbicʼ hõ dhạrti reakʼ mạilạ ar sanamko reakʼ jobra lekagele hoeakana.

¹⁴Lajao ocope lạgitʼ do bạń oletʼ kana, bickom ińren dulạṛiạ gidrạko leka sontorpe lạgitʼgeń oleda.

¹⁵Mạsi reaṅ cetʼape lạgitʼ aperen do gel hajar gurukoko tahẽ daṛeakʼa; menkhan aema baba do bạnukʼkotapea; ińge bhage sombat hotete Mạsiakʼ jionre aperen Babań hoeakana.

¹⁶Onateń nehõrape kana, iń okakoń cekae, ape hõ onako onkaepe;

¹⁷onate ape ṭhen Timothiń kolkedea; uni do Probhure ińren dulạṛiạ ar pạtiạr gidrạ kanae. Uni do Jisu Mạsire ińakʼ cạl-colonkoe disạ ocopea. Iń do nonkage sanam jaega ar mimitʼ manḍerkore onako reaṅiń cetʼako kana.

¹⁸Ape ṭhen bạń calakʼkante adom adomko do demagteko phulạu akana.

¹⁹Menkhan Probhuakʼ sana hoelen khan ạḍi usạrage ape ṭheniń hijukʼa, ar onko phulạu akankoakʼ katha do baṅ, menkhan onkoakʼ daṛe hõ ńel lạgitʼgeń hijukʼa.

²⁰Ente Isorakʼ raj do katha reakʼ do baṅkana, bickom daṛeteakʼge. Cetʼpe ńamkana?

²¹Ṭhengawante ape ṭheniń hijukʼa, se dulạṛ ar mạ̃hir monante?