Read Santali 2 Korinthiko 1 Bible Online

2 Korinthiko 1 - Santali bible

2 Korinthiko 1

¹Iń Pạul do Isorakʼ monejoṅ lekage Mạsi Jisuren mitʼṭen apostoliń hoeakana. Iń do aboren boeha Timothi ar Korinthi nagraha reakʼ Isorakʼ manḍer ar Akhaea Prodesre menakʼko Isorren sanam hoṛko ṭhen noa ciṭhiń oletʼkana.

²Aboren Baba Isor ar aboren Probhu Jisu Mạsi ape sanamko suluk ar bhore dan ape ma.

³Aboren Probhu Jisu Mạsiren Isor ar Babawakʼ sarhao hoyokʼtae ma. Uni kangeae mãyãwan Baba do; ar sanam jiwi raṛecʼren Isor hõ.

⁴Aleakʼ joto duk ar haronre uni do jiwi raṛecʼe emalekana, jemon uni ṭhen khonle ńamakatʼ jiwi raṛecʼakʼ do eṭakʼkoakʼ duk ar santaorele emdaṛeako.

⁵Mạsire cetʼleka ạḍi utạr dukle sahaoetʼkan onkage uni hotete ạḍi utạr jiwi raṛecʼhõle ńameda.

⁶Ale okaṭakʼ dukle jometʼkan ona do apeakʼ jiwi raṛecʼ ar bańcaope lạgitʼgele onkayeda; ar oka jiwiraṛecʼle ńametʼkan ona do ape lạgitʼgele ńametʼ kana. Ale leka tinre ona dukpe joma unre niạ jiwi raṛecʼ do ona duk sahao lạgitʼe goṛowapea.

⁷Apere purạ biswạs menakʼtalea, ente cetʼleka ape do aleakʼ duk sasetren bhạgiạdarpe hoyokʼkan onkage aleakʼ jiwi raṛecʼren bhạgiạdarko hõpe hoyokʼ kana.

⁸Ạsiạ Prodesre ale do oka santaorele paṛaolen, asjoṅ kanale ape hõ ona jemonpe baḍae daṛeakʼ. Onḍe do sahao daṛeakʼ khon hõ bạ̃ṛti caprele paṛaolena, ar bańcaokʼ reakʼ asge baṅ tahẽkantalea.

⁹Alele hudisetʼ tahẽkana, niạ dhao do khạṭigele gujukʼa. Menkhan ona dosa do noa lạgitʼge hoeatʼle tahẽkana jemon apnarre bhorsa baṅkate, okoe gocʼkoe jiwetʼ beretʼetʼko, uni Isorrele bhorsakʼ.

¹⁰Uni do maraṅ gujukʼ khone rukhiyạketʼlea ar ńit hoe rukhiyạlea. Ale do unire noa asle dohoyeda je, uni do jao ghuṛigeye rukhiyạlea.

¹¹Ape hõ koejoṅre goṛowalepe. Enḍekhan ḍher hoṛakʼ koejoṅte oka bhorle ńam ona khạtirte ḍherkoge Isorko sarhaoea.

¹²Ale oka lạgitʼle sarhaokʼkan ona do noage, aleakʼ bibek do noa gohae emeda je, Isor reakʼ sonot ar soṛatetʼ iạte ale do sanam manwako talare, bạ̃ṛtikaete ape talare jionle khemao akada. Ar ona jion do jel reakʼ akelte do baṅ bickom Isorakʼ daya reakʼ ạyurtele khemao akada.

¹³Ape okape paṛhao daṛeakʼ sepe bujhạu daṛeakʼ ona khon bahre eṭakʼ jãhãnakʼ do bale olape kana. Iń do noań asokʼkana, cetʼleka thoṛaganpe bujhạu akatʼle, onkage ape do purạtepe bujhạu daṛeakʼa je, Probhu Jisu hijukʼ dinre cetʼleka aleren sarhaokʼakʼkope hoyokʼ onkage ale hõ aperen sarhaokʼakʼkole hoyokʼa.

¹⁵Ar noa katha sạrikana mente baḍaekate iń do laharege ape ṭhen calakʼ lạgitʼ iń goṭaleda, jemon bar dhao bhorpe ńam daṛeakʼ.

¹⁶Iń doń goṭa akatʼ tahẽkana, Makedoniạte calakʼ jokhecʼ ape sãoteń ńapam torakʼa ar Makedoniạ khon arhõ ape ṭheniń ruạṛ hijukʼa, jemon apege Jihudạte koleń reakʼpe bebostawạń.

¹⁷Cetʼpe hudiseda iń do tamasate noań ṭhik akada? Hoṛko cetʼleka mitʼ ghuṛite “Hẽ” arko “Baṅ” onkage cetʼ jãhãnakʼ iń hõń goṭayeda?

¹⁸Isor doe pạtiạrgea, noa katha cetʼleka sạrige onkage noa hõ sạrigea je, ape ṭhen ale do inạ mitʼ ghuṛire “Hẽ” ar “Baṅ” do bale roṛa.

¹⁹Okoeakʼ katha Siluạnus, Timothi ar iń do ape ṭhenle porcar akatʼ uni Jisu Mạsi, Isorren Hopon do mitʼ ghuṛire “Hẽ” ar “Baṅ” doe baṅkana;

²⁰uni do jao ghuṛigeye “Hẽ” kana. Isorakʼ sanam gokʼakʼko do Mạsi hotete “Hẽ” hoeakana. Onate Isorakʼ ṭhonok lạgitʼ Mạsi hotete abo do “Amen” bon roṛeda.

²¹Okoe do Mạsire ale ar apeye jopoṛaoketʼ bonteye teṅgo keṭecʼketʼ bon uni doe Isor kana. Unige ale doe bahal akatʼlea,

²²metakʼme uni do apnarakʼ dhon leka ale doe mohor chap akatʼlea; ar okaṭakʼe emale ona reakʼ pạhil hạṭiń lekate uni do aleakʼ ontorre sonot Jiue emakatʼlea.

²³Iń do Isorge apnar jiwite goha menteń ńumekana, sạjại khon bańcaope lạgitʼge iń do Korinthite bạń sen ruạṛ akana.

²⁴Mạlik leka apeakʼ biswạsrele tạkicʼ ocoyetʼpea ona do baṅ, bickompe rạskạkʼ onate apeko sãotele kạmikana, ente pạtiạure ape do khạṭikope hoeakana.