Read Santali 2 Korinthiko 10 Bible Online

2 Korinthiko 10 - Santali bible

2 Korinthiko 10

¹Mạsiakʼ mạ̃hir ar daya reakʼ katha disại tulucʼ iń Pạul do apeń nehõrape kana. Hoṛko mena, ape ṭhen tinreń tahen unre doń nindhạnokʼ kana, menkhan tinre bạń tahen unre do dilanicʼ iń hoyokʼ kana.

²Jel lekatele coloneda mente okoeko hudisetʼkan, onko birudre tinạkʼ dil udukʼ jạruṛ, ińiń hecʼlenre unạkʼ dil jemon udukʼ baṅ lagaoạń.

³Abo do jel ar mãyãmren hoṛ kanrehõ bon okaṭakʼ lạṛhại bon lạṛhạikan ona do jel ar mãyãm reakʼ do baṅkana.

⁴Jel ar mãyãm reakʼ gobolte manwa do okako khanḍa bhanḍawanteko lạṛhạikan onate ale do bale lạṛhại kana, menkhan Isorakʼ daṛete aleakʼ khanḍa bhanḍa ar kajak gaṛko hõ dhaṅ dhaserokʼa.

⁵Ale do manwawakʼ eṛeakʼle nosṭoyeda ar Isor baḍaeye horre tạkicʼakʼ leka oka hudis bundisko usulokʼe menjoṅ onale dhaṅ dhasereda; ar mon reakʼ mimitʼ hudis bundisko Mạsi ṭhenle gobol ocoyeda.

⁶Ape do tinre purạtepe gobolokʼa unre okoe bin gobolreko tahen onko sạjạiko lạgitʼle sapṛao tearokʼa.

⁷Ape do bahre reakʼ muṭhạngepe ńeleda. Ar jãhãege apnar do Mạsiren kanae menteye pạtiạukʼ khan, enḍekhan noa hõe hudisma, uni cetʼlekae Mạsirenkan onakage ale hõ Mạsiren kanale.

⁸Probhu okaṭakʼ ạidạriye emakatʼle ona ạidạri reakʼ monsubạ do hoyokʼ kana apeko benao rakapʼpe, menkhan lokshanpe lạgitʼ do baṅ. Ente noa ạidạri iạte thoṛań sarhaokʼre hõ ona lạgitʼ do bạń lajaokʼ ocokʼa.

⁹Ińakʼ noa katha iạte alope hudisa, ciṭhiteń botor ocoyetʼpea.

¹⁰Adom adom hoṛko meneda, “Uniakʼ ciṭhiko do monre gaḍaokʼ leka keṭecʼ ar jor anakʼ kana,, menkhan sorreye tahẽlen khan doe nijorgea ar uniakʼ roṛ do cetat reakʼ hõ baṅkana.”

¹¹Ar onkan hoṛ doe bujhạuma, hạjir bạnukʼlere hõ aleakʼ ciṭhite oka kathale roṛetʼkan, onkage hạjirlenre hõle roṛa.

¹²Ape modren adomko do apnarko sarhaokʼ kana. Onko dolre apnar lekha midokʼ se onko tulucʼ jurikʼ do bale dileda. Onko doko bebujgea, ente apnarte oka bhageko hudisetʼ ona tulucʼgeko jurikʼ kana arko bicạrokʼ kana.

¹³Menkhan tinạkʼ sarhaokʼ lek kan ona bahre ale do bale sarhaokʼ kana, bickom Isor aleakʼ kạmi lạgitʼ okaṭakʼ simại ṭhik dohoakatʼ ona khongele sarhaokʼ kana; ar ape hõ ona simạ bhitrirege menakʼpea.

¹⁴Onate apeakʼ katha iạtele sarhaokʼre simạ bahre cetʼ hõ bale roṛeda. Ar ape ṭhen bale senlen khan aleakʼ nonkan sarhaoakʼ do simạ bahre hoekokʼtalea. Menkhan ale do Mạsi reaṅ bhage sombat porcar porcarte ape ṭhen hõle senlena.

¹⁵Ona chaḍa eṭakʼkoakʼ kạmi iạtehõ ale do bale sarhaokʼ kana, arle onka lekhan enḍekhan ona do simạ bahre hoekokʼtalea. Ale do noale asokʼ kana je, apeakʼ biswạs hara idikʼ são sãote ape talare arhõ bạ̃ṛtile kạmi daṛeakʼa.

¹⁶Onate ape ṭhen khon senkate sạṅgiń jaegakore arhõ bhage sombatle porcar daṛeakʼa. Onate okoe hõ bako men daṛeakʼa, ale do eṭakʼ hoṛko kạmi akatʼ ṭhenakʼ iạtele sarhaokʼ kana.

¹⁷Menkhan sostor reakʼ katha leka, “Sarhaokʼicʼ do Probhure baṛeye sarhaokʼma;”

¹⁸ente apnarte sarhaokʼicʼ do okoe hõ bhage mente bae sạbudokʼa, bickom Probhu okoeye sarhaoe unige bhage menteye sạbudokʼa.