Read Santali 2 Korinthiko 2 Bible Online

2 Korinthiko 2 - Santali bible

2 Korinthiko 2

¹Onate iń do mon monteń goṭawana, arhõ duk ocope lạgitʼ ape ṭhen do bạń calakʼa,

²ente apegeń duk ocolepe khan enḍekhan iń do okoeye rạskạ ocoyińạ? Ar okoekoń duk ocoko onko metakʼme ape chaḍa iń rạskạ ocoyiń leka do ar okoe menakʼkoa.

³Ińiń calakʼre okoeko ṭhen rạskạ ńamokʼ reakʼ katha onko ṭhen khon jemon duk aloń ńam, onate noako kathań olleda. Apere noa pạtiạu menakʼtińa je, iń okaṭakʼte rạskạń ńam ape hõ onatege rạskạpe ńama.

⁴Ạḍi duk ar mon reakʼ kosṭote mẽtʼ dakʼ joro joroteń olatʼpe tahẽkana. Ape duk ocope lạgitʼ do bạń oleda, bickom apere tinạkʼ khạndri dulạṛ menakʼtiń ona baḍae ocope lạgitʼgeń olletʼ tahẽkana.

⁵Jãhãeye duk ocoakadiń khan ajhaṭte do baṅ menkhan noageń mena je, uni do eken iń eskar do bae duk ocoakadińạ, menkhan ape sanamko hõ thoṛagan doe duk ocoakatʼpegea.

⁶Aperen ḍher hoṛko mitʼkate okaṭakʼ sạjạiko emakawade onage uni lạgitʼ do ḍhera.

⁷Menkhan ńitokʼ do ikạkaepe ar jiwi raṛecʼ emaepe, jemon dukte aloe hadosokʼ.

⁸Onate bạ̃ṛtikaeteń nehõrape kana, unipe dulạṛedekan khan ona baṛe sạbudtape.

⁹Iń do ńeńel sanań kana sanamakʼre sạri se nase hukum bataoko kanape mente, ar ona iạtege ape ṭheniń olleda.

¹⁰Ar jãhãnakʼ babotre judi jãhãeakʼgepe ikạitae enḍekhan iń hõ uniakʼ iń ikạitaea. Sạriakʼge iń do jãhãnakʼiń ikạ akatʼ khan enḍekhan Mạsi samaṅre ape lạgitʼgeń onka akada,

¹¹jemon Soetan do abo bulạu bon lạgitʼ jãhãn dão aloe ńam. Ar uniakʼ monsubạ dobon baḍaegea.

¹²Iń do Troas nagrahare Mạsiakʼ bhage sombat porcar lạgitʼ senkateń ńelkeda, Probhu do onḍe kạmi lạgitʼ mitʼṭen ạte emakawạdińa.

¹³Menkhan enrehõ monre suluk bạń ńamletʼa, ente ińren boeha Titus do onḍe bae tahẽkana. Ona iạte iń do Troasren hoṛko ṭhen khon bidạ hataokate Makedoniạteń calaoena.

¹⁴Isoriń sarhaoede kana, Mạsi tulucʼ bon mitʼ akante ar Isor do acʼakʼ jitạuakʼre jaogeye ạyuretʼbon kana. Mạsi baḍaeye do mitʼṭen mahkaokʼ kan so leka. Isor do acʼakʼ jitạuwakʼre ona jut so ale hotete sanam jaegareye mahkao ocoyeda.

¹⁵Bańcaokʼkanko ar nosṭokʼkanko ṭhen ale do Isor secʼ khon sạrige Mạsiren jut so kanale.

¹⁶Menkhan okoeko nosṭokʼkan onko ṭhen aleakʼ so do moron leka; one ona reakʼ jo do jaejug moronkan; ar okoe bańcaoko ńametʼkan onko ṭhen do jion reakʼ jut so leka, one ona reakʼ jo do jaejug jionge. Noa kạmiren lekicʼ doe okoe kana?

¹⁷Apnarakʼ lab lạgitʼ okoe Isorakʼ kathako bạnijetʼkan onko lekanko dole baṅkana; bickom Mạsi tulucʼle mitʼ akante ale do Isor samaṅre Isorren kol ocoakan hoṛko lekage sạri ontor khon kathale roṛeda.