Read Santali 2 Korinthiko 4 Bible Online

2 Korinthiko 4 - Santali bible

2 Korinthiko 4

¹Noa bondobos reakʼ katha baḍae reakʼ bhar Isor do ale dayakateye emakatʼlete bale as chuṭạukʼ kana.

²Ar hoṛko danaṅre oka lajao paṛaoakʼko kạmikan ona do ekaltege bale kạmikana. Ale do okaṭakʼ kạmirege bale eṛeya, ar Isorakʼ kathare jãhãnakʼ ạuṛiakʼ hõ bale mesaletʼ kana. Bickom Isorakʼ sạriakʼtetʼ sodorkate uni samaṅre sanam hoṛkoakʼ bibek ṭhen ataṅokʼ lek mente apnarle sodorokʼ kana.

³Aleakʼ bhage sombat do danaṅ esetʼ akan khan enḍekhan nosṭokʼkanko lạgitʼge danaṅ esetʼ akana.

⁴Bin pạtiạukʼ hoṛkoakʼ mon niạ jugren Deb doe kãṛã akatʼtakoa jemon onko do bhage sombat reakʼ marsal aloko ńelńam. Noa bhage sombatre do Mạsiakʼ ṭhonok bamberokʼ kana, ar nui Mạsi kangeae Isorakʼ muṭhạn reakʼ sodorokʼtetʼ.

⁵Ale apnar reaṅ do bale porcareda, bickom Jisu Mạsi doe Probhu kana mentele porcarede kana ar Jisu lạgitʼge aperen golamle hoeakana.

⁶Ale do noale porcaretʼ kana, ente okoeye menletʼ tahẽkan, “Ńut khon marsal hoyokʼ ma,” Uni Isorge aboakʼ ontorreye bamberena, jemon uniakʼ mạhima bujhạu lạgitʼ marsal sodorokʼ. Ar noa mạhimage Mạsiakʼ mẽtʼãhãre menakʼa.

⁷Menkhan noa dhon do hasa bhajanre dohoakana, ar alege ona hasa reakʼ bhajan do. Hasa reakʼ bhajanre dohoakana jemon hoṛkoko bujhạu daṛeakʼ baṅma, noa asambheṛ daṛe do apnar khonakʼ do baṅ bickom Isor ṭhen khonge hecʼakana.

⁸Ale do sanam secʼ khongele cipạ ocokʼkanre hõ bale mon duk akana; arle andmandao akanre hõ bale as chuṭạu akana;

⁹khed ocokʼkan rehõle Isor do bae bạgi giḍiale kana; arle kaṛgo bindạṛ ocokʼkanre hõ bale marao akana.

¹⁰Ale do siń sạṭupʼ Probhu Jisuakʼ gujukʼtetʼ aleakʼ hoṛmorele asen baṛayeda, jemon Jisuakʼ jion hõ aleakʼ hoṛmore sodorokʼ.

¹¹Ale jiwetʼle tahenkanko do siń sạṭupʼ Jisu khạtirte moron ṭhenle soprot ocokʼkana, jemon Jisuakʼ jion hõ aleakʼ gujukʼ hoṛmore sodorokʼ.

¹²Onate alere do morone kạmikana menkhan apere do jionge.

¹³Sonot sostorre ol menakʼa, “Ińiń pạtiạu akanteń roṛeda.” Ar inạ mitʼlekan biswạs menakʼtalete ale hõle pạtiạukʼkante kathale roṛeda,

¹⁴ente alele baḍaea, Probhu Jisu okoeye jiwetʼkede uni do Jisu sãote ale hõe jiwetʼ beretʼlea ar ape sãote ale hõ acʼ samaṅreye teṅgolea.

¹⁵Sanamakʼ do apeakʼ bhạlại lạgitʼge hoeakana, jemon Isorakʼ oka daya ḍher hoṛkore emakan ona daya iạte ḍher hoṛge arhõ bạ̃ṛti Isorko sarhaoedea ar nonkate Isorakʼ ṭhonok hoyokʼ kana.

¹⁶Onate ale do bale as chuṭạukʼ kana. Ente aleakʼ bahre hoṛmo nasao idikʼkanre hõ bhitri hoṛmo do din dinte nawa idikʼ kantalea.

¹⁷Ale do ńitokʼ mitʼ ghạṛi lạgitʼ okale dukokʼkan ona khạtirte jaejug ṭhonokle hameṭ joṅa. Noa ṭhonok do nunạkʼge ḍhera je, ona do ohoge soṅlena.

¹⁸Oka ńelokʼkan ona secʼ do bale beṅgetʼeda, bickom oka baṅ ńelokʼkan ona secʼgele beṅgetʼeda. Ar oka ńelokʼkan ona do eken thoṛa din lạgitʼkana, menkhan oka baṅ ńelogokʼkan ona do jaejug hạbicʼakʼ kana.