Read Santali 2 Korinthiko 6 Bible Online

2 Korinthiko 6 - Santali bible

2 Korinthiko 6

¹Isorren são kạmiyạko lekate noale nehõrapekana, Isorakʼ okaṭakʼ dayape ńamakatʼ ona do alope ạuṛiakʼ ocoea.

²Isor do sonot sostorreye menakada, “Batar jokhecʼ iń do amakʼ kathań ańjomketʼtama ar kại khon bańcaokʼ reakʼ dinreń goṛo akatʼmea.” Ńelpe, oktetetʼ do ńitokʼkangea, ar teheńge bańcao ńam reakʼ din kana.

³Mạsi lạgitʼ okaṭakʼle kạmikan ona jemon alo nisṛạu ocokʼ, onate nonkanakʼko bale kạmikana one okaṭakʼte jãhãeko tạkicʼ botecʼkokʼ.

⁴Ona khon bickom jotowakʼre Isorren sapʼ dapʼko mente apnarle sạbudokʼ kana. Santaore, muskilre, joṅjalkore,

⁵dal jomre, hajotkore, hulmalre, khaṭaokʼre, jagwarre ar upạsre.

⁶Ona chaḍa aleakʼ khạṭi jion hotete, aleakʼ akelte, sahao daṛete, dayate, sonot Jiu hotete, khạṭi dulạṛte,

⁷sạri porcarte ar Isorakʼ daṛe hotete ale dole sạbutetʼkana je, sapʼ dapʼko kanale mente. Arhõ banar tite sạriakʼ reakʼ khanḍa bhanḍa sapʼkatele sạbudetʼ kana ale do Isorren sapʼ dapʼko kanale.

⁸Hoṛko manotle ar bako manotle, ale reaṅ mońjko roṛ ar bạṛicʼko roṛ, menkhan ale dole sạbud akada Isorren sapʼdapʼko kanale. Hoṛ do ṭhokko metalekana, menkhan ale do sạriakʼ horrele taṛameda.

⁹Hoṛ do ale oromle bako monejoṅ kana, menkhan sanamkoge ale doko orom akatʼlea. Ale do gujukʼ barag lekale hoeakanre hõ jiwetʼ menakʼlea. Arle dal ocokʼkanre hõ bale gocʼ ocokʼ kana.

¹⁰Ạḍi dukle ńametʼre hõ aleakʼ ontor do jao ghuṛi rạskạte perecʼgetalea. Ale do apnarle reṅgecʼgere hõ, ḍher hoṛkole kisạ̃ṛ ocoyetʼkoa. Cetʼge bạnukʼtalere hõ, jotowakʼren ạidạriko kanale. Ar nonkatele sodoretʼkana, ale do Isorren sapʼ dapʼko kanale.

¹¹E Korinthiren biswạsiko, ale do khulạsategele roṛ akada ar ape ṭhen aleakʼ ontor do purạtele khulạu akada.

¹²Ale do ape lạgitʼ aleakʼ ontorle jhicʼ akada, menkhan ape do ale birudre apeakʼ ontorpe siń esetʼ akada.

¹³Ińren hopon lekateń metapekana, cetʼleka ape lạgitʼ aleakʼ ontorle jhicʼ akatʼ, onkage ape hõ ale lạgitʼ apeakʼ ontor jhicʼ dohoepe.

¹⁴Ape do bepạtiạuko sãote inạ mitʼ ãrãṛre alope joṛaokʼa. Dhorom tulucʼ bedhoromakʼ jopoṛao do okare? Marsal ar ńut talare cetʼ jopoṛao do menakʼgea?

¹⁵Mạsi tulucʼ Beliạlakʼ, metakʼme Soetanakʼ aṛaṅ do cetʼ jurikʼ kangea? Isorren hoṛko lekate biswạsikoakʼ oka bakhra onare cetʼ bin biswạsikoakʼ bakhra menakʼgea?

¹⁶Isorakʼ mundilre boṅga murtikoakʼ jaega do okare? Aboge coṅ jiwetʼ Isorakʼ tahen oṛakʼkan bon. Sonot sostore meneda, “Iń do ińren hoṛko talareń girobasokʼa, ar onko tulucʼ iń dãṛãna. Iń do onkoren Isorriń hoyokʼa, ar onko do ińren hoṛko hoyokʼa.”

¹⁷Arhõe meneda, “Onate ape do be pạtiạuko tala khon oḍok hijukʼpe ar begarokʼpe. Ar jãhãn besaphawakʼko alope joṭeda, enḍekhan ińgeń ataṅ darampea.”

¹⁸Ona chaḍa “Sanam daṛeanicʼ Probhui meneda, ińge aperen babań hoyokʼa, ar ape do ińren hopon ar hoponerakope hoyokʼtińạ.”