Read Santali 2 Korinthiko 7 Bible Online

2 Korinthiko 7 - Santali bible

2 Korinthiko 7

¹E dulạṛiạ gateko, abon lạgitʼ noako gokʼakʼ menakʼte delabon, jel ar jiu reakʼ joto chut khon apnar bon saphakʼ ma, ar Isor botorae tulucʼ sonot reakʼ hortebon laha idikʼma.

²Apeakʼ monre jaega aṛakʼ alepe. Ale do okoe hõ bale behok akatʼkoa, okoeakʼ hõ bale loksan akatʼtakoa, ar okoe hõ bale eṛe lipukʼ akatʼkoa.

³Bicạr dusipe lạgitʼ noa katha do bạń roṛeda. Pạhilregeń menakatʼpea, ape do aleren nunạkʼ dulạṛiạko kanape je, ape tulucʼ gujukʼ hõle rạjigea ar jiwetʼ tahen hõle rạjigea.

⁴Apere ạḍi pạtiạu menakʼtińạ ar ape iạte ạḍitetʼ iń sarhaokʼ kana. Aleakʼ joto duk sasetre ińakʼ rạskạ do sareṛokʼ kana ar ạḍi jiwi raṛecʼ iń ńameda.

⁵Makedoniạte seṭerkatere hõ hoṛmore jãhãn aosan bale ńamlakʼa; ale do joto secʼ khonge dukle ńametʼ tahẽkana; ar sanam secʼge gulmal ar ontorre botor tahẽkana.

⁶Menkhan Isor, one okoe do dukokʼkanko jiwi raṛecʼe emakokan, uni do Titusakʼ hijukʼ hotete jiwi raṛecʼe ematʼtalea.

⁷Eken ona do baṅ, Titus acʼge ape hotete jiwi raṛecʼe ńamakatʼte ale hõ jiwi raṛecʼle ńamakada. Apeakʼ gagoj ar duk reakʼ katha uni doe lại akatʼlea are baḍae ocoakatʼlea, ape do ạḍipe uihạredeń kana, onate iń do artetʼ rạskạń ạikạukeda.

⁸Ińakʼ laha reakʼ ciṭhiteń mon duk ocoakatʼpere hõ iń do bạń kastaokʼkana. Enteń ńelkeda ona ciṭhite thoṛa ghạṛi lạgitʼpe mon duklena ar iń hõ thoṛa doń duklengea, menkhan ńitokʼ doń rạskạkʼ kana.

⁹Dukpe ńamletʼte do bạń rạskạkʼ kana, bickom duk iạte kại khon monpe ạcurakatʼteń rạskạkʼ kana. Isorakʼ mone lekatege noa duk dope ńamleda, onate ale hotete apeakʼ jãhãn loksan do baṅ hoeakana.

¹⁰Isor oka duke emokʼ onate do kại khon mon ạcur ruạṛokʼa ar bańcao ńamokʼa, ar dukokʼ reakʼ cetʼge baṅ tahena. Menkhan dhạrti reakʼ duk do manwakoakʼ morone ạguyeda.

¹¹Hudiskate ńelpe, Isor duke ematʼpe tahẽkanre ape do bape pạclena, ar bin dusạnko mente sạbudokʼ lạgitʼ tinạkʼ jid tahẽkantapea, kạipe hirkhạwatʼ tahẽkana, monre botor tahẽkantapea, tinạkʼpe gagojlena, tinạkʼpe hudisokʼkan tahekana ar kại reakʼ sạjại lạgitʼ tinạkʼpe jidlena. Nonkate joto secʼtegepe sạbudleda je, ape dope bin dusạnko kana mente.

¹²Iń do ona ciṭhiń olletʼgea, menkhan okoeye behok ocoakan uni lạgitʼ do bạń olakada, bickom Isor samaṅre ape ṭhen sodorokʼma je, ape do sạrigepe dulạṛetʼlea.

¹³Ar noa hotete ale do jiwi raṛecʼle ńamakada. Ona jiwi raṛecʼ sãote Titusakʼ rạskạ ńelte ale hõle rạskạkʼ kana, ente ape sanamko ṭhen khon uni do monre ạḍi suluke ńamakada.

¹⁴Iń doń kusi akana, ente ape iạte uni ṭheniń sarhaolena, ar onate iń do bạń lajao ocolena. Ona bodolte ape ṭheniń lạiletʼ aleakʼ sanamakʼ katha cetʼleka sạri tahẽkan, onkage Titus ṭhen ape iạte aleakʼ sarhaokʼ hõ sạriakʼ mente sạbud akana.

¹⁵Ape sanamko cetʼleka botor ar manot salakʼ unipe ataṅkedete gobolre menakʼpea mentepe udukʼatʼle tahẽkan, ona disạte ape lạgitʼ uniakʼ dulạṛ do arhõ bạ̃ṛtiyentaea.

¹⁶Iń doń kusi akana, ente jotowakʼre ape cetanreń bhorsa daṛeakʼa.