Read Santali Ephesiko lạgitʼ Pạul Apostolakʼ ciṭhi 5 Bible Online

Ephesiko lạgitʼ Pạul Apostolakʼ ciṭhi 5 - Santali bible

Ephesiko lạgitʼ Pạul Apostolakʼ ciṭhi 5

¹Isorren dulạṛiạ hoponko lekate ape do Isorakʼ lek leka hoyokʼpe.

²Mạsi cetʼlekae dulạṛaketʼ bon ar abon lạgitʼ Isor ńutumte jut so lạgitʼ samaṅokʼakʼ lekate acʼtetʼgeye emen, ṭhik onkage ape hõ dulạṛ horte taṛampe.

³Jãhãlekan loṭghuṭi, bin napaeakʼ se laloc reakʼ kathako ape talare jemon alo ańjomokʼ, ente noako katha do Isorren hoṛkoakʼ baṅ sajaokʼa.

⁴Ar sanam lekan lajao paṛao colon se lelha roṛ ar bạṛicʼ umtạ umti katha hõ ape talare alo hoyokʼma, ente noako do baṅ sajaokʼa. Ona khon bickom ape do Isor sarhaoepe.

⁵Khạṭigepe baḍaea, okoeko laṭghaṭetʼkan, okoeko bin napaege ar okoekoko lalociạkokan, metakʼme okoe do boṅga sewakoko ńumogokʼkan onko do Mạsi ar Isorakʼ rajre jãhãn ạidạri bạnukʼtakoa.

⁶Ạuṛi sạuṛi kathate okoe hõ alo jemonko bulạupe, ar eṭakʼ horte aloko idipe, ente okoe bebatao iạte onakoko kạmi onkorege Isorakʼ sạjại do paṛaokʼa.

⁷Ar nonkan hoṛko sãote do alogepe gatekʼa,

⁸ente pạhil do ńutrepe tahẽkana menkhan ńitokʼ do Probhurepe mitʼ akante marsaltepe hecʼakana. Marsalte perecʼ hoṛkoakʼ cetʼleka calakʼ lek kan onkage ape hõ calakʼpe,

⁹ente sanam lekan bhạlại ar dhorom ar sạriakʼ kangea marsal reakʼ jo do.

¹⁰Onate biḍạu aṭkarpe okaṭakʼ kạmi do Probhui kusikʼa mente.

¹¹Ńut reakʼ bin joanakʼ kạmikore alope seledokʼa; bickom onako reakʼ dos udukʼakope,

¹²ente manwakoakʼ oko danaṅre kạmi akatʼ reakʼ noako katha roroṛ hõ lajao paṛaoakʼ kana.

¹³Marsal hotete jãhãn kạmi reakʼ dos udukʼlen khan ona do sodorokʼgea,

¹⁴ente marsalge jotowakʼe sodoreda. Onate sonot sostorre olakana, “Ebhenokʼme E jạpitʼ akatʼicʼ, ar gocʼko khon beretʼme; khan Mạsiye marsalama.”

¹⁵Ape cetʼlekape calakʼkan ona reaṅ mońjte hudiskate ńelpe. Bebuj hoṛko leka baṅ calaokate akelanko leka calakʼpe.

¹⁶Apeakʼ tire bhage kạmi reakʼ okaṭakʼ ạt menakʼ ona do purạte kạmire lagaope, ente noa piṛhi do bạṛicʼgea.

¹⁷Onateń meneda, ape do bebujko alope hoyokʼa, bickom Probhuakʼ sana cetʼ kana mente ona bujhạu joṅpe.

¹⁸Alope ńu bulokʼa, onate bin sambṛaokʼkope hoyokʼa. Ona khon bickom sonot Jiu tabere tahenpe,

¹⁹ape do sereńko reakʼ sereńte ar sarhao sereńkote ar Jiuteakʼ õṛhẽakʼkote ape apere gapal maraope; ar apeakʼ ontorte Probhu õṛhẽ sereńaepe.

²⁰Siń sạṭupʼ aboren Probhu Jisu Mạsi ńutumte Isor Baba gun manao joharaepe.

²¹Mạsiakʼ dewa sewakore menakʼpete ape apere tabe akan tahenpe.

²²E maejiuko, Probhurepe tabe akante apan ạpin jãwãe tabere tahenpe,

²³ente Mạsi do cetʼleka manḍerren mathakane, metakʼme acʼakʼ hoṛmo reakʼ mathakane, onkage herel hõ maejiuren matha kanae. Ona chaḍa noa hoṛmoren babańcaoicʼ do Mạsige.

²⁴Cetʼleka manḍer do Mạsiakʼ tabere menakʼa onkage maejiuko hõ jotowakʼre apan ạpin herel tabere tahen lek kanako.

²⁵E jãwãeko, Mạsi cetʼ leka manḍere dulạṛletʼ ar ona lạgitʼ apnare emen ṭhik onkage ape hõ aperen bạhuko dulạṛkope.

²⁶Mạsiakʼ monsubạ do hoyokʼ kana jemon uni do acʼakʼ kathate dakʼre um saphakate onae sonot jemon acʼge apnar lạgitʼ mitʼṭen ṭhonokanakʼ manḍerre samaṅ daṛeakʼ. Unre manḍerre bin dagan, se joṅgṛaoan se onkan jãhãnakʼge baṅ tahena, bickom ona do sonot ar niphuṭge hoyokʼa.

²⁸Jãwãeko cetʼ leka apnarakʼ hoṛmoko dulạṛetʼkan ṭhik onkage apnarren bạhuko hõ dulạṛko lek kantakoa. Rinicʼtetʼe dulạṛedekan hoṛ do apnargeye dulạṛokʼ kana.

²⁹Okoe hõ apnarakʼ hoṛmo bae hirkhạwakʼa, bickom uni do acʼakʼ hoṛmoe ạsul are jotona. Onkage Mạsi hõ acʼakʼ manḍer do ạsul are jotoneda.

³⁰Ente abon do uniakʼ hoṛmo hạṭińko kana bon.

³¹Sonot sostorre olakana, “Noa iạtege herel do eṅgat-apat bạgikate acʼren bạhu tulucʼ mitʼakane tahena ar unkin banar do mitʼ hoṛmokin hoyokʼa.”

³²Noa okoakʼ do maraṅgea, menkhan iń do Mạsi ar uniakʼ manḍer reaṅ kathań roṛeda.

³³Menkhan ona katha do tahẽocoakʼge. Ape mimitʼko aperen bạhuko apnarleka dulạṛkope ar bạhu hõ onka leka acʼren jãwãeye manotema.