Read Santali Philipiko lạgitʼ Pạul apostolakʼ ciṭhi 3 Bible Online

Philipiko lạgitʼ Pạul apostolakʼ ciṭhi 3 - Santali bible

Philipiko lạgitʼ Pạul apostolakʼ ciṭhi 3

¹E ińren boehako, mucạtʼreń meneda, Probhu tulucʼ jopoṛao menakʼpete rạskạkʼpe. Ape ṭhen inạ kathage olape do bạń ạṛisokʼ kana, ar sontorpe lạgitʼ ona do bhagegea.

²Onko setako khon, metakʼme okoe bạṛicʼakʼko kạmikan ar khatna ocokʼ lạgitʼko ãṭokʼkan onko khon sontorokʼpe!

³Abo kangeabon sạriakʼren khatna akan hoṛ do, ente abo do Isorren Jiu hotete uni bon sewawae kana ar Mạsi Jisu iạte bon sarhaokʼ kana ar apnarre do babon bhorsakʼ kana.

⁴Iń do iạkhạ apnarreń bhorsa daṛekokʼgea. Menkhan jãhãe eṭakʼ hoṛ apnarre bhorsa menakʼtaea menteye hudisetʼ khan, uni doe baḍaema, iń do uni khon hõ bạ̃ṛti jạruṛ menakʼtińạ.

⁵Irạl mãhã hilokʼre iń doń khatna ocolena; Israel bõsren Benjamin khũṭreń janamakana; iń do mitʼṭen khạṭi Ibri hoṛ kangeạń; ar Moseakʼ ạn-ạriko manaore do mitʼṭen Phạrusi hoṛge;

⁶dhorom secʼte nonkan bạṛicʼ hoṛiń tahẽkana je, Mạsiakʼ manḍerrenkoń khedetʼkokan tahẽkana; ar Isor samaṅre dhoromicʼ hoyokʼ reakʼ aste Moseakʼ ạn-ạriko manaore okoe hõ bako dusiledińa.

⁷Menkhan okako iń lạgitʼ lab tahẽkan onako do ńitokʼ Mạsi khạtirte lokshangeń bujhạueda.

⁸Sạrige okoe lạgitʼ noako lokshaniń bujhạu akatʼ uni ińren Probhu Jisu Mạsi baḍaeyere oka asambheṛ bhor menakʼ, uni ńutumte jotowakʼge lokshan menteń hudiseda. Mạsi jemoniń lab daṛeae ar Mạsire jemoniń ńel ńamokʼ, onate onako do mạilạ lekań bujhạueda.

⁹Ạn-ạrikoń manaoetʼte dhoromiń hoeakana ona do baṅ, menkhan Mạsire biswạs khạtirte Isor do dhorom menteye ataṅ akadińạ. Noa dhorom do Isor ṭhen khonge hecʼakana ar biswạsre ṭehãḍokʼ kana.

¹⁰Iń do Mạsi baḍaeye sanań kana ar oka daṛe hotete gocʼko khone jiwetʼ beretʼ ocolen ona hõ baḍae sanań kana. Iń do uniakʼ duk sasetre bhạgiạdar hoyokʼ sanayediń kana. Ar oka monsubạteye gocʼlen iń hõ onkan monsubạge ńańam sanayediń kana.

¹¹Onate jãhãnakʼge hoyokʼ iń do khạṭige gocʼko khoniń jiwetʼ beretʼ ruạṛ ocokʼa.

¹²Oka lạgitʼ iń kurumuṭukan ona do ńitgeń ńamakada se purạteń lab akada onka do baṅ. Menkhan oka lạgitʼ Jisu Mạsiye sapʼledeń ona sapʼ tiog lạgitʼge iń doń khudạu idikana.

¹³E boehako, onań sapʼ tiyokʼ akada mente do bạń meneda. Menkhan mitʼṭeniń kạmiyeda, ona do tayom reakʼ jotowakʼko hiṛińkate samaṅ senakʼko secʼ sohorkate mucạtʼ simạnako secʼ iń ńir calakʼkana. Onate Mạsi Jisu hotete Isorakʼ serma khonakʼ hoho reakʼ okaṭakʼ kuṛại menakʼ ona jemoniń ńam.

¹⁵Ona iạte dhorom secʼte okoe bon laha idikʼkan abo do inạ mitʼ monejoṅakʼge tahen lek tabona. Ar jãhãnakʼ reaṅ eṭakʼ lekape moneyetʼ khan Isor do ona hõe udukʼapea.

¹⁶Metakʼme, abo do dhoromokʼ lạgitʼ tinạkʼ hạbicʼ bon laha idiakan inạ dharatege taṛam idi lek tabona.

¹⁷E boehako, ape sanamko iń leka baṛe calakʼpe, ar okoe nonkako calakʼkan onko ńel oromkakope. Ar cetʼlekape calakʼa ona dole udukʼ akawatʼpea.

¹⁸Iń do aema dhaoiń lại akawatʼpea ar ńitokʼ hõ mẽtʼdakʼ joro joroteń lạiape kana, nonkan aema hoṛ menakʼkoa one okoe do Mạsiakʼ krusren bạiri lekako colonetʼkan.

¹⁹Onkoakʼ mucạtʼtetʼ do nosṭokʼge; lacʼgetako Isor do; ar oka do lajao paṛawakʼkan onatege onko doko sarhaokʼ kana; onko do eken dhạrti reakʼakʼkogeko moneakʼ kana.

²⁰Menkhan aboakʼ rajosṭi do sermare; one onḍe khon abo do aboren babańcaoicʼ Probhu Jisu Mạsiakʼ hijukʼ bon ńel hohorkan.

²¹Uni do aboakʼ nijorte perecʼ hoṛmoe pherao tabona ar acʼakʼ ṭhonokanakʼ hoṛmo lekae hoe ocoea. Ar oka daṛete jotowakʼko acʼakʼ gobolreye ạguyetʼkan ona daṛetege uni do noae kạmiya.