Read Santali Philipiko lạgitʼ Pạul apostolakʼ ciṭhi 4 Bible Online

Philipiko lạgitʼ Pạul apostolakʼ ciṭhi 4 - Santali bible

Philipiko lạgitʼ Pạul apostolakʼ ciṭhi 4

¹E boehako, iń do apeń dulạṛetʼpea ariń uihạretʼpea. Apege ińakʼ rạskạ, ar apege ińakʼ jitạukʼ reakʼ mala. E dulạṛiạko ape do Probhure teṅgo ṭak akae tahenpe.

²Euodiạ ar Suntukh, iń do biseskaete noań nehõraben kana, Probhu tulucʼ ben kolom mitʼ akante aben do mitʼ mon akae jemon ben tahen.

³E sạri juri ãrãṛtiń am hõń nehõram kana, am do nukin maejiu goṛowạkinme. Unkin do Mạsi reaṅ bhage sombat iạte iń tulucʼ, ar Klement ar ińren eṭakʼ são kạmiyạko tulucʼ kosṭokin sahao akada. Nokoakʼ ńutum do jion reakʼ puthire olakana.

⁴Probhurepe kolom mitʼakante ape do jaoge rạskạkʼpe. Arhõń mena, rạskạkʼpe baṛe.

⁵Apeakʼ mạ̃hirtetʼ do sanamko ṭhen baḍaeokʼma. Probhu do usạrageye daraekana.

⁶Jãhãnakʼ reakʼge alope dandokʼa, bickom apeakʼ joto arojko do koejoṅ ar nehõrate gunmanao johar salakʼ Isor baḍae ocoyepe.

⁷Ona iạte, Isorakʼ okaṭakʼ suluk reakʼ katha manwa do hudiskate hõ bako bujhạu daṛeakʼkan, ona suluk do Mạsi Jisu hotete apeakʼ mon ar ontore rukhiyạitapea.

⁸E boehako, mucạtʼre noageń mena, okaṭakʼ sạriakʼkan, okaṭakʼ do lek anakʼkan, okaṭakʼ do niphuṭ ar khạṭige, okaṭakʼ do mońjge, okaṭakʼ do manot ńam lek kan, metakʼme okaṭakʼ do bhageakʼkan ar sarhao ńamokʼ, onako secʼ moneakʼpe.

⁹Ape do iń ṭhen khon okaṭakʼpe cetʼakatʼ ar bhage mentepe ataṅ akatʼ ar ińre okaṭakʼpe ńelakat̕, ar ińakʼ mocate okaṭakʼpe ańjomakatʼ, onkage kạmipe. Enḍekhan sulukren Isor do ape tulucʼe tahena.

¹⁰Probhure ạḍitetʼgeń rạskạkʼ kana, ente ḍher din tayom ape do arhõpe disạ ruạṛkedińa. Sạrige ape do iń lạgitʼ jaogepe dạndikʼkan tahẽkana, menkhan ona ńel ocoetape lạgitʼ ạt do bape ńamleda.

¹¹Ińakʼ jãhãn ṭonṭa iạte noa kathań roṛeda ona do baṅ, ente jãhã dosaregeń tahen inạrege kusi tahen iń cetʼakawana.

¹²Ṭonṭare ar sareṛokʼre hõ iń do sanamakʼren hitạu akan hoṛ kạnạń. Jombikʼre ar reṅgejokʼre, ar sareṛokʼre se ṭonṭakʼre hõ cetʼleka kusi tahen jạruṛa ona doń baḍaegea.

¹³Ar okoe daṛeye imạńkan uni hotetege iń do jotowakʼiń kạmi daṛeakʼ kana.

¹⁴Enhõ ape do ińakʼ duk sasetre bhạgiạdar hoeakantepe bhage akada.

¹⁵E Philipi manḍerren hoṛko, ape hõpe baḍaegea, bhage sombat lại saḍe reakʼ etohopʼre Makedoniạ khoniń oḍok calaolenre, ape eskar chaḍakate oka manḍerrenko hõ emokʼ ar hatao babotre iń tulucʼ bako bhạgiạrilena.

¹⁶Ar Thessalonikiạreń tahẽkanre hõ ape do mitʼ bar dhaope goṛowạdiń tahẽkante ińakʼ reṅgecʼpe purunletʼtińạ.

¹⁷Jãhãn daniń khojokʼ kana ona do baṅ, menkhan nonkan jotetʼ geń asokʼ kana one oka do ape ńutumte doho jarwa idikʼ.

¹⁸Ińakʼ jotogeń ńam caba akada. Ar ińakʼ oka jạruṛ ona khon hõ bạ̃ṛti menakʼtińạ. Ephaphroditus tite apeakʼ daniń ńamketʼte ińakʼ do ḍher hoeakantińạ. Noa danko do mońj so reakʼ mahkaokʼ ar samaṅoakʼge,

¹⁹ar noate Isor doe kusikʼ kana. Ińren Isor do acʼakʼ ṭhonokte perecʼ dhon lekate Mạsi Jisu hotete apeakʼ joto ṭonṭae cabaetapea.

²⁰Aboren Baba ar Isorakʼge ṭhonok hoyokʼtae ma jug cetan jug hạbicʼ. Amen.

²¹Mạsi Jisu tulucʼ jopoṛao menakʼko Isorren mimitʼ hoṛ ińakʼ johar emakope. Iń soṅgere okoe boehako menakʼko onko hõ apeko joharape kana.

²²Isorren sanam hoṛko okoe do nonḍe menakʼko, asokaete Kạisạr oṛakʼren hoṛko do apeko joharape kana.

²³Probhu Jisu Mạsiakʼ daya apeakʼ ontorre baṛe tahenma.