Read Santali Kolossiko lạgitʼ Pạul Apostolakʼ ciṭhi 2 Bible Online

Kolossiko lạgitʼ Pạul Apostolakʼ ciṭhi 2 - Santali bible

Kolossiko lạgitʼ Pạul Apostolakʼ ciṭhi 2

¹Iń doń menjoṅ kana jemonpe baḍae baṅma, iń do ape lạgitʼ ar Laodikiạ nagraha reakʼ manḍerren hoṛko lạgitʼ, ar okoe bako ńṭoṭhadiń onko sanamko lạgitʼ ạḍiń khaṭaokʼ kana mente.

²Ińakʼ monejoṅakʼ do noage jemon onko do ontorre udgạuko ńamte dulạṛreko tol midokʼ, ar Mạsi reaṅko bujhạute oka khạṭitetʼ ńamokʼ ona reaṅ purạ khạṭitetʼ jemon asambheṛko lab joṅ. Ar ona khạtirte Isorakʼ sạri okoakʼko, metakʼme Mạsiko baḍae orom daṛeaea.

³Mạsirege sanam lekan bud ar akelko oko menakʼa.

⁴Iń do noa kathań metapekana jemon okoe hõ ạuṛiakʼ kathakote bhul horte aloko ạnḍicʼ idipe.

⁵Iń do hoṛmo secʼte hạjir bạnuńre hõ Jiu secʼte doń hạjirgea ar apeakʼ bhage cạl-colon ar Mạsire apeakʼ kajaktetʼ ńeletʼteń rạskạkʼ kana.

⁶Ape do cetʼleka Jisu Mạsi Probhu mentepe ataṅakade onkage uni tulucʼ mitʼ tahente jion khemaope.

⁷Mạsire rehedokʼte unire benao rakabokʼpe. Ar cecetʼakʼ ńamkate okape pạtiạu akan onarege kajak akan tahenpe ar jao okte Isor gun manao joharaepe.

⁸Sontor akae tahenpe, jemon okoe hõ hoṛakʼ bidiyạ ar ạuṛi lilkạrte aloe siboṛpema. Mạsi tulucʼ ona cecetʼakʼ reakʼ do jãhãn jurige bạnukʼa; manwakoakʼ ạri-cạli ar dhạrti reakʼ ạḍi lekan ạn-ạrirege ona do ṭehãḍokʼ kana.

⁹Isorakʼ goṭa perecʼtetʼ do Mạsiakʼ hoṛmo rupteye girobasokʼ kana, ar Mạsi tulucʼpe kolom mitʼakante ape hõ ona perecʼtetʼpe ńamakada.

¹⁰Uni do serma cetanren sanam cakʼlaoko ar ektiạrikoren matha kanae.

¹¹Ona chaḍa ape do Mạsi tulucʼpe kolom mitʼakante khatna hõpe khatna ocoakana. Jãhãe manwa tite do bape khatna ocoakana, Mạsi acʼgeye khatna akatʼpea; metakʼme hoṛmore jel reakʼ oka daṛe tahẽkan ona daṛe khon uni doe chaḍao akatʼpea.

¹²Bạptisma hotete Mạsi tulucʼpe topa ocoakana; ona do baṅ, menkhan okoe gocʼko khon Mạsiye jiwetʼ beretʼkede uni Isorakʼ daṛere pạtiạu hotete ape hõ Mạsi tulucʼpe jiwetʼ ocoakana.

¹³Kại ar bin khatna iạte ape do gocʼgepe tahẽkana, menkhan Isor do Mạsi sãoteye jiwetʼketʼpea. Uni do aboakʼ joto ghạṭkoe ikạketʼ tabona,

¹⁴ar abo birudre oka dolel olakan tahẽkan ona reakʼ jotowakʼe meṭaokeda. Ona dolel do krusre khil jalatʼketʼteye bạtil giḍikada.

¹⁵Uni do sanam bạṛicʼ rajosṭiko ar ektiạriankoakʼ daṛeye cabaketʼa. Nonkate uni do Mạsiakʼ krus hotete onko cetanreye jitạuena ar jotoko samaṅre onkoe bemanot ocoketʼkoa.

¹⁶Onate jom-ńu se jãhãn dhorom porob babot reakʼ se ambas reakʼ se jirạukʼ mãhãko reakʼ okoe hõ aloko bicạrpe ma.

¹⁷Onako do darakan dinkore oka hoyokʼ ona reakʼ umultetʼ kana, menkhan oka sạrikan ona do Mạsirege menakʼa.

¹⁸Okoe apnarakʼ hoṛmore kosṭoko emetʼkan ar serma goḍet sewawako reakʼ jạruṛko bujhạuetʼkan onko do apeakʼ jit siropa ńamokʼ horre tạkicʼakʼ jemon aloko hoeocoe. Nonkan hoṛ do okako ńelakat̕ menteko hudisetʼkan ona reaṅ ạḍi maraṅ maraṅ kathako roṛa ar ạuṛi bạḍạiteko phulạukʼa, ente onkoakʼ mon do jel reakʼ sanare gobol akantakoa.

¹⁹Onko do kajakte mathatetʼ, metakʼme Jisu Mạsi do bako sapʼ dohoyede kana, menkhan ona matha reakʼ ạyurte goṭa hoṛmo do jaṅ ar jel reakʼ tol midokʼkante Isorakʼ sana leka hara idikʼkana.

²⁰Mạsi tulucʼpe gocʼente ape do dhạrti reakʼ aema lekan ạri-cạli khonpe pharak akana, menkhan enrehõ dhạrtiren hoṛko leka cedakʼ arhõ dhạrti reakʼ ạri-cạlirepe gobolokʼ kana?

²¹Okaṭakʼ jinis do jaoge beohar idite bạṛijokʼ onako reaṅ do nonka cạli menakʼa, alom saba, alom joma, alom joṭeda. Noako cạli do manwakoakʼ hukum ar cecetʼakʼ kana.

²³Ar noako ạri-cạli ńelokʼte do akelte perecʼakʼ lekage bujhạukʼa, ente cetʼ leka sewae hoyokʼa, cetʼleka apnarte huḍińokʼ hoyokʼa, cetʼleka apnarakʼ hoṛmo kosṭo emokʼ hoyokʼa, ona do noa ạri-cạlikoe baḍae ocokoa, menkhan jel reakʼ sana koboj lạgitʼ noako do oka kaj reakʼ hõ baṅkana.