Read Santali Kolossiko lạgitʼ Pạul Apostolakʼ ciṭhi 3 Bible Online

Kolossiko lạgitʼ Pạul Apostolakʼ ciṭhi 3 - Santali bible

Kolossiko lạgitʼ Pạul Apostolakʼ ciṭhi 3

¹Mạsi tulucʼ gocʼko khonpe jiwetʼ beretʼ ocoyen khan, enḍekhan Mạsi one sermare Isorakʼ jojomsa aṛereye duṛupʼ akan ona coṭ reakʼakʼko baṛe ńam baṛaepe.

²Ot reakʼko do baṅ bickom coṭ reakʼakʼkoge moneakʼpe.

³Ente ape dope gocʼena ar apeakʼ jion do Mạsi tulucʼ Isorre oko menakʼa.

⁴Okoe doe aperen jion kan uni Mạsiye sodorlenre ape hõ uni tulucʼ uniakʼ ṭhonokren bhạgiạdarko mentepe sodorokʼa.

⁵Onate apeakʼ jel reakʼ sana oka menakʼ ona marao giḍikakʼpe. Ente onare joto lekan loṭghuṭi, bin napaeakʼ, bạṛicʼ sana, bạṛicʼakʼ reakʼ laloc ar dhon reakʼ laloc menakʼa, one oka do boṅga sewakan.

⁶Ar okoe doko bebataokokan onko do ona iạtege Isorakʼ sạjại hecʼ paṛao akokana.

⁷Ape hõ pạhil do onkagepe colonetʼ tahẽkana,

⁸menkhan ńitokʼ do edre, raṅgao, dusṭạmi, opoman, ar nilạjiạ roṛ ape khon baṛe sahaṛokʼma.

⁹Alope eṛea, ente aperen “Mare hoṛtetʼpe” oḍok giḍi akadea ar uniakʼ kạmiko sudhạ kicricʼ lekape totʼ giḍi akada ar “Nawa hoṛtetʼpe” horokʼ akawana. Uni “Nawa hoṛtetʼ ” do arhõe nawa arokʼkante acʼren sisirjạuicʼ lekae hoyokʼkana jemon uni sisirjạuicʼ do purạtepe baḍae orom daṛeae.

¹¹Nonkate boṅgan hoṛ jạtko talare se Jihudiko talare, khatna se bin khatna ocoakanko talare, osobbho, nicạṛ jạt, golam se sạdhinko talare jãhãn begar do bạnukʼa; onḍe do Mạsigeye asolicʼ kana ar uni do sanamko talare menaea.

¹²Onate Isor okoekoe bachao akawan onko sonotko ar dulạṛiạko lekate mãyãkʼ mon, dulạṛ, mạ̃hir, nindhạn ar soborite apnar sajaokʼpe.

¹³Ape apere sahaokʼpe ar jãhãe birudre apeakʼ jãhãn dos reakʼ menakʼtae khan uni do ikạkaepe. Probhu cetʼlekae ikạ akatʼpe onkage ape hõ eṭakʼko ikạkako lektapea.

¹⁴Ar onako sanamakʼ cetanre dulạṛte sajaokʼpe. Ente dulạṛge sạbit utạrokʼ reakʼ tonol kana.

¹⁵Mạsi okaṭakʼ suluke emokʼkan ona sulukge apeakʼ ontorre tahente ape mimitʼkoe ạyurpema. Sulukre tahen lạgitʼge coṅ sanamko mitʼ hoṛmorepe hoho ocoakana. Ar ape do gun manaoko baṛe hoyokʼpe.

¹⁶Mạsiakʼ katha apeakʼ ontorre purạte girobas ocoakʼpe. Isorakʼ akelte lại cecetʼ ar sipikhạukʼpe, sereńko, sarhao sereńko ar Jiuteakʼ õṛhẽakʼkote apeakʼ ontorre Isor gun manao tulucʼ sereńaepe.

¹⁷Jãhãnakʼgepe roṛ ar jãhãnakʼgepe cekae ona do Probhu Jisu ńutumte kạmipe ar uni hotete Isor Baba hõ gunmanao joharaepe.

¹⁸E bạhuko aperen jãwãeko tabere tahenpe, ente Probhuren hoṛ lekate noa do lek kana.

¹⁹E jãwãeko, apnar bạhuko dulạṛkope, ar alope haṛhatʼakoa.

²⁰E gidrạko, sanamakʼre aperen gogo-babawakʼ bataotakope, ente noa do Probhui kusiyakʼa.

²¹E babako, aperen gidrạko alope edre ạṛis ocokoa. Jemon onko do aloko hulạs bhaṅgaokʼ.

²²E golamko ape do jotowakʼre noa dhạrtiren kisạ̃ṛko ṭhen tabe akan tahenpe. Eken mẽtʼ samaṅre golam khaṭaokʼte hoṛ khusi ocoko leka do alo, menkhan khạṭi monte Probhu botorae tulucʼ onkore tabe akan tahenpe.

²³Jãhãnakʼgepe cekae, manwako lạgitʼ do alo, bickom Probhu lạgitʼpe onkayetʼte mon ar ontorte kạmipe,

²⁴entepe baḍaegea, Probhu acʼren hoṛko lạgitʼ okae doho akatʼ onage kuṛại lekate uni ṭhen khonpe ńama. Ar ape okoe ṭhenpe khaṭaokʼ kan uni doe Probhu Jisu kana.

²⁵Ente behokicʼ do acʼe behokakatʼ reakʼe ńam ruạṛa; Probhu ṭhen mẽtʼãhã beṅgetʼakʼ do bạnukʼ anaṅ.