Read Santali 1 Thessalonikikko 1 Bible Online

1 Thessalonikikko 1 - Santali bible

1 Thessalonikikko 1

¹Isor Baba ar Probhu Jisu Mạsi tulucʼ mitʼakan Thessaloniki manḍerrenko ṭhen, Siluạnus, Timothi, ar iń Pạul do noa ciṭhile oleda. Aboren Isor Baba ar Probhu Jisu Mạsi do daya ar suluke dan ape ma.

²Koejoṅre sanamko siń sạṭupʼ disạpe tulucʼ ale do Isorle gun manao joharae kana.

³Biswạs khạtirte okape kạmikan, dulạṛ khạtirte okape mehnotetʼkan ar aboren Probhu Jisu Mạsire as akan iạte okape sombhuriyetʼ, ona katha do jaoge aboren Isor Baba samaṅre koejoṅrele disạyeda.

⁴Isorren dulạṛiạ boehakotiń, alele baḍaea, unige ape doe bachao akatʼpea,

⁵ente alele porcar akatʼ bhage sombat do eken katha motote do baṅ seṭer akatʼpea, menkhan daṛete, sonot Jiute ar purạ khạṭi salakʼ hecʼatʼpe tahẽkana. Ape sãote tahẽkan jokhecʼ apeakʼ bhạlại lạgitʼ cetʼ lekale colonetʼkan tahẽkan ona mape baḍaege.

⁶Ạḍi lekan santao talate hõ sonot Jiuakʼ rạskạ salakʼ ona bhage sombat ataṅkate ape do ale ar Probhurenko lekape coloneda.

⁷Onate Makedoniạ ar Akhaea Prodesren sanam biswạsiko ṭhen ape do mitʼṭen nạmunape hoeakana.

⁸Eken Makedoniạ ar Akhaea Prodes motorege ape ṭhen khon Probhuakʼ katha pasnao akana ona do baṅ, menkhan Isorre apeakʼ biswạs reakʼ katha hõ sanam jaegarege seṭer akana. Ar noa babotre aleakʼ do mementeakʼ cetʼge jạruṛ bạnukʼtalea,

⁹ente cetʼ lekape ataṅ daram akatʼle ona do hoṛkoko baḍae ocoyetʼlea. Onko do arhõko baḍae ocoakatʼlea je, ape do boṅga buruko ṭhen khon ruạṛkate cetʼleka jiwetʼ ar sạri Isor ṭhenpe hecʼakana jemon unipe sewawaete,

¹⁰serma khon uniren Hoponakʼ hijukʼpe ńel hor akae tahen. Uni Hopongeye hoyokʼ kana Jisu, one okoe do gocʼko khone jiwetʼ beretʼkede. Ar Isorakʼ oka sạjại pheḍ hijukʼkan ona sạjại khon uni Jisuge abo doe rukhiyạ bona.