Read Santali 1 Thessalonikikko 5 Bible Online

1 Thessalonikikko 5 - Santali bible

1 Thessalonikikko 5

¹E boehako, oka okte ar oka dinre ona hoyokʼ, ona reaṅ thoṛa olape reakʼ do jãhãn jạruṛ bạnukʼa. Ape do pusṭạutepe baḍaegea, ńindạ cetʼleka kombṛoe hijukʼa, onkage Probhuakʼ ona din hõ hijukʼa.

³Ar tinre hoṛko mena, “Suluk hoeakana, botor reakʼ do cetʼge bạnukʼa,” Unre bhạrti hoṛmo maejiuko acka bedon rakapʼako leka onko hoṛ doko ḍahao maraokʼa. Ar oka lekate hõ bako rukhiyạ daṛeakʼa.

⁴Menkhan E boehako, ape do ńutre bạnukʼpea, onate ona din kombṛo leka hecʼ paṛaoapea mente. Ape sanamkoge marsal ar sińren hoṛ kanape. Ar ńindạ se ńutren hoṛ do bon baṅkana.

⁶Onate eṭakʼko leka alo bon jạpitʼ joṅma, bickom jagwar akae bon tahente apnar bon sambṛaokʼma.

⁷Okoeko jạpid onko do ńindạgeko jạpida, ar okoeko bulokʼ onko do ńindạgeko bulokʼa.

⁸Menkhan abo do sińren hoṛ kanabon; onate koṛam aḍ lạgitʼ pạtiạu ar dulạṛte koṛam aḍkate ar bohokʼ aḍ lạgitʼ bańcaokʼ reakʼ as bohokʼre horokʼkate delaṅ apnar bon sambṛaokʼma.

⁹Sạjại ńam lạgitʼ do baṅ bickom aboren Probhu Jisu Mạsi hotete bańcao ńam lạgitʼge Isor doe ṭhik dohoakatʼ bona.

¹⁰Mạsi do abo lạgitʼe gocʼlena, onate jiwetʼ bon tahen ar bon gujukʼ, abo do jemon uni tulucʼ jiwetʼ bon tahen.

¹¹Onate ńitokʼ okape cekayetʼkan onkage mimitʼko udgạu emakope ar ape mimitʼko benao rakabokʼpe.

¹²E boehako, nehõrape kanale, okoe ape talareko mehnotetʼkan, ar Probhureko calaoetʼpe arko sikhạu paṛhaoetʼpe, onko baṛe manotkope.

¹³Onko okako cekayetʼkan ona lạgitʼ dulạṛ monte manotkope. Ar ape apere sulukte tahenpe.

¹⁴E boehako, ale do noale sikhạuetʼpe kana, okoeko kuṛhiạge onko sontorkope; ar okoeakʼ dil bạnukʼtako onko do dil emakope; okoeko nijorge onko goṛowakope ar sanamko secʼ sombhurikate sapahaope.

¹⁵Ńelpe, okoe hõ bạṛicʼ bodol bạṛicʼ jãhãe aloe halawaema. Ape do jaoge eṭakʼ sanamko lạgitʼ bhạlại reakʼ kurumuṭuipe.

¹⁶Jao okte rạskạkʼpe,

¹⁷ar mitʼ talao koejoṅpe,

¹⁸jotowakʼre Isor gunmanao joharaepe; ente Jisu Mạsi hotete ape lạgitʼ Isorakʼ monejoṅakʼ do noakangea.

¹⁹Sonot Jiu do alope ĩṛĩjea.

²⁰Okoeko nạbi lekate Isorakʼ kathako lạiyetʼkan, onkoakʼ kathako alope nihạt giḍiya, bickom jotowakʼko biḍạu aṭkarpe.

²¹Bhageakʼ sapʼ doho joṅpe,

²²ar joto lekan bạṛicʼakʼ khon sahaṛ akae tahenpe.

²³Sulukren Isor do acʼgeye sonot utạrpema, ar aboren Probhu Jisu Mạsiye hijukʼre apeakʼ hoṛmo, mon ar jiu purạ puri bin dusạn baṛe dohoetape.

²⁴Disạipe, okoeye hohoakawatʼpe uni doe pạtiạrgea; ar uni do khạṭigeye onkaea.

²⁵E boehako, ale lạgitʼ koejoṅpe.

²⁶Dulạṛ monte jotoko joharakope.

²⁷Iń do Probhu ńutumte noań hukumape kana, jemon noa ciṭhi sanam boehako ṭhen paṛhao ańjomokʼ.

²⁸Aboren Probhu Jisu Mạsiakʼ daya ape tulucʼ baṛe tahen ma.