Read Santali 2 Thessalonikiko 1 Bible Online

2 Thessalonikiko 1 - Santali bible

2 Thessalonikiko 1

¹Isor Baba ar Probhu Jisu Mạsire kolom mitʼakan Thessoloniki manḍerrenko ṭhen iń Pạul, Siluạnus ar Timothi do noa ciṭhile oleda.

²Isor Baba ar Probhu Jisu Mạsi do daya ar suluke dan apema.

³E boehako, ape ńutumte jao okte Isor gun manao johar emae lek kantalea. Apeakʼ pạtiạu do ạḍitetʼ baḍhao idikʼ kana ar ape mimitʼkoakʼ dulạṛ ape apere sarhe idikʼkante ale do sarhao emokʼ lek kantalea.

⁴Ar onatege Isorakʼ manḍerkore ale do ape iạtele sarhaokʼkana, ente okako khed ar duk sasetpe sahaoetʼkan ona talare hõ apeakʼ sombhuri ar pạtiạu do ṭarhao menakʼa.

⁵Ar noakoge Isorakʼ dhorom bicạr reakʼ mitʼṭen porman kana. Noa reakʼ monsubạ do hoyokʼ kana, jemon Isorakʼ rajosṭire lekmanko mentepe lekhakʼ. Ar ona iạtege ape do nunạkʼ dukpe sahao akada.

⁶Isorakʼ dhorom bicạr do noage, okoe apeko duk ocoyetʼpe uni hõ onkoe duk ocokoa;

⁷ar ape okoe do dukpe ńametʼ uni do ale sãoteye aosanpea. Probhu Jisu do tinre acʼren daṛean serma goḍetko sãote jolokʼkan seṅgelre serma khone sodorokʼa unrege noako do hoyokʼa. Okoe Isor bako baḍae akade ar Probhu Jisu reaṅ bhage sombat reakʼ katha bako bataoetʼkan unre uni do onkoe sạjạikoa.

⁹Probhu tinreye hijukʼa unre nonkae sạjạikoa one onate onko do uniakʼ hạjirokʼ ar maraṅ daṛe khon bahrereko ńurokʼte jaejug hạbicʼko marao utạrokʼa. Ona dinre acʼren hoṛko hotete acʼakʼ ṭhonok sodorokʼa ar okoeko pạtiạu akan onko sanamko hotete uniakʼ man hoyokʼtaea. Ape hõ onko pạtiạu akanko modrenko kanape, ente ape do aleakʼ goharepe pạtiạu akana.

¹¹Onate ale do jaoge ape lạgitʼle koejoṅ kana jemon aboren Isor do hoho ocokʼ lek menteye bujhạupe, ar acʼakʼ daṛete apeakʼ sanam bhage kạmi reakʼ monejoṅakʼe purạutape ar biswạsi iạte okakope kạmikan onare jemone sạbit utạrpe.

¹²Enḍekhan aboren Isor ar Probhu Jisu Mạsiakʼ dayate aboren Probhu Jisuakʼ ṭhonok do ape hotete sodorokʼa, ar apehõ uni hotetepe ṭhonok ocokʼa.