Read Santali 2 Thessalonikiko 2 Bible Online

2 Thessalonikiko 2 - Santali bible

2 Thessalonikiko 2

¹E boehako, aboren Probhu Jisu Mạsi doe hijukʼa ar mitʼ sãote jarwakate acʼ ṭhene idibona. Ar noa babotre ale do noale nehõrape kana,

²“Probhuakʼ din do seṭer akana,” Noate nạbi lekate roṛakatʼ johar kathate se eṭakʼ jãhãeakʼ kathate se aleakʼ olakʼ menkate jãhãn ciṭhi iạte ape do usạrate alope bilbilạukʼa se alope botorokʼa.

³Okoe hõ jemon aloko bulạupe, ente ona din hijukʼ lahare Isor birudre maraṅ bhiṅgṛạu hoyokʼa, ar uni nonosṭoren hopon, one okoe do maraokʼ reakʼ katha menakʼtae uniye sodorokʼa.

⁴Isor mementeakʼ cetʼko menakʼ onako sanamakʼ birudre ar sewa ocokʼ jotowakʼ birudreye teṅgokʼte uni do apnarte maraṅe udugokʼa; ar Isorakʼ mundilre duṛupʼkate acʼge Isor menteye udugokʼa.

⁵Iń do tinre ape ṭheniń tahẽkana unre noako kathageń lạiape kan tahẽkan, ona do cetʼ bape disạyeda?

⁶Uni nonosṭoren hopon jemon okte lahare aloe sodorokʼ onate okaṭakʼte ńitokʼe akoṭ ocoakan ona mape baḍaege. Ape do noa hõpe baḍae akada je, nonosṭoren hoponakʼ okoakʼ kạmiko do ńithõ calakʼ kangea,

⁷menkhan okoe uniye akoṭ dohoakade uni ạuriye ocogokʼ hạbicʼ akoṭetegeye tahena. Ar ona tayom do uni nonosṭoren hopone sodorokʼa.

⁸Probhu Jisu do acʼakʼ moca reakʼ sãhetʼteye maraoe utạrea ar acʼakʼ ṭhonokteye sodorokʼte uniakʼ daṛeye cabaetaea.

⁹Ar nonosṭoren hopone hijukʼre uni soṅgete Soetan reakʼ daṛe hõ tahena. Ona daṛe do joto lekan eṛe cinhạ ar hahaṛa ar daṛe kạmi hotete sodorokʼa.

¹⁰Ar nosṭokʼkan horte laha akan hoṛko bulạuko reakʼ joto lekan bulạuakʼ hotete, noko hoṛ doko maraokʼa, ente kại khon bańcao ńam lạgitʼ sạriakʼtetʼ do bako dulạṛ akada ar ataṅ hõ bako ataṅ akada.

¹¹Onate Isor do onko ṭhen nonkan mitʼṭen daṛeye kola onate bhul horteye idikoa, jemon eṛeakʼreko pạtiạukʼ.

¹²Ar okoe sạriakʼre pạtiạukʼ baṅkate behokakʼ kạmire rạskạko ńametʼkan onko sanamko uni doe bicạr dusikoa.

¹³Probhure dulạṛiạ boehako, ape ńutumte jaoge Isor gun manao joharae lek kantalea, ente kại khon bańcao ńam lạgitʼ Isor do pạhil khongeye bachao doho akatʼpea. Sonot Jiu hotete Isor lạgitʼe begar doho akatʼpete ar bhage sombat reakʼ sạriakʼre apeakʼ biswạs hotete kại khon bańcaope ńamakada.

¹⁴Ale oka bhage sombatle porcaretʼkan ona hotete bańcao ńam lạgitʼ uni doe hohoakatʼpea, jemon ape do aboren Probhu Jisu Mạsiakʼ ṭhonok reakʼ bhạgiạdarkope hoyokʼ.

¹⁵Onate E boehako, teṅgo ṭak akae tahenpe, ar aleakʼ ciṭhite se kathate okaṭakʼle lại cetʼ akawatʼpe ona sapʼ doho akae tahenpe.

¹⁶Aboren Probhu Jisu Mạsi ar Isor Baba do apeakʼ ontorreye udgạupema ar sanam bhage kạmi ar kathareye kajak ocopema.

¹⁷Unigeye dulạṛketʼ bona are dayawatʼbonte asambheṛ udgạu ar purạ rạskạ reakʼ ase dan akatʼ bona.