Read Santali 2 Thessalonikiko 3 Bible Online

2 Thessalonikiko 3 - Santali bible

2 Thessalonikiko 3

¹E boehako mucạtʼ katha do noage, ale lạgitʼ koejoṅpe cetʼleka Probhuakʼ katha ape talare usạra pasnaolen onkage ona do pasnao idikʼte ṭhonokokʼtege tahena.

²Arhõ koealepe jemon becol ar bạṛicʼ hoṛakʼ ti khon rukhiyạle ńam, ente sanamkoge biswạs menakʼtakoa ona do baṅa.

³Menkhan Probhu doe pạtiạrgea; unige ape doe kajak ocopea ar Soetanakʼ ti khone rukhiyạpea.

⁴Probhu tulucʼ jopoṛao menakʼpete ape reaṅ noa pạtiạu menakʼtalea je, ale okakole hukum akatʼpe ona lekagepe kạmi kana ar kạmi iditegepe tahena.

⁵Probhu do apeakʼ ontor Isorakʼ dulạṛ horte ar Mạsiakʼ sombhuri horteye ạyur iditapema.

⁶E boehako, aboren Probhu Jisu Mạsi ńutumte noale hukumape kana, judi jãhãe ḍhilisiliye colonetʼ khan ar ale ṭhen khon oka cecetʼakʼpe ńamakatʼ ona bae senakʼ kan khan, enḍekhan uni tulucʼ do alope helmelokʼa.

⁷Baḍaegeape cetʼlekate ale leka colon lek tapea mente. Ape talarele tahẽkan jokhecʼ ale do ḍhilisili bale colonleda,

⁸se begor damte okoeakʼ jomakʼ hõ bale jomleda. Ale do siń ńindạle mehnot akada arle kosṭo akana, jemon aperen bojhako alole hoyokʼ.

⁹Ape ṭhen khon goṛo ńam reakʼ ạidạri bạnukʼtale ona do baṅa, menkhan jemon ale lekape colon onate nonka kạmikatele udukʼatʼpe tahẽkana.

¹⁰Ape ṭhen tahẽkan jokhecʼgele hukumatʼpe tahẽkana, jãhãe kạmi baṅ sanayede khan uni do jom hõ aloe jomma.

¹¹Alele ańjomeda ape modre adomko do ḍhilisiliko coloneda, ar kạmige bako kạmikana, bickomko ajare baṛayeda.

¹²Aboren Probhu Jisu Mạsi iạte nonkan hoṛkole hukumako kana arle sikhạuetʼko kana, jemon onko do nindhạn monte kạmikate akoakʼ jomakʼ apnarteko jogaṛ joṅ.

¹³E boehako, bhageakʼ kạmi kạmite alope bhagaokʼa.

¹⁴Noa ciṭhire olakʼ aleakʼ katha jãhãe bae batao khan, enḍekhan uni do ńel oromkaepe. Ar uni tulucʼ ape do gate hõ alope gatekʼa jemone lajaokʼ.

¹⁵Menkhan uni do bạiri mente hõ alope hudisea, bickom boeha mente bujhạuaepe.

¹⁶Sulukren Probhu do acʼge sanam okte jotowakʼre suluke dan ape ma. Probhu do ape sanamko tulucʼe tahenma.

¹⁷Niạ johar katha do iń Pạulge apnarakʼ titeń oletʼkana. Ar noage ińakʼ mimitʼ ciṭhi reakʼ cinhạ do; ar nonkageń oletʼa.

¹⁸Aboren Probhu Jisu Mạsiakʼ daya ape sanamko tulucʼ baṛe tahenma.