Read Santali 1Timothi 3 Bible Online

1Timothi 3 - Santali bible

1Timothi 3

¹Noa katha do sạrikangea je, jãhãe manḍerren ạyuricʼ hoyokʼe menjoṅkan khan uni do mitʼṭen bhage kạmi lạgitʼgeye gagojokʼ kana.

²Onate manḍer ạyuricʼ do nonkanicʼ hoyokʼ jạruṛa jemon okoe hõ uni do aloko dusi daṛeae. Uniren do mitʼṭen erae tahentaema. Uni do sote ar apnarte sambṛaokʼicʼ ar bhage bud akel tahen jạruṛtaea. Uni do soṛa ar peṛayicʼ hoyokʼ jạruṛtaea. Ar eṭakʼko cetʼako reakʼ daṛe hõ tahen jạruṛtaea.

³Uni do ńu bulokʼicʼ ar dadalicʼ aloe hoyokʼma, jhogṛayicʼ ar ṭaka-poesa lalocicʼ hõ alo, bickom mạ̃hiranicʼe hoyokʼma.

⁴Uni do lek leka apnarakʼ gharońj reakʼ jotowakʼe ạyurma, uniren gidrạko do bataoko ar mạ̃hirankoko hoyokʼma.

⁵Jãhãe apnarakʼ gharońj calao bae baḍae khan uni do cekate Isorakʼ manḍer doe jotona?

⁶Manḍerren ạyuricʼ do nawa biswạsi hoṛ hõ alo jemone hoyokʼ, ente nawa biswạsicʼ do bạḍạiteye phulạukʼa ar Soetan reakʼ bicạrreye khańjo botecʼkokʼa.

⁷Bahre hoṛko ṭhen uniakʼ do bhage goha tahen jạruṛtaea, jemon durnamre ar Soetanakʼ jhạlire aloe ńurokʼ.

⁸Onkage sapʼdapʼko hõ manot ocokʼ lek jemonko hoyokʼ ar bar mocawanko leka do alo. Onko do ńu bulokʼko hõ jemon aloko hoyokʼma, ar laloc secʼ hõ alo jemonko ạwilokʼ.

⁹Onko do sapha bibekte jemon Mạsiakʼ dhorom biswạs reakʼ sạri okoakʼko sapʼ doho daṛeakʼ.

¹⁰Laharege biḍạu maṛaṅko hoyokʼa, ar inạ tayom bin dusạnko sạbudlen khan onko do sapʼ dapʼkoko hoedaṛeakʼa.

¹¹Onkage onkoren bạhuko hõ manot ocokʼ lekko hoyokʼma. Onko do eṭakʼkoakʼ aloko okta baṛaema ar apnar sambṛao akanko tahenma. Ar jotowakʼre jemon pạtiạrankoko hoyokʼ.

¹²Sapʼdapʼicʼren hõ mitʼṭen bạhui tahentae ma. Uni do acʼren gidrạko ar acʼakʼ gharońj mońjteye calao ma.

¹³Okoe sapʼdapʼicʼ bhageye kạmikan uni do manote ńama ar Jisu Mạsire pạtiạu iạte uniakʼ ontor do dilte perejokʼtaea.

¹⁴Iń do asiń dohoyeda, usạrage am ṭheniń sen daṛeakʼa. Menkhan jãhãnakʼ iạteń bilom botejokʼ onate am ṭhen noakoń oleda, jemon am hõm baḍae daṛeakʼ Isorakʼ gharońjren hoṛkoakʼ do cetʼ leka colon lek takoa mente. Ar noa gharońj do hoyokʼ kana jiwetʼ Isorakʼ manḍer, one okaṭakʼ do tham-khunṭi ar rehetʼ leka Isorakʼ sạriakʼe sapʼ dohoyetʼkan.

¹⁶Isor bhokti reakʼ sạri okoakʼ je maraṅge ona do jotokogeko aṅgoca. Ona sạritetʼ do noage, Uni do manwa lekateye sodorena; ar Jiureye dhorom ocoyena; serma goḍet do uniko ńelledea; sanam jạtko ṭhen uni reaṅ porcarlena; dhạrtiren hoṛko do unireko pạtiạuena; ar serma ṭhonokre uni doe rakapʼ ocoyena.