Read Santali 1Timothi 5 Bible Online

1Timothi 5 - Santali bible

1Timothi 5

¹Haṛam hoṛko dos udukʼakore ãṭ kathate alope metakoa; bickom baba leka ạjijakope. Ar juạnko do aperen boehako leka bujhạukope.

²Buḍhi hoṛko do gogo leka, ar kom umerren maejiuko do miserako leka napaete bujhạukope.

³Okoe rạnḍi maejiuren celege bạnukʼko onko tojbijkope.

⁴Menkhan jãhãe rạnḍi maejiuren gidrạ se goṛom gidrạko tahen khan onko gidrạko se goṛom gidrạkoge pạhilte jemon apan apin gharońjre Isor bhoktiko udugma. Nonkate onko do eṅgat-apat se baba haṛamkoakʼ dulạṛ reakʼ rinko hala ruạṛ daṛeakʼa, ar noatege Isor doe kusikʼa.

⁵Okoe rạnḍi maejiuren celege bạnukʼko uni do Isor ṭhen bhorsa akan ar siń sạṭupʼ koejoṅ ar nehõrakane tahenkana.

⁶Menkhan okoe rạnḍi maejiu acʼakʼ kusi leka jione khemaoetʼkan uni do jiwetʼ menaere hõ gocʼicʼ lekae hoeakana.

⁷Onko do noako babotre hukumakope jemon okoe hõ aloko dusi daṛeako.

⁸Okoe acʼren peṛako, asokaete apnar gharońjrenko bae ńel jutko uni do biswạse baṅ akada; ar bepạtiạuicʼ khon hoe bạṛicʼgea.

⁹Rạnḍi maejiu do pe isi bochore parom akatʼ khan ar mitʼ herelrege jãwãe akane tahẽkana mente baḍaelen khan enḍekhan uni do tạlikare ńutume ol caṛhao ocoetaema.

¹⁰Ona chaḍa bhage kạmire uniakʼ ńutum do tahen hoyokʼtaea. Ona bhage kạmiko modre gidrạ ạsul harako, bidesiạko peṛa sãohãko, sonot hoṛkoakʼ jaṅga ạbuktako, dukokʼko sohotʼko ar sanam lekan bhage kạmire uni do lạgiạ paṛao akae jemone tahen.

¹¹Kom umerren rạnḍi maejiuko do alope ol caṛhaokoa, ente tinre hoṛmo reakʼ jala rakapʼakoa unre Mạsi bako botoraete, jãwãeyokʼgeko khoja.

¹²Noate onko do lahateakʼ gokʼakʼ rạputʼkate akore sạjạiko ạgujoṅa.

¹³Ona chaḍa onko do oṛakʼ oṛakʼko ajare baṛaete kuṛhnikʼko ceda. Eken kuṛhnikʼko ceda ona do baṅ, menkhan nilạjiạ katha ar eṭakʼkoakʼko oktawa ar baṅ ganoakʼ kathakoko roṛa.

¹⁴Onate iń do noań hukumape kana, kom umerren rạnḍi maejiu doko baplakʼma, arko gidrạ eṅgatokʼma, apan ạpin gharońjko ńel todarotma ar teṅgo daramicʼe oktae reakʼ jãhãn dão aloko emaema.

¹⁵Ente adom adom rạnḍi maejiuko do ńitrege Soetanakʼ hor secʼko ghańjeṛ akana.

¹⁶Mạsire biswạs akan jãhãe maejiuakʼ oṛakʼre rạnḍi maejiuko tahen khan unige onko maejiukoe ńel todarotko ma. Noko rạnḍi maejiuakʼ dạyik do manḍerre alo paṛaokʼma, menkhan okoe rạnḍi maejiuren celege bạnukʼko manḍer do onkoe ńel todarotkoma.

¹⁷Manḍerren maraṅ mukhiyạko okoe bes okocʼte manḍerko calaoetʼkan, ar okoe do Isorakʼ kathako porcaretʼkan ar lại cecetʼreko mehnotetʼkan, onko do dobṛa manot ocokʼ lek kanako.

¹⁸Sonot sostore meneda, “Phosol enokʼ jokhecʼ ḍaṅgra do moca alom toltaea.” Arhõ olakana, “Kạmiyicʼ do acʼakʼ kuṛại ńam lek kanae.”

¹⁹Bar se pe hoṛakʼ goha begorte manḍerren jãhãe mukhiyạ birudre jãhãn dos reakʼ katha alom luturakʼa.

²⁰Okoe mukhiyạko kạkạitegeko tahen onko do manḍerren sanam hoṛko samaṅre nisṛạukom jemon eṭakʼ mukhiyạko hõ botor tahentako.

²¹Isor ar Jisu Mạsi ar bachao akan serma goḍetko samaṅreń kạjiạ̃uetʼme kana, okoe secʼ hõ baṅkate noako kạmime ar mẽtʼãhã beṅgetʼakʼte cetʼ hõ alom kạmiya.

²²Usạrate okoe cetanre hõ ti capokate jãhãn hudạre alom bahalea, ar eṭakʼkoakʼ kạikore hõ alom bhạgiạrikʼa, ar napaete tahenme.

²³Ghane ghanem nijorokʼkante hajam lạgitʼ thoṛa thoṛate darkha rasa ńũiyme, ar eken dakʼ do alom ńũiya.

²⁴Adom adom hoṛakʼ kại do nunạkʼ sodorgea je, ona reakʼ bicạr do laharege hoeakana. Arhõ adom adom hoṛ do kạiye pańja idiyetʼkoa.

²⁵Onkaleka bhage kạmiko do pusṭạute sodorgea; ar okako eṭakʼ lekateakʼ kan, onako hõ danaṅ do baṅ tahena.