Read Santali 2Timothi 4 Bible Online

2Timothi 4 - Santali bible

2Timothi 4

¹Mạsire ruạṛ hijukʼ ar uniakʼ raj reaṅ disạ dohoete Isor samaṅre, okoe do jiwetʼko ar gocʼkoe bicạrko uni Jisu Mạsi samaṅre iń do noań hukumam kana.

²Isorakʼ katha lại jạhirme; batarre ar bin batarre, am do jao okte lại jạhir lạgitʼ sapṛao akae tahenme; ạḍi sobori salakʼ cetʼakote hoṛkoakʼ dosko udukʼakome, onko sontorkom ar sopolha emakom.

³Nonkan okteko hijukʼa tinre hoṛko do sạriakʼ reakʼ sikhnạt bako sahaoa, bickom akoakʼ sana purạu lạgitʼ nonkan aema gurukoko ḍạṅjoṅa okoe do onko kusi ocoko leka sikhnạtko emokʼ.

⁴Onko do Isorakʼ sạriakʼtetʼ reaṅ ańjom baṅkate kạhniko kusiyakʼa.

⁵Menkhan am do sanamakʼre sambṛao akae tahenme, duk sahaome ar Mạsi reaṅ bhage sombat porcarme, ar Isor okako kạmiye emakatʼme ona purạume.

⁶Ente iń do ńit hoń coḍor ocokʼ kana; ar ińakʼ gujukʼ somoe do seṭer akana.

⁷Bhage lạṛhại iń lạṛhại kana, iń lạgitʼ ṭhik akatʼ horre mucạtʼ hạbicʼ iń ńir calao akana ar Mạsiakʼ dhorom biswạsiń sapʼ dohoakada.

⁸Onate iń lạgitʼ dhorom reakʼ jit ṭupri dohoakana. Bicạr dinre dhorom bicạricʼ Probhu do ona kuṛại lekate jit reakʼ malae danạńạ. Ar eken iń eskargeye danạńạ ona do baṅ, menkhan okoe soborikate uniakʼ ruạṛ hijukʼ reakʼko koyokʼ horakatʼ onko sanamkoe danakoa.

⁹Am do kurumuṭuime, jemon hakopako iń ṭhenem hecʼ daṛeakʼ,

¹⁰ente Demas do nonḍenakʼ dhạrtiye dulạṛetʼkante iń bạgikate Thessolonikiteye calaoena. Ona chaḍa Kreskes do Galatiạteye calaoena ar Titus do Dalmatiạte;

¹¹Eken Luk eskarge iń soṅgere menaea. Am do Mark soṅgekate ạgu darayem, ente ińakʼ kạmi lạgitʼ uniakʼ do ạḍi jạruṛ menakʼa.

¹²Tikhikus do Ephesusteń kolkedea.

¹³Troasre Karpos ṭhen hoṛmo reakʼ okaṭakʼ kicricʼ iń hiṛiń oṭowatʼ tahẽkan, hijukʼ jokhecʼ ona baṛe ạgu daraeme. Ona chaḍa guṛhe dohoakan puthiko, biseskaete hartare olakʼ, onako soṅge daraeme.

¹⁴Okoe Aleksander do tama reakʼe kạmikan uni do ińakʼ ạḍiye loksan akada. Uni okaṭakʼe ceka akatʼ ona do Probhugeye halawaea.

¹⁵Am hõ uni khon sontorakae tahenme, ente uni do aleakʼ kathako ạḍiye tạkicʼ darametʼ tahẽkana.

¹⁶Pạhil dhaoiń bicạr ocolenre okoe hõ bako goṛo ạdiń tahẽkana, bickom sanamkogeko bạgi giḍiwạdiń tahẽkana; ona do alo baṛe lekhakʼtako ma.

¹⁷Menkhan Probhu do iń sãoteye tahẽkana ar daṛeye dan ạdiń tahẽkana. Onate iń do purạte bhage sombatiń porcar daṛeakʼ tahẽkana ar sanam boṅgan hoṛ jạtrenkoko ańjomleda. Isor do dhạcri kulakʼ moca khone rukhiyạledińạ.

¹⁸Probhu do sanam bạṛicʼakʼ kạmi khone rukhiyạyińạ ar acʼakʼ serma rajreye idi seṭerińạ. Uniakʼge ṭhonok hoyokʼtaema jug cetan jug. Amen.

¹⁹Priskạ ar Ạkuilạtekin ar Onesiphoros gharońjrenko ińakʼ johar emakom.

²⁰Erastus do Korinthreye tahẽyena, menkhan Trophimus do Miletusre ruạkʼgeń bạgi oṭoadea.

²¹Am do kurumuṭuime rabaṅ din ạurire jemon nonḍem hecʼ daṛeakʼ. Eubulus ar Pudens ar Linus ar Klaudiạ ar joto boehakoko joharam kana.

²²Probhu do am tulucʼ baṛeye tahenma. Isorakʼ daya ape tulucʼ tahẽakan tahenma.