Read Santali Titus lạgitʼ Pạul Apostolakʼ ciṭhi 1 Bible Online

Titus lạgitʼ Pạul Apostolakʼ ciṭhi 1 - Santali bible

Titus lạgitʼ Pạul Apostolakʼ ciṭhi 1

¹Iń Pạul do Isorren golam ar Jisu Mạsiren mitʼṭen apostoliń hoeakana, jemon Isorre bachao hoṛko biswạs reakʼ horteń ạgu daṛeako, ar Isor bhokti sãote oka sạriakʼtetʼ menakʼ ona baḍae lạgitʼ iń goṛo daṛeako.

²Iń do jaejug jion ńam reakʼ aste Mạsiń sewawae kana. Dhạrti ạuri sirjạure bin eṛeyicʼ Isor do noa jion imạń reakʼe gokʼ akawạdińa.

³Aboren babańcaoicʼ Isorakʼ hukum leka okań lại jạhiretʼkan ona hotete Isor do acʼakʼ katha ṭhik okteregeye sodor akada.

⁴Mạsire biswạs iạte okoe iń tulucʼe mitʼakan, uni ińren sạriạkʼren hopon Titus ṭhen noa ciṭhiń oleda. Isor Baba ar aboren babańcaoicʼ Jisu Mạsi do daya ar suluke dan apema.

⁵Kret dipre okaṭakʼ kạmi ńit hõ ạuri sạtokʼ ona sạt lạgitʼge iń do amiń doho oṭoakatʼmea. Ar ińiń hukum akatʼme leka mitʼke mitʼ nagraha reakʼ manḍerkore maraṅ mukhiyạko kạmire bahalkom.

⁶Manḍerren maraṅ mukhiyạ do nonkanicʼ hoyokʼ jạruṛaea jemon uni do okoe hõ aloko dusi daṛeae. Uniren do eken mitʼṭen erae tahen ma. Uniren gidrạko do Mạsire biswạsiko hoyokʼ ma, onko do akoakʼ kusi sana leka aloko colon ma ar bebataoko aloko hoyokʼma.

⁷Isor ṭhen khon dạyike ńamakatʼ manḍer ạyuricʼ lekate nonka hoyokʼ jạruṛtaea jemon uni do okoe hõ aloko neṅghaoe. Uni do ḍiṭhạ̃uicʼ do alo, edre godokʼicʼ hõ alo, ńu bulokʼicʼ hõ alo, dalalicʼ hõ alo, lalocikʼ hõ aloe hoyokʼma.

⁸Menkhan uni do peṛayicʼ, bhageakʼ dulạṛicʼ, akelanicʼ, dhoromicʼ, sonoticʼ, ar sambṛaokʼicʼe hoyokʼma.

⁹Isorakʼ pạtiạr katha, okaṭakʼ iń cetʼ akawade, ona do kajakte sapʼ dohoe jạruṛaea, jemon sạriakʼ sikhnạt reaṅe porcar daṛeakʼ ar okoe ona birudreko teṅgokʼ onko jemon bhulkoe udukʼ daṛeako.

¹⁰Nonkan ḍher hoṛ menakʼkoa okoe do bin gobol ar bokbokaokʼ arko bulạukokan. Okoe do khatnakʼre jorko emetʼkan, iń do nonkanko hoṛakʼ kathageń meneda.

¹¹Noko hoṛkoakʼ moca do tubetʼkatako jạruṛa, ente lab joṅ lạgitʼ baṅ ganokʼakʼko cetʼako kana; ar nonkate onko do gharońjkoko ạulạueda.

¹²Onko modren mitʼṭen nạbi do noa kathae meneda, “Kret dipren hoṛko doko eṛegea, bir janwar lekanako, asaṅpoḍa arko lebṛagea.”

¹³Ona goha do sạrigea. Onate ạḍi ajhaṭte onkoakʼ dosko udukʼakome jemon onko do dhorom biswạsre ṭhik lekako sapʼ doho akae tahen,

¹⁴ar Jihudikoakʼ kạhniko ar sạriakʼko dea giḍiakatʼ hoṛkoakʼ hukum aloko hetawakʼ ma.

¹⁵Okoeakʼ ontor napaege onko ṭhen do jotowakʼge napaegea, menkhan okoeakʼ ontor bạṛicʼ ar bepạtiạrge onko ṭhen cetʼge napaeakʼ do bạnukʼanaṅ, ente onkoakʼ mon ar bibek do mạilạgetakoa.

¹⁶Onko do Isorko baḍaeyede kana menteko lạiyạgokʼ kana, menkhan akoakʼ kạmi hotete uni doko baṅekana. Onko do hirkhạ ocokʼko ar bebataoko kanako ar sanam bhage kạmi lạgitʼ doko okạjuạgea.