Read Santali Titus lạgitʼ Pạul Apostolakʼ ciṭhi 2 Bible Online

Titus lạgitʼ Pạul Apostolakʼ ciṭhi 2 - Santali bible

Titus lạgitʼ Pạul Apostolakʼ ciṭhi 2

¹Am do nonka cetʼakome jemon amakʼ katha tulucʼ sạri cecetʼakʼ reakʼ juri tahen.

²Haṛam hoṛ do jotowakʼre soteko tahen ma; ar manot ńam lekko hoyokʼma; onko do bhage akelanko, sạri pạtiạu, dulạṛ ar sombhuri mon tahentako.

³Onkage buḍhikohõ Isor bhoktikoko hoyokʼma ar bhage sikhnạtkoko emokʼma. Ente eṭakʼko oktawako ar ńu bulokʼ do lek baṅkan takoa.

⁴Enḍekhan juạn maejiukoko lại cetʼ daṛeakoa jemon onko do akoren jãwãetetʼ ar gidrạkoko dulạṛko,

⁵ar apnartetʼko sambṛaokʼma, napaeko tahenma, gharońjko disạima, dayakʼkoko hoyokʼma ar jãwãe gobolreko tahenma, jemon okoe hõ Isorakʼ katha aloko bemanot.

⁶Onkage juạnko hõ hukumakome jemon apnartetʼko sambṛaokʼ.

⁷Sanamakʼrege am do onko ṭhen bhage kạmi reakʼ nạmuna hoyokʼme. Amakʼ cecetʼakʼre bạṛicʼ monsubạ ar baṅ moneakʼ mon jemon alo tahen.

⁸Okoe hõ aloko dusạu daṛeam onate onkan sạri cecetʼakʼ emokʼme, jemon am birudren hoṛko do lajaoreko paṛaokʼ, ente abon reaṅ bạṛicʼ roṛ reakʼ do cetʼge baṅ tahentakoa.

⁹Golamko sikhạu paṛhaokom jemon akoren nij kisạ̃ṛko ṭhen gobol akanko tahen, sanamakʼre kusi ocoko salakʼ, ar aloko ṭenḍosokʼma,

¹⁰kisạ̃ṛkoakʼ jinisko aloko kombṛoema, bickom sanamakʼre pạtiạr kanako menteko sạbudokʼma, jemon aboren babańcaoicʼ Isorakʼ oka cecetʼakʼ menakʼ ona joto secʼ khon mońj okocʼteko benao rakabokʼ.

¹¹Isorakʼ oka daya hotete kại khon bańcao ńamokʼ ona do sanam manwako ṭhenge sodor akana.

¹²Noa dayage aboye cetʼabon kana jemon Isor bebhokti ar dhạrti reakʼ lalockobon baṅakʼte nahakʼ jugre apnar bon sambṛaokʼte Isor bhokti salakʼ dhorom jion bon khemao,

¹³ar aboren maraṅ Isor ar babańcaoicʼ Jisu Mạsiakʼ ṭhonok reakʼ sodorokʼ do rạskạte bon ńelhor akae tahen.

¹⁴Jisu Mạsi do abo lạgitʼ acʼakʼ jiwiye emkeda, jemon sanam kạiko khone chaḍao bon ar onate nonkan mitʼṭen jạte saphakote eken acʼrengeko hoyokʼte eṭakʼko bhạlại lạgitʼko ahkaokʼ.

¹⁵Onate am do purạ ektiạri salakʼ noako reaṅ sikhạu paṛhaokom, sopolha emakom ar dosko udukʼakome. Ar am do okoe hõ alo jemonko neṅghaome.