Read Santali Ibriko 11 Bible Online

Ibriko 11 - Santali bible

Ibriko 11

¹Okaṭakʼ ńama mentebon as akan ona dobon ńamgea ar ona reakʼ khạṭitetʼ do hoyokʼ kana pạtiạu. Ar ona pạtiạu hotete purạ puri bon bujhạu daṛeakʼa je, okaṭakʼ babon ńel ńametʼkan ona do sạrige menakʼgea mente.

²Biswạs iạtege aboren hapṛamko do Isorakʼ sarhaoko ńamleda.

³Ar biswạs hotetege bon bujhạu daṛeakʼ kana je, Isorakʼ moca reakʼ kathate noa dhạrti do sirjạulena. Onate bujhạukʼ kana, abo okaṭakʼ bon ńel ńametʼkan ona do jãhãn ńelakʼ jinis khon do baṅ sirjạu akana.

⁴Biswạs iạtege Kạin khon Abelakʼ dãṛẽ do Isor samaṅre arhõ bhageakʼ tahẽkana. Biswạs iạtege Isor do uniakʼ dãṛẽ aṅgockate uni reaṅ noa gohae emleda je, uni doe dhoromgea mente. Abele gocʼakanre hõ enhõ uniakʼ biswạs hotetege uni do ńit hõ kathae roṛeda.

⁵Biswạs iạtege Enok do bae gocʼlena; uni do sermateye rakapʼ ocoakana. Isor do uniye idiakade iạte bae sendra ńamlena. Enok idiye lahare Isor do noa gohae emleda je, Enok do uniye kusi ocoakadea.

⁶Biswạs begorte Isor kusi ocoye do baṅ hoedaṛeakʼa, ente Isor ṭhen okoeye calakʼ, uni do biswạsokʼ hoyokʼtaea je, Isor menaea ar uniakʼ katha leka calakʼko do uniakʼ ti khon kuṛạiko ńama.

⁷Okaṭakʼ do unrehõ baṅ ńṭoṭhan tahẽkan, ona reaṅ Isor do Noahae sontorledea. Noah do Isor bhokti hoṛe tahẽkante Isorakʼ kathare biswạskate mitʼṭen jahaje benaoleda, jemon acʼakʼ gharońjrenko rukhiyạko ńam. Noah do acʼakʼ biswạs hotetege dhạrtirenko dusi menteye sạbudletʼkoa ar Isor ṭhen dhorom mente ataṅokʼ reakʼ ạidạriye ńamleda, one oka do eken biswạs hotetege ńamokʼkan.

⁸Isor do Abrahame hohoade tahẽkanre biswạs iạtege Isorakʼ kathareye gobolena ar ạidạṛi lekate okaṭakʼ jaega ńam reakʼ katha tahẽkantae ona jaegateye calaolena. Unre bae bujhạu akatʼ tahẽkana okateye calakʼkana mente ar enhõ uni doe monḍhalena.

⁹Isor do okaṭakʼ disạm Abraham emae lạgitʼe gokʼade tahẽkana uni do biswạs iạtege bedisiạ hoṛ lekate onḍeye berelena. Ar uni sãote okoe do inạ mitʼ gokʼakʼren bhor reakʼ bhạgiạdarko tahẽkan Isạhak ar Jakob leka uni hõ tạmbukoreye ḍerakʼkan tahẽkana;

¹⁰ente oka nagraha tahẽ utạrokʼ uni do ona nagraha reakʼ koyokʼ horreye tahẽkana. Ona nagraha reakʼ noksa ar gathao rakab reakʼ kạmi do Isorgeye kạmiakada.

¹¹Sara do gidrạ hoyokʼ reakʼ umer parom calaolentaere hõ biswạs iạtegeye bhạrti hoṛmolena, ente uni do biswạs tahẽkantaea, okoeye gokʼakawade uni doe pạtiạrgea mente.

¹²Onate umer secʼte gocʼ barag hoṛmo hoekatere hõ Abraham do sermaren ipil leka ar jalapuri aṛe reakʼ gitil leka ạḍi utạr gidrạkoren apate hoelena.

¹³Noko hoṛko do pạtiạu talate jion khemao kateko gocʼena. Isor okaṭakʼ emokʼ reakʼe gokʼatʼko tahẽkan ona do bako ńamleda, menkhan sạṅgiń khon onako ńelleda ar kusi hõko kusiyada. Noa dhạrtire bedisiạ ar upriạ lekako tahẽkan ona doko aṅgocletʼgea.

¹⁴Okoe onako aṅgocketʼ onko do pusṭạuteko bujhạu ocoyeda je, onko do ako lạgitʼ mitʼṭen disạmko ńam baṛakana.

¹⁵Ar oka disạm khonko oḍok hecʼlen ona disạmko uihạr ruạṛ lekhan, enḍekhan ona disạm ruạṛ calakʼ reakʼ joto ạtgeko ńamkea.

¹⁶Menkhan onko do arhõ bhage mitʼṭen disạm reakʼ, metakʼme jion puri reakʼko ńam baṛayetʼkan tahẽkana. Ona iạte Isor acʼtetʼ do onkoren Isor mente ńumogokʼ bae lajaokʼ kana, ente uni do onko lạgitʼge mitʼṭen nagrahae tear akatʼ tahẽkana.

¹⁷Abraham do biḍạu ocokʼ jokhecʼ Isorre pạtiạu iạtege Isahak doe samaṅledea. Okoe ṭhen Isore gokʼ akatʼ tahẽkan unige acʼren sadher hopon dãṛẽye lạgitʼe samaṅedekan tahẽkana.

¹⁸Nuige uni hopon do one okoe reaṅ Isore menakatʼ, “Isạhakren bõsge amren bõs menteko lekhakʼa.”

¹⁹Abraham do uni dãṛẽye lạgitʼe rạjiyena, ente uni doe pạtiạukʼkan tahẽkana Isor do gocʼko hõe jiwetʼ beretʼ daṛeakoa mente. Ar gujukʼ duạr khon Abraham do Isạhake ńam ruạṛkedea.

²⁰Biswạstege Isạhak do tayom daramakʼko reaṅ Jakob ar Esaue bhoratʼkin tahẽkana.

²¹Biswạs iạtege Jakob do gujukʼ jokhecʼ Joshepren banar hopone bhoratʼkin tahẽkana ar ṭheṅgare tirupʼkate Isore sewawade tahẽkana.

²²Biswạs iạtege Jakob do gujukʼ jokhecʼ Misor disạm khon Israelko oḍok calakʼ reakʼ kathae metatʼko tahẽkana ar acʼakʼ mạ̃ṛĩ cekae hoyokʼa mente ona hõe lạiatʼko tahẽkana.

²³Moseakʼ janam tayom uniren eṅgat-apat do biswạs iạtege pe cando kin oko doholede tahẽkana, ente onkin dokin ńelkeda, gidrạ do ńelokʼteye mońjgea ar onate raj reakʼ hukum hõ bạkin botorada.

²⁴Biswạs iạtege Mose doe sẽṛãyen khan, Pharao hoponeratren hoponko hohoae do bae khojkan tahẽkana.

²⁵Uni do thoṛa din lạgitʼ kại reakʼ rạskạ bạgikate Isorren hoṛko sãote duk jojomgeye bachaoana.

²⁶Uni do Misor reakʼ dhon durib khon Mạsi ńutumteakʼ opomange ạḍi bạ̃ṛtiye moneada, ente uni do kuṛại secʼe beṅgetʼ akatʼ tahẽkana.

²⁷Isor cetanre biswạs iạtege uni do raj begor botoraete Misor disạme bạgiatʼ tahẽkana, ente baṅ ńelokʼicʼ ńelekan lekae sumbhrạukeda.

²⁸Uni do biswạs iạtege sen-parom porob ar mãyãm chiṭạu reakʼ niạme manaoleda, jemon nonosṭoyicʼ goḍet do pạhil janamkoe gocʼlekore Israelrenko jemon aloe joṭetʼko.

²⁹Biswạstege Israelko do rohoṛ ot leka Arakʼ jalapuriko taṛam paromleda menkhan Misriko do paromokʼ jokhecʼko unum gocʼena.

³⁰Biswạs iạtege Israelko do eae din hạbicʼ Jerikho nagraha reakʼ pạcri beṛhaeteko dãṛã ạcurketʼ khan ona do bhindạṛena.

³¹Biswạs iạtege Rahab kusmbi do Jerikho nagrahareko tahẽkan bebatao hoṛko sãote bae nosṭolena, ente uni do unkin disạm ciyạkin peṛa lekae ataṅ aderletʼkinạ.

³²Noa khon bạ̃ṛti do ar cetʼ iń lạiya? Gideon, Barak, Samson, Jeptha, Dạud, Sạmuel ar nạbikoakʼ katha galmarao lạgitʼ ińakʼ somoe do bạnukʼa.

³³Biswạs hotetege onko do rajosṭiko jitạuleda, hok reakʼko bicạrleda, Isorakʼ gokʼakʼko ńamleda, dhạcri kulkoakʼ mocako bondletʼa,

³⁴ar jolokʼ seṅgel reakʼ daṛeko nimbhạuleda, tarwaṛe khonko rukhiyạlena, nijor khonko daṛe ocolena, lạṛhạire daṛeko udukʼleda ar bidisiạ palṭonkoko laga ńirletʼkoa.

³⁵Maejiuko do akoren gocʼ hoṛko arhõ jiwetʼgeko ńam ruạṛketʼkoa. Eṭakʼko do akotege hajot khon baṅ chaḍaokʼteko santao ocolena, jemon onko do gocʼko khon beretʼkate artetʼ mońj jionko ạidạri joṅ.

³⁶Arhõ eṭakʼko do cigạri arko dal ur ocoyena, hẽ biṛikoteko tol ocolena ar hajot hõko hajot ocolena.

³⁷Dhiriteko tiń ocoyena, ạriteko getʼ paṛakʼ ocoyena ar tarwaṛeteko gocʼ ocoyena. Onko doko santao ocolena ar bạṛicʼko beohar ocolena, ar akoṭreko paṛaoen khan bhiḍi ar meromakʼ harta horokʼkateko ạcur baṛaekan tahẽkana.

³⁸Onko do hahaṅkarkore, burukore, danderkore ar khorloṅkoreko ńir oko baṛaekan tahẽkana. Noko hoṛko jaega emako reakʼ lek noa dhạrti reakʼ do baṅ tahẽkana.

³⁹Biswạs iạtege onko sanamkogeko sarhao ocolena, menkhan Isor okaṭakʼ emako lạgitʼe gokʼletʼ tahẽkan ona do bako ńamlakʼa;

⁴⁰ente Isor do abon lạgitʼ arhõ mońjakʼe ṭhik dohoakatʼ tahẽkana. Uni doe ṭhik doholeda je, abo begorte onko do ohoko sạbit utạr ocolena.