Read Santali Ibriko 13 Bible Online

Ibriko 13 - Santali bible

Ibriko 13

¹Ape mimitʼko boeha leka dupulạṛpe.

²Ar peṛakʼ do alope hiṛińa; adom adomko do begor baḍaetege serma goḍetkoko peṛaletʼkoa.

³Okoe hajotre menakʼko onko sãote ape hõpe kạidi oco akana, ar khed ocokʼkanko sãote ape hõpe khed ocokʼkana mente hudiskate onkoakʼ katha disạipe.

⁴Sanamkoge bapla do manot salakʼko beṅgetʼakʼma. Jãwãe ar bạhu talare bapla tonol do sonot dohoe lek kana, ente jãhãlekan laṭghaṭge, ar jãhãe ona dusireko dusige khan Isor do onkoe sạjạikogea.

⁵Ṭaka-poesa reakʼ laloc khon sahaṛakae tahenpe. Apeakʼ oka menakʼtape onatege dhirpur akae tahenpe. Isore meneda, “Iń do tishõ bạń alaomea ar tishõ bạń giḍimea.”

⁶Onate abo do dilkate bon men daṛeakʼa, Probhu do ińren goṛoyicʼ, iń do bạń botorokʼa; manwa do cetʼko cekayińạ?

⁷Okoe ape ṭhen Isorakʼ kathako lại jạhirletʼ tahẽkan, onko mukhiyạkoakʼ kathako disạipe. Onkoakʼ jion cạrit reakʼ mucạtʼ jo mońjte beṅgetʼakʼpe ar onko leka biswạs dohoepe.

⁸Jisu Mạsi do hola cetʼlekae tahẽkan, teheń hõ onkage menaea ar jaejug hạbicʼ hõ onkageye tahena.

⁹Aema lekan nawa nawa cecetʼakʼte bhul horte jemon aloko bulạu idipe. Aboakʼ mon do dãṛẽ samaṅ akatʼ jomakʼre tahẽ baṅkate Isorakʼ dayare jemon kajakte ṭarhao akae tahen. Okoe ona jomakʼreko ṭehãḍokʼkan tahẽkan, onko do ona jomakʼ khon jãhãn porho baṅ hoelentakoa.

¹⁰Aboakʼ do mitʼṭen pinḍ menakʼa ar okoe Israelkoakʼ ona sewa tạmbureko kạmikan, onko do aboakʼ pinḍ cetanre samaṅ akatʼ jãhãnakʼge jojom reakʼ ạidạri bạnukʼtakoa.

¹¹Kại ńutumte dãṛẽ samaṅ akatʼ janwarakʼ mãyãmante Israelren maraṅ naeke do sonot utạrakʼ jaegateye calakʼkan tahẽkana, menkhan janwarkoakʼ hoṛmo do Israelkoakʼ tahen jaega khon bahrete idikateko rapakʼ giḍikakʼkan tahẽkana.

¹²Onkage Jisu hõ Jerusalem nagraha bahrere duk jomkateye gocʼlena, jemon acʼakʼ mãyãm hotete manwako kại khone chaḍaoko.

¹³Onate dela bon, uniakʼ opomanbon gogte nagraha bahre uni ṭhen bon calakʼma,

¹⁴ente nonḍe do jaejug hạbicʼ jãhãn nagraha bạnukʼ tabona; menkhan okaṭakʼ nagraha daraekan ona lạgitʼ bon koyokʼ horakada.

¹⁵Onate delabon, Mạsi hotete Isor ṭhen sarhao reakʼ samaṅokʼakʼ jaoge bon samaṅma, metakʼme Isorren hoṛ mente okoe apnarteko aṅgocetʼkan onko do akoakʼ mocate Isorko gun manao joharae ma.

¹⁶Bhage kạmi lạgitʼ ar eṭakʼko reṅgejokʼre bhạlạiko reakʼ do alope hiṛińa, ente Isor do nonkan dãṛẽgeye kusiyakʼa.

¹⁷Aperen ạyurkoakʼ katha bataope ar onko gobolre tahenpe, ente okoe Isor ṭhen lekha jokhako em, onkan hoṛ lekatege coṅ onko ma apeko ńel todarotetʼpe kan. Onko ṭhen gobolokʼpe jemon onko do akoakʼ kạmi rạskạ salakʼko kạmi daṛeakʼ, menkhan duk salakʼ do baṅ. Ar duk salakʼge ona onkae hoyokʼ khan, enḍekhan onate apeakʼ do cetʼ porho hõ baṅ hoyokʼtapea.

¹⁸Ale lạgitʼ koejoṅpe. Sanamakʼkore dhorom lekate senokʼle menjoṅkan iạtele baḍaekana je, aleakʼ bibek do napaegetalea mente.

¹⁹Menkhan iń do apeko artetʼ bạ̃ṛti koejoṅ lạgitʼ iń nehõrape kana, jemon usạrate arhõ ape sãoteń ńepel ńapam daṛeakʼ.

²⁰Oka mãyãmte sulukren Isorakʼ jaejug bondobos doho akan ona hotete Isor do aboren Probhu Jisu Mạsi, metakʼme bhiḍikoren maraṅ gupiyicʼ do gocʼko khone jiwetʼ beretʼkedea.

²¹Okaṭakʼ bhageakʼ kan onate uni do acʼakʼ monejoṅ leka calakʼ lạgitʼ apeko purạteye sạbit utạrpe ma. Uniakʼ mẽtʼãhã samaṅre okaṭakʼ bhageakʼkan Jisu Mạsi hotete aboakʼ ontorre uni do onageye kạmi ma. Jaejug hạbicʼ Isorakʼ ṭhonokʼ hoyokʼtae ma. Amen.

²²E boehako, ape ṭhen ińakʼ bạ̃ṛti nehõr do noage je, ińakʼ noa sikhạuna kathako do bataotińpe. Ar ape ṭhen bạ̃ṛti katha do bạń oletʼkana.

²³Iń do baḍae ocope sanayediń kana je, aboren boeha Timothi do khalase ńamakada. Are hecʼlen khan iń do uni soṅgekateń hiripea.

²⁴Aperen sanam ạyurko ar Isorren sanam hoṛko aboakʼ johar emakope. Itạliạ disạmren Isorren hoṛko do apeko joharape kana.

²⁵Ape sanamko tulucʼ Isorakʼ daya baṛe tahenma.