Read Santali Ibriko 9 Bible Online

Ibriko 9 - Santali bible

Ibriko 9

¹Isorakʼ dewa sewae lạgitʼ pạhilakʼ bondobosre mitʼ bar goṭecʼ ạn-ạriko em hoelena, ar noa dhạrtire sewae lạgitʼ mitʼṭen jaega reakʼ katha hõ onare tahẽkana.

²Ar ona lekatege mitʼṭen tạmbu do benao hoelena. Ona tạbmu reakʼ pạhil hạṭińre tahẽkana diuhe dohowakʼ ar mej ar samaṅakʼ piṭhạ. Noa pạhil hạṭiń reakʼ ńutum do tahẽkana sonot jaega.

³Dosarakʼ orwal tayomre tạmbu reakʼ ar mitʼ hạṭiń tahẽkana; ona reakʼ ńutum do sonot utạrakʼ jaega.

⁴Noa hạṭińre dhup jered lạgitʼ sona reakʼ pinḍ ar bondobos reakʼ sunduk tahẽkana. Ona sunduk do beṛhaete sonate tolakatʼ tahẽkana. Ar ona cetanre sona reakʼ bhajanre dohoakatʼ manna, ar Aronakʼ oka ṭheṅgare baha bhoṭokʼlen ona ṭheṅga, ar bondobos olakʼ dhiri reakʼ barea paṭa.

⁵Ona sunduk cetanre Isorakʼ ṭhonokte perecʼ sonaren barea Kerubkin tahẽkana. Unkinakʼ phạ̃kṛạ̃kte ona sunduk reakʼ ḍhakonkin umulakatʼ tahẽkana. Noa ḍhakonre do kạiko hạrupʼkakʼkan tahẽkana. Menkhan noako reakʼ ńitokʼ do khode khod babo roṛ daṛeakʼkana.

⁶Nonkate jotowakʼ benao sạtkate naekeko do jaoge tạmbu reakʼ pạhilakʼ jaegare bolokate Isorakʼko dewa sewayetʼkan tahẽkana.

⁷Menkhan dosarakʼ jaegare, metakʼme sonot utạrakʼ ṭhạ̃ire do eken maraṅ naeke motogeye bolokʼkan tahẽkana. Uni do bochorre eken mitʼ dhaoge dãṛẽ samaṅ akan janwarakʼ mãyãmante onḍeye bolokʼkan tahẽkana. Uni do acʼakʼ kại lạgitʼ ar bin baḍaeteko kại akatʼ hoṛkoakʼ kại lạgitʼ noa mãyãme coḍoretʼ tahẽkana.

⁸Noate sonot Jiue udukʼetʼkana je, tinạkʼ din noa sewa tạmbu tahen unạkʼ din ona sonot utạrakʼ ṭhạ̃ire bolokʼ reakʼ hor do jhicʼ baṅ tahena.

⁹Nahakʼ jug lạgitʼ noa do mitʼṭen cinhạ kana one oka doe lại abonkan je, dãṛẽ samaṅ akade janwar ar eṭakʼ eṭakʼ jinisko do dewa sewakoakʼ bibek ohoe sạbit utạr daṛeletakoa.

¹⁰Onako do eken hoṛmoteakʼ kana, metakʼme jom-ńũ ar dhorom reakʼ niạm lekate saphakʼ reaṅge. Onako do sanamakʼ jut aroe okte hạbicʼge kạmire lagaolena.

¹¹Menkhan Mạsi do darakan joto bhageakʼren maraṅ naeke lekategeye hecʼlena. Uni do artetʼ bhage ar artetʼ mońj sewa tạmbure Isorakʼ sewa lạgitʼgeye hecʼlena. Noa tạmbu do manwa tite benaowakʼ do baṅkana, metakʼme ona do dhạrti reakʼ jãhãn jinis hõ baṅkana.

¹²Merom ar ḍaṅgrakoakʼ mãyãmte Mạsi do ona sonot utạrakʼ ṭhạ̃ire bae bololena. Uni do acʼakʼ mãyãmte mitʼ dhaoge onḍeye boloyena. Nonkate uni do jaejug lạgitʼ kại khon bańcaokʼ reakʼ hore tearkeda.

¹³Okoeko bhõnḍ akan tahẽkan onko cetanre merom ar ḍaṅgrawakʼ mãyãm se pheṭãṛ rapakʼ akade torocʼko chiṭạu akokan tahẽkana; onate onkoakʼ do eken bahre hoṛmo saphakʼkan tahẽkana.

¹⁴Menkhan okoe do jaejug sonot Jiu hotete Isor ṭhen acʼtetʼge niphuṭ dãṛẽ lekateye emen uni Jisuakʼ mãyãm do aboakʼ bibekre bin joanakʼ kạmi khon arhõ bạ̃ṛtiye sapha bona, jemon jiwetʼ Isor bon sewa daṛeae.

¹⁵Isor do okoeko hohokate jaejug ạidạri emako lạgitʼe gokʼatʼko tahẽkan onko jemon onako ńam onate Mạsi do mitʼṭen nawa bondobos reakʼ dene banar secʼrene hoyena. Noa ạidạri ńam do manwa lạgitʼ leṭejokʼakʼ hoeakana, ente pạhil bondobos bahal tahẽkanre manwa okako kại akatʼ onako kại khon chaḍao reakʼ dam lekate Mạsi do jiwiye emleda.

¹⁶Ạidạri oṭo akatʼ dolel kạmire lagao ocoe khan ạidạri dolel akatʼicʼakʼ gujukʼ reakʼ sạbudokʼ jạruṛa,

¹⁷ente manwae gocʼlen anecʼ ạidạri dolel do kạmire lagaokʼa. Ar okoe ạidạri dolele dolel oṭoakatʼ uni jiwetʼe tahen hạbicʼ ona ạidạri dolel do kạmire baṅ jojaokʼa.

¹⁸Ṭhik onkage pạhilakʼ bondobos hõ mãyãm chaḍakate kạmire oho lagaolena.

¹⁹Joto hoṛko ṭhen ạn-ạriko reakʼ mimitʼ hukum lại saḍe tayom Mose do pheṭãṛ ar meromkoakʼ mãyãme hataokeda ar ona sãote dakʼ mesalkate jeṅgetʼ arakʼ bheḍawakʼ up̕ ar husopʼ dạrte ona ạn-ạriko reakʼ puthire ar hoṛko cetanre onaye chiṭạukeda.

²⁰Uni do ona onkae jokhecʼe menleda, “Noa do ona bondobos reakʼ mãyãm kana, one okaṭakʼ bondobos lekate kạmi lạgitʼ Isore hukumakatʼpe.”

²¹Sewa tạmbu ar dewa sewa kạmire beohar lạgitʼ joto jinisko cetanre Mose do inạ mitʼ lekage mãyãme chiṭạuleda.

²²Moseakʼ ạn-ạri lekate sanam jiniskoge mãyãmte saphakʼ kana ar begor mãyãm jorote kại do oho ikạlena.

²³Okaṭakʼ do serma reakʼakʼko reakʼ nokolakʼkan onako do janwar dãṛẽ hotete saphakʼ reakʼ jạruṛ tahẽkana menkhan okaṭakʼ do asolrege serma reakʼakʼko kan onako saphakʼ lạgitʼ do arhõ maraṅ dãṛẽ jạruṛa.

²⁴Asolakʼ sonot jaega reakʼ nokolakʼ lekate manwa tite tearakʼ jãhãn sonot jaegare Mạsi do bae bololena, bickom ona bodolte uni do sermateye boloyena jemon abo iạte Isor samaṅre ńite hạjir daṛeakʼ.

²⁵Maraṅ naeke do janwarkoakʼ mãyãmate cetʼleka jao bochor sonot utạrakʼ jaegareye bolokʼkan tahẽkan, Mạsi acʼhõ onkaleka bar bar dãṛẽ samaṅokʼ lạgitʼ sermate do bae bolo akana.

²⁶Ar onkage hoyokʼ hoelentae khan enḍekhan dhạrti sirjạu khon ehopʼkate ạḍi dhaoge duk jomkate gujukʼ hoekokʼtaea; menkhan ńitokʼ sanam jugko reakʼ mucạtʼre uni do mitʼ dhaogeye sodorena jemon apnartetʼe dãṛẽkʼte kạikoe ocokʼ giḍikakʼ.

²⁷Isor doe ṭhik dohoakada je, manwako mitʼ dhaoko gujukʼa, ar ona tayom do bicạr hoyokʼtakoa.

²⁸Ṭhik onkage ạdi utạr hoṛakʼ kại reakʼ bojha gokʼ idi lạgitʼ Mạsi hõ mitʼ dhãogeye dãṛẽyena. Uni do dosar dhaoe hijukʼa, menkhan unre kại ńutumte gujukʼ lạgitʼ do baṅ, bickom acʼ ńel horekanko bańcaoko lạgitʼgeye hijukʼa.