Read Santali 1 Patras 4 Bible Online

1 Patras 4 - Santali bible

1 Patras 4

¹Onate Mạsi do hoṛmore duke sahaoletʼte ape hõ apnarakʼ ontorre inạ mitʼ monsubạge benao rakabtape, ente hoṛmore okoe duke jom akatʼ uni do kại reakʼ heowa khone thir akana.

²Onate noa dhạrti reakʼ sarecʼakʼ jion uni do dhạrti reakʼ rij roṅte bae khemaoa, bickom Isorakʼ monejoṅakʼ lekageye khemaoa.

³Okoe Isor bako baḍae akade onko leka ape hõ lahate umtạ umti, bạṛicʼ sana, ńu bhuteṛokʼ, rij roṅ, matalokʼ, ar hirkhạwakʼ boṅga sewarepe taṛametʼ tahẽkana.

⁴Menkhan ńitokʼ do onko hoṛge ape ńelteko hahaṛakʼ kana, ape do onkoakʼ bạṛicʼ lucạ lamoṭkore ar bape seledokʼkana, onate onko do apeko dusạuetʼpea.

⁵Menkhan okoe jiwetʼ ar gocʼko bicạrko lạgitʼe sapṛao tearakan, onko do uni ṭhen hisạb emokʼ hoyokʼtakoa.

⁶Gocʼko ṭhen hõ coṅ ona iạte Mạsi reaṅ bhage sombat porcarlen, jemon hoṛmo secʼte manwa leka bicạr hoelentakore hõ Jiu secʼte onko do Isor leka jiwetʼko tahẽdaṛeakʼa.

⁷Nitokʼ do sanamakʼ reakʼ mucạtʼ okte seṭerakana. Onate apeakʼ mon do kajak akae dohoepe ar apnarte sambṛaokʼpe jemonpe koejoṅ.

⁸Sanam khon maraṅ katha do hoyokʼ kana, ape apere khạndri dupulạṛ tahentape ma, ente dupulạṛ do ạḍi utạr kạiye dapala.

⁹Begor karacʼ kurujokʼte ape apere peṛakʼpe.

¹⁰Ar ạḍi lekate sodorokʼkan Isorakʼ daya ńamkate okoe hoṛ do pạtiạr salakʼ kạmire onae lagaoetʼkan, onkan hoṛ lekate ape do Isor ṭhen khon okalekan danpe ńamakatʼ ona baṛe ape apere sapʼ sopohotʼ lạgitʼ beoharpe.

¹¹Jãhãeye porcar khan, enḍekhan nonka lekae porcar ma jemon uni do Isorakʼ moca reakʼ kathae roṛeda mente. Ar jãhãye sapʼ sopohotʼ khan enḍekhan Isor emakʼ daṛete uni doe sapʼ sopohotʼma, jemon Jisu Mạsi hotete jotowakʼre Isorge ṭhonoke ńam. Ente daṛe ar ṭhonok do jaejug hạbicʼ uniakʼge. Amen.

¹²E gateko, ńitokʼ biḍạu seṅgel talate calakʼ hoyokʼ kantapete hahaṛakʼ tulucʼ alope hudisa je, apere ạnạṛi jãhãnakʼ hoyokʼ kana mente.

¹³Ona khon bickom Mạsiakʼ duk jom reakʼ bhạgiạdarkope hoeakante rạskạkʼpe, jemon uniakʼ mạhima sodorokʼre ape do rạskạtepe perejokʼ.

¹⁴Mạsi iạtepe opoman ocokʼkan khan enḍekhan ape dope bhạgangea, ente Isorakʼ mạhimate perecʼ akan Jiu do apere menaea.

¹⁵Ape modre okoe hõ khũniạhi, kombṛo, bạṛicʼ kạmiyicʼ se eṭakʼkoakʼ babotre duk aloe jomma.

¹⁶Menkhan Khristan lekate jãhãe duke jomlere aloe lajaokʼma, bickom uniakʼ do ona ńutum menakʼtaete Isore sarhaoema.

¹⁷Bicạr reakʼ okte do hoeakana ar ona do Isorakʼ gharońjren hoṛko khonge ehobokʼa. Ar ona bicạr do abo khonge ehopʼlen khan, enḍekhan okoe Isorakʼ bhage sombat bako manao akatʼ onko do cetʼ dosa hoyokʼtakoa?

¹⁸Sostorre menakʼa, Isor bhokti hoṛkoakʼ bańcao ńam nunạkʼge keṭecʼge khan, kạkạiko ar Isor bebhoktiko do cetʼ dosa hoyokʼtakoa?

¹⁹Enḍekhan Isorakʼ monejoṅ lekate okoe dukko sahaoetʼkan, onko do akoren pạtiạricʼ sisirjạuicʼakʼ tire apnartetʼko jimạkʼma ar bhage kạmiko kạmi idima.