Read Santali 2 Patras 1 Bible Online

2 Patras 1 - Santali bible

2 Patras 1

¹Iń Simon Patras do Jisu Mạsiren mitʼṭen golam ar apostolge. Aboren Isor ar babańcaoicʼ Jisu Mạsi doe dhoromgea, ar ona iạte ape hõ ale leka inạ bin mucạtʼ damrepe biswạs akana. Ar noa iạte ape ṭhen niạ ciṭhiń oleda.

²Isor ar aboren Probhu Jisu do khạndri ontor khon baḍaeyete apere asambheṛ daya ar suluk baṛe tahenma.

³Okoe acʼakʼ ṭhonok ar soros gunteye hoho akawatʼ bon, uniakʼ khạndriakʼko baḍae hotete acʼakʼ Isor daṛete nonkanakʼkoe dan akatʼbona, one ona hotete abo do Isor botoraete jion bon khemao daṛeakʼ.

⁴Uni do acʼakʼ ṭhonok ar soros gunte abo ṭhen ạḍi damanakʼ ar maraṅakʼe gokʼakada. Noa reakʼ monsubạ do hoyokʼ kana, manwakoakʼ bạṛicʼ sana khạtirte dhạrtire okako bạṛicʼakʼ perecʼ akan ona khonpe ńir pharakokʼte Isorakʼ boge colonren bhạgiạdarpe hoyokʼ.

⁵Onate ạḍi jidkate apeakʼ biswạsre bhage gun, ar bhage gunre do akel,

⁶ar akel tulucʼ apnar sambṛaokʼ ar sobori, Isor bhokti,

⁷ar bhokti tulucʼ boeha dulạṛ ar ona dulạṛ sãote arhõ khạndri dulạṛ mon juṭucʼakʼpe.

⁸Apeakʼ noako gun tahentape khan ar onako baḍhao idikʼkan khan, enḍekhan aboren Probhu Jisu Mạsi do khạndri ontor khon baḍaeyere okaj ar bin joanko do bape hoyokʼa.

⁹Okoe hoṛre noako gun bạnukʼ, uni do ḍher sạṅgiń bae ńel ńameda, ente uni doe kãṛãgea. Ar acʼakʼ lahateakʼ kại khone sapha ocoakan ona doe hiṛiń akada.

¹⁰Onate E boehako, sạrige Isor do apeye hohoakatʼpe are bachao akatʼpe ona khạṭi ocoe lạgitʼ arhõ bạ̃ṛti jid monanko hoyokʼpe. Ar noakope nonka lekhan tis hõ ohope tohotʼlena.

¹¹Noa iạte aboren Probhu ar babańcaoicʼ Jisu Mạsiakʼ jaejug rajosṭire jid salakʼpe ataṅ ocokʼa.

¹²Onate noako reaṅ iń do jaogeń disạ ocoyetʼpea. Menkhan ape do noakope baḍaegea ar oka sạritetʼ apeakʼ ontorre menakʼ onarehõ kajak menakʼpea.

¹³Menkhan ińakʼ hudisre, tinạkʼ din noa kumbạ leka bin ṭikạukʼ hoṛmore jiwetʼiń tahen unạkʼ din noako reaṅiń disạite jagwar dohope do lek kantińạ;

¹⁴ente ḍher din noa hoṛmo kumbạre bạń tahena ona do aboren Probhu Jisu Mạsi pusṭạuteye baḍae ocoakadińạ.

¹⁵Ińakʼ gujukʼ tayom hõ jemon noako reaṅ jaogepe disạ dohoe, onate iń do ona bondobos lạgitʼ ạḍiń kurumuṭuya.

¹⁶Aboren Probhu Jisuakʼ daṛe ar uniakʼ hijukʼ reaṅ baḍae ocopere benaoakʼ jãhãn golpo do bale lại akada; ale do uniakʼ ṭhonok nij mẽtʼtele ńelakada.

¹⁷“Nuige ińren dulạṛiạ Hopon, one unireń kusi akan,” Serma khon roṛlen noa kathate Mạsi do Isor Baba ṭhen khon man ar ṭhonoke ńamleda.

¹⁸Ale do uni tulucʼ ona sonot bururele tahẽkanre serma khon roṛlen noako kathale ańjomleda.

¹⁹Sostorre nạbiko okakoko menakatʼ ona do ale ṭhen sạrikana mente sạbud akana. Ńutre apeakʼ mẽtʼ do cetʼleka diuhe secʼ tahenkan onkage, tin hạbicʼ baṅ setagokʼ ar apeakʼ ontorre bhurkạ ipil bae rakabokʼ, un hạbicʼ nạbikoakʼ kathape luturakʼ khan ape dope bhagekea.

²⁰Enḍekhan jotowakʼ cetanre noa katha disạ dohoepe, sostor reakʼ okaṭakʼ kathage nạbikoakʼ benaoakʼ katha do baṅkana,

²¹ente nạbiko do akoakʼ sana leka jãhãn katha bako roṛakada; onko do sonot Jiu reakʼ ạyurtege Isorakʼ kathako roṛakada.