Read Santali 1 Johan 1 Bible Online

1 Johan 1 - Santali bible

1 Johan 1

¹Okoe pạhil khongeye tahẽkan, ar okoeakʼ moca reakʼ kathale ańjom akatʼ, okoe nij mẽtʼtele ńṭoṭhade, okoe do mońjtele ạri bạndhi akade, okoe do nij titele joṭetʼ akade, ona jion reakʼ kathage nonḍele oleda.

²Ona jion doe sodorlena. Ale do unile ńṭoṭhadea ar uni reaṅ gohale emeda. Okoe do Baba ṭhene tahẽkan ar ale ṭhene sodorlen ona jaejug jion reakʼ kathage apele baḍae ocoyetʼpea.

³Okoe alele ńṭoṭhade ar okoeakʼ moca reakʼ kathale ańjomakatʼ uni reaṅgele baḍae ocoyetʼpea. Ale do onale baḍae ocoyetʼpea jemon ape ar ale talare mitʼṭen helmel benao rakabokʼ. Noa do hoyokʼ kana Baba ar uniren Hopon Jisu Mạsi ar abo tala reakʼ helmel.

⁴Aleakʼ rạskạ jemon perejokʼ onate ale do noakole oleda.

⁵Okaṭakʼ katha Jisu Mạsi ṭhen khon ańjomkate apele baḍae ocoyetʼpe ona do noage, Isor doe marsal kana; ar unire ńut do bạnukʼanaṅ.

⁶Isor ar abo talare helmel menakʼa mentebo menetʼ khan ar ńutre bon taṛametʼ khan enḍekhan eṛe katha bon roṛeda, ar sạriakʼ horte do babon taṛameda.

⁷Menkhan Isor do cetʼleka marsalre menae ar onkage abo hõ marsalre bon taṛametʼkan khan enḍekhan abo talare helmel menakʼtabona ar uniren Hopon Jisuakʼ mãyãm do sanam kại khone sapha bona.

⁸Ar abore kại bạnukʼa mentebon menle khan enḍekhan abo do apnarge bon bulạukʼ kana. Onate noage bujhạukʼ kana je, aboakʼ ontorre Isorakʼ sạritetʼ do bạnukʼa.

⁹Abo do aboakʼ kạiko bon aṅgocle khan, enḍekhan uni do unrege kạikoe ikại tabona ar sanam bedhorom khone sapha bona, ente uni doe pạtiạrgea ar tis hõ bae bedhoroma.

¹⁰Ar babon kại akada mentebon menle khan, enḍekhan unige eṛeyicʼ bon benaoede kana, ar uniakʼ katha aboakʼ ontore do bạnukʼanaṅ.