Read Santali 1 Johan 4 Bible Online

1 Johan 4 - Santali bible

1 Johan 4

¹E dulạṛiạ gidrạkotiń, joto Jiu do alope pạtiạu akoa, bickom biḍạu aṭkarkope onko do Isor khonko hecʼakana se baṅ, ente dhạrtire aema eṛe nạbikoko oḍok akana.

²Isorren Jiu do nonkatepe orom daṛeakoa, okoe Jiu do Jisu Mạsi manwa lekateye hecʼlena menteye aṅgoce uni Jiuge Isor khon hecʼ akanicʼ do;

³Menkhan okoe Jiu Jisu bae aṅgoce uni Jiu do Isor khonicʼ doe baṅkana. Nui jiu do uni Mạsiren bạiri kanae. Ar okoeṭakʼ Jiue hijukʼkan, ona mape ańjomakatʼge, ar sạrige uni Jiu do ńit hõ dhạrtirege menaea.

⁴Menkhan E gidrạko, ape do Isorren kanape. Ape do onko eṛeko cetanrepe jitạu akana, ente noa dhạrtire okoe menae, uni khon apeakʼ ontorre menayicʼ doe maraṅgea.

⁵Onko eṛeko do noa dhạrtiren kanako; onate onko do noa dhạrti reakʼ kathako roṛa ar dhạrti do onkoakʼ kathae ańjoma.

⁶Abo do Isorren kana bon; okoe Isore baḍae akade uni do aboakʼ kathae ańjoma, menkhan okoe Isorrene baṅkan uni do aboakʼ katha bae ańjoma. Ar noatege abo do sạriakʼren Jiu ar bulạuren jiu bon orom daṛeaea.

⁷Dulạṛiạ gidrạko, abo mimitʼko jemon bon dupulạṛ, ente dulạṛ do Isor ṭhen khonge hijukʼ kana. Okoeakʼ ontorre dulạṛ menakʼtako, onko do Isor khongeko janamakana ar Isorko baḍae akadea.

⁸Okoeakʼ ontorre dulạṛ bạnukʼ, onko do Isor bako baḍae akadea, ente dulạṛ do Isor acʼtetʼ kangeae.

⁹Abo lạgitʼ Isorakʼ dulạṛ do nonkate sodor akana, uni do acʼren eskar janam Hopon noa dhạrtiteye kolkedea jemon uni hotete jion bon ńam.

¹⁰Isor do aboge bon dulạṛ akadea ona do baṅ, menkhan unigeye dulạṛketʼ bonte acʼren Hopone kolkedea, jemon Hopon do acʼakʼ jiwiye alaete aboakʼ kạiko meṭaokate Isore kusi ocoye. Ar noa kangea dulạṛ do.

¹¹E dulạṛiạ gidrạko, Isor do nonkae dulạṛetʼ bon khan eḍekhan abo hõ mimitʼko dulạṛ lek kan tabona.

¹²Isor do okoege tishõ bako ńṭoṭhadea. Ar abo mimitʼko bon dupulạṛ khan, enḍekhan bon bujhạu daṛeakʼa, Isor do aboakʼ ontorre menaea ar uniakʼ dulạṛ do aboakʼ ontorre purạteye kạmiyeda.

¹³Uni do acʼren Jiue dan akatʼ bona, ar noatege bon baḍae daṛeakʼa je, abo do unire menakʼ bona ar uni hõ aboakʼ ontorre menaea mente.

¹⁴Alele ńṭoṭhadea ar gohale emetʼkana, Baba do manwakoren babańcaoicʼ mente Hopone kolkedea.

¹⁵Ar jãhãege Jisu do Isorren Hopon kanae menteye aṅgoce, Isor do unireye tahena ar uni hõ Isorreye tahenkana.

¹⁶Baḍaegea bon Isor do aboe dulạṛetʼ bona, ar uniakʼ dulạṛre aboakʼ biswạs menakʼ tabona mente. Isor do acʼtetʼgeye dulạṛ kana. Ar dulạṛre okoeye tahen kan, uni do Isorregeye tahenkana ar Isor do unireye tahenkana.

¹⁷Nonkatege dulạṛ do aboakʼ ontorre purạte hoeakana jemon bicạr hilokʼ dil bon ńam, ente noa dhạrtire aboakʼ jion do uniakʼ jion lekagea.

¹⁸Noa dulạṛre do botor bạnukʼa, bickom purạ dulạṛ do botore oḍok giḍiya, ente botorre do sạjại menakʼa. Okoeye botorokʼ kan uni do dulạṛre purạte bae sạbit utạr akana.

¹⁹Uni do pạhilre aboe dulạṛ maṛaṅketʼ bontege abo bon dulạṛede kana.

²⁰Okoe Isore dulạṛede kana menteye menetʼkan, menkhan acʼren boehae kurudae kan uni doe eṛeyicʼ kana; ente mẽtʼte ńṭoṭhade boeha okoe bae dulạṛedekan uni do cekate baṅ ńṭoṭhade Isor doe dulạṛ daṛekea?

²¹Uni ṭhen khon noa hukum bon ńam akada, okoe Isorko dulạṛedekan onko do boehako hõ jemonko dulạṛko.