Read Santali 1 Johan 5 Bible Online

1 Johan 5 - Santali bible

1 Johan 5

¹Jisu do Mạsi kanae mente okoeko pạtiạukʼkan, onko do Isor khonko janamakana. Ar okoe Babako dulạṛedekan onko do uniren Hopon hõko dulạṛede kana.

²Abo do tinre Isor bon dulạṛede kana ar uniakʼ hukumko bon bataoetʼtaea unre bon baḍae kana je, Isorren gidrạko hõ bon dulạṛetʼkoa.

³Isorakʼ hukumko dohoege hoyokʼ kana Isor dulạṛ do. Uniakʼ hukum do hamal bojha leka do baṅkana,

⁴ente Isorren mitʼke mitʼ gidrạ do dhạrtiko bhagaoeda. Dhạrtire okaṭakʼe jitạu akan ona do aboakʼ pạtiạu.

⁵Okoeko pạtiạukʼkan Jisu do Isorren Hopon kanae mente, eken onkoge dhạrtiko bhagaoa.

⁶Nuikangeae Jisu Mạsi, one okoe do dakʼ ar mãyãm hoteteye hecʼlen. Eken dakʼ hotete do baṅ, bickom dakʼ ar mãyãm hoteteye hecʼlena. Sonot Jiu do noa reaṅ gohae emeda, ente uni do acʼgeye sạriakʼtetʼ kana.

⁷Sonot Jiu, dakʼ ar mãyãm, noa pea talate ona goha do hijukʼ kana ar ona pene goha do mitʼgea.

⁹Abo do manwawakʼ goha bon ataṅetʼ kana, menkhan Isorakʼ goha do ona khon hõ maraṅgea; uni do acʼren Hopon reaṅ gohae emakada.

¹⁰Isorren Hopon cetanre okoeye pạtiạukʼkan uniakʼ ontorre ona goha do menakʼa. Ar Isorre okoe bako pạtiạukʼkan onko do eṛeyicʼko benao akadea, ente Isor acʼren Hopon reaṅ oka gohae emakatʼ onare onko do bako pạtiạu akana.

¹¹Ona goha do noage, Isor do jaejug jione emakatʼ bona ar ona jion do acʼren Hoponre menakʼa.

¹²Isorren Hopon okoeye ńamakade uni do jion hõe ńamakada; menkhan Isorren Hopon okoe bae ńamakade uni do ona jion hõ bae ńamakada.

¹³Ape okoeko Isorren Hoponrepe biswạs akan, ape ṭhen iń do noakoń olkeda jemonpe baḍae daṛeakʼ, ape do jaejug jionpe ńam akada mente.

¹⁴Isorre aboakʼ khạṭitetʼ do noage, uniakʼ monejoṅakʼ leka jãhãnakʼ bon koe lekhan, enḍekhan uni do aboakʼ kathae ańjoma.

¹⁵Baḍaegea bon, jãhãnakʼge bon koeye, uni do onae ańjoma, ar noa hõ bon baḍaegea, uni ṭhen okabon koeakatʼ ona do bon ńamakatʼgea.

¹⁶Jãhãege acʼren boeha nonka kạkạikane ńel lekhan one okaṭakʼ do gujukʼ senakʼ baṅkan, enḍekhan uni do Isor ṭhene koejoṅma ar onate uni do jiwetʼe dohoyea. Iń do nonḍe onkoakʼ kathageń roṛeda one okoe doko kạiyetʼkan, menkhan onkoakʼ kại do gujukʼ senakʼ do baṅkan. Menkhan gujukʼ senakʼ kại hõ menakʼgea. Ona reaṅ nehõrape reakʼ katha do bạń metapekana.

¹⁷Joto lekan bedhoromakʼge kại kana, menkhan joto kại do gujukʼ senakʼ do baṅkana.

¹⁸Baḍaeabon, Isor khon janamicʼ do kạire bae tahena. Ar okoe Isor khone janamakan unige uni doe rukhiạyea, ar Soetan do bae joṭetʼ daṛeaea.

¹⁹Baḍaeabon abo do Isorren kana bon, ar goṭa dhạrti do Soetanakʼ ektiạri latarre menakʼa.

²⁰Arhõ bon baḍaea, Isorren Hopone hecʼente bujhạu reakʼ daṛeye emakatʼ bona jemon sạri Isor bon baḍae orom daṛeae. Okoe doe sạri Isor kan abo do uni tulucʼ bon kolom mitʼ akana, metakʼme uniren Hopon Jisu Mạsi tulucʼ menakʼ bona. Unige sạri Isor ar unige jaejug jion do.

²¹E bachakotiń, boṅgako tulucʼ apeakʼ do jãhãn jopoṛao alo tahen ma.