Read Santali 3 Johan 1 Bible Online

3 Johan 1 - Santali bible

3 Johan 1

¹Isorakʼ sạriakʼtetʼ iạte okoeyiń dulạṛedekan, ińren uni dulạṛiạ gate Gạius ṭhen iń murubi do noa ciṭhiń oleda.

²Dulạṛiạ gate, koejoṅreń disạyetʼmea jemon amakʼ jotowakʼge mońjte calakʼ ar Jiu secʼ lekate cetʼlekam calakʼkan onkage jemon amakʼ hoṛmo hõ mońj tahentam.

³Iń do ạḍitetʼiń rạskạyena ente adom biswạsi boehako hecʼkate am reaṅ noa gohako emkeda je, am do Isorakʼ sạriakʼre pạtiạr menama ar ona lekam taṛameda.

⁴Ińren gidrạko je Isorakʼ sạriakʼ horteko taṛametʼkan, noa khon bạ̃ṛti maraṅ rạskạ do ińre ar bạnukʼanaṅ.

⁵Dulạṛiạ gate, am do begor oromte hõ biswạsi boehako lạgitʼ okaṭakʼem cekayetʼ ona do pạtiạrtegem onkayeda.

⁶Onko do manḍerre sanamko samaṅre amakʼ dulạṛ reakʼ kathako roṛeda. Ar Isor jemone kusikʼ onkaleka onko calakʼ reaṅem bebosta ako khan boge hoekokʼa.

⁷Onko do Mạsi lạgitʼgeko oḍok hecʼakana ar bepạtiạuko ṭhen khon cetʼge bako hatao akada.

⁸Onate nonkan hoṛ goṛowako do lek tabona, jemon Isorakʼ sạriakʼ lạgitʼ abo hõ onkoakʼ kạmire são kạmiyạko bon hoyokʼ.

⁹Iń do manḍerrenko ṭhen mitʼṭen ciṭhiń olleda, menkhan Diotrephes do manḍerren mukhiyạ hoyokʼe menetʼte aleakʼ katha do bae moneakʼ kana.

¹⁰Onate uni okaṭakʼe cekayetʼ ona do iń hecʼ tayom sanamkoń baḍae ocokoa. Uni do ale birudre hiskạte aema eṛe kathae roṛakada. Onate hõ bae suklente boehako hõ bae ataṅetʼkoa ar okoe onkoko ataṅetʼko onko hõe tạkicʼ darametʼkoa ar manḍer khone oḍoketʼkoa.

¹¹Dulạṛiạ gate, bạṛicʼakʼko pańja baṅkate bickom bhageakʼ pańjaepe. Okoe bhageakʼe kạmikan uni doe Isorren hoṛ kana, ar okoe bạṛicʼakʼe kạmikan uni do Isor bae ńṭoṭhadea.

¹²Sanamkoge Demetriusko sarhaoede kana, ar Isorakʼ sạriakʼtetʼ hõe onkawae kana. Ale hõ unile sarhaoede kana. Am dom baḍaegea ale okaṭakʼle lại ona do sạrigea mente.

¹³Aema katha olam reakʼ menakʼtińạ, menkhan kạli ar kolomte ona olam do bạń monejoṅ kana.

¹⁴Asokʼ kạnạń usạrageń ńapam mea, ar unre samna sạmni laṅ galmaraoa.

¹⁵Suluk am ma. Amren gatekoko joharam kana. Onḍenko gateko do aleakʼ judạ judạ johar baṛe emakom.