Read Santali Johan sodor 1 Bible Online

Johan sodor 1 - Santali bible

Johan sodor 1

¹Noa puthire okako olakan ona do Jisu Mạsigeye sodor akada. Noako reaṅ Isor do Mạsi ṭhene sodorleda, jemon thoṛa ghạṛicʼ khange hoyokʼ lạgidokʼkan ghoṭnako acʼren golamkoe baḍae ocoko. Mạsi do acʼren goḍete kolkedete acʼren golam Johan do noa reaṅakʼkoe baḍae ocoledea.

²Isorakʼ katha ar Jisu Mạsiakʼ goha reaṅ Johan okae ńelletʼ tahẽkan, onako reaṅ uni do nonḍe gohae emakada.

³Ar Isorakʼ okaṭakʼ katha nonḍe olakan, ar okoe noae paṛhao uni doe bhạgangea ar okoe onako ańjom arko manao onko hõko bhạgangea, ente okte do hecʼ seṭer akana.

⁴Iń Johan do Ạsiạ reakʼ eae goṭen manḍerko ṭheniń oleda. Okoe menae, okoeye tahẽkan ar okoeye hijukʼkan uni ar uniakʼ siṅghạson samaṅre okoe eae goṭen Jiuko tahenkan, onko ar Jisu Mạsi do daya ar sulukko dan apema.

⁵Jisu kangeae pạtiạricʼ goha do ar gocʼko khon unige pạhil dhaoe jiwetʼ beretʼlena, ar dhạrtiren rapajkoren raj doe uni kangea. Uni do aboe dulạṛetʼbona ar acʼakʼ mãyãmte kại khone chaḍaoketʼbona.

⁶Uni do aboko hotete mitʼṭen rajosṭiye benao rakapʼakada ar acʼren Baba ar Isorakʼ sewa lạgitʼ naekeye hoe ocoakatʼbona. Jaejug hạbicʼ Jisu Mạsiakʼge ṭhonok hoyokʼtaema ar jaejug hạbicʼ uniakʼ daṛe do tahẽ akae tahenma. Amen.

⁷Ńelpe, uni do rimilteye hijukʼkana. Ar mitʼke mitʼ mẽtʼ do uniko ńelea; ar okoeko sobokʼ bhugạkʼlede onko hõ uniko ńelea ar dhạrtiren sanam jạtko uni iạte koṛamko ceṭagokʼa. Onage hoyokʼ ma, Amen.

⁸Probhu Isore meneda, “Ińge Alpha ar Omega, one okoe do menae, are tahẽkan are hijukʼkan. Ar iń kangeạń sanam daṛeyicʼ do.

⁹Iń aperen boeha Johan do Jisu tulucʼ iń kolom mitʼ akante ape tulucʼ inạ duk, inạ rajosṭi ar inạ soboriren bhạgiạdariń hoeakana. Iń do Isorakʼ katha ar Jisuakʼ gohań porcarletʼte Patmosko metakʼ dipreń doho ocolena.

¹⁰Probhuakʼ dinre iń do Jiureń tahẽkana. Ar un jokhecʼ iń tayomre siṅgạ saḍe leka mitʼ hoṛakʼ aṛaṅiń ańjomkeda.

¹¹Uni doe metadińạ, “Okaṭakʼem ńel ona do mitʼṭen puthire olme, ar Ephesus, Smurnạ, Pergamom, Thuạtirạ, Sạrdis, Philạdelphiạ, ar Laodhar, noa eae goṭen nagraha reakʼ eae goṭen manḍer ṭhen kolme.”

¹²Okoe kathae roroṛkan tahẽkan uni ńele lạgitʼ iń ạcuren khan sona reakʼ eae goṭecʼ diuhe dohowakʼ iń ńelkeda.

¹³Ona diuhe dohowakʼko talare manwa Hopon leka okoe coṅ mitʼ hoṛe tahẽkana. Uni do jaṅga hạbicʼ jeleń aṅgrop horokʼ akatʼ ar koṛam do sona reakʼ pạṭkạte tol ạcurakatʼ tahẽkantaea.

¹⁴Uniakʼ bohokʼ ar upʼ do ponḍge tahẽkana, ponḍ bhiḍi upʼ leka ar him lekage ar mẽtʼ do seṅgel lepʼ leka tahẽkana.

¹⁵Ar uniakʼ jaṅga do seṅgelre jhalkao akatʼ pitạl leka jhak jhak, ar aṛaṅ do aema dakʼko ạtukʼ reakʼ saḍe leka tahẽkana.

¹⁶Uni do acʼakʼ jojom tite eae goṭecʼ ipile sapʼakatʼko tahẽkana ar moca khon do banarsa dharanakʼ mitʼṭen laser tarwaṛe oḍokokʼkantae tahẽkana. Uniakʼ mẽtãhã do tạpiste jolokʼkan siń cando leka jhak jhakaokʼkan tahẽkana.

¹⁷Uni ńelte iń do gocʼicʼ leka uniakʼ jaṅga ṭheniń bhindạṛena. Unre uni do acʼakʼ jojomtite joṭetʼkedeńteye metadińạ, “Alom botorokʼa. Ińge pạhilicʼ ar mucạtʼicʼ,

¹⁸ar ińkangeạń jaejug jiwetʼicʼ. Iń doń gocʼlena, ar ńelme, jug cetan jug hạbicʼ jiwetʼ minạńa. Iń ṭhen do moron ar patal puri reakʼ choṛan menakʼa.

¹⁹Onate okam ńelketʼ, okaṭakʼ ńit hoyokʼkan ar noako tayom okaṭakʼ hoyokʼ onako ol dohokakʼme.

²⁰Ar oka eae goṭecʼ sona reakʼ diuhe dohowakʼ ar ińakʼ jojomtire eae goṭecʼ ipilem ńelketʼko ona reakʼ bhed do noage, onko eae goṭecʼ ipil do, eae goṭecʼ manḍerren eae goṭen goḍet kanako ar eae goṭecʼ diuhe dohowakʼ do ona eae goṭen manḍer kana.