Read Santali Johan sodor 10 Bible Online

Johan sodor 10 - Santali bible

Johan sodor 10

¹Ona tayom ar mitʼṭen daṛeanicʼ serma goḍet serma khon pheḍ hijukʼ kaniń ńelkedea. Uni do rimilte oyo akan, ar bohokʼre do liṭạ akʼ tahẽkantaea. Uniakʼ mẽtʼãhã do siń cando leka ar jaṅga do seṅgel reakʼ khũnṭi leka tahẽkana.

²Uniakʼ tire do oṭakʼ akatʼ mitʼṭecʼ huḍiń puthi tahẽkana. Uni do acʼakʼ jojom jaṅga jalapurire ar leṅga jaṅga do otre dohokate dhạcri kule hạnḍrạukʼkan leka ãṭ aṛaṅteye hohokeda. Uniakʼ hoho são sãote eae goṭecʼ huḍur saḍeyena.

⁴Ar eae goṭecʼ huḍur saḍeyen khan iń do olokʼ lạgitʼ iń sapṛaoena. Menkhan serma khon noa kathań men ocoyena, “Eae goṭecʼ huḍur oka kathae menketʼ ona do okoge dohokakʼme, alom ola.”

⁵Okoeṭakʼ serma goḍet do jalapuri ar otre teṅgo akaniń ńellede uni do acʼakʼ jojomti serma secʼe tulkeda.

⁶Ar jaejug hạbicʼ jiwetʼ menae serma, ot, jalapuri ar onakore menakʼ sanamakʼe sirjạuakatʼ, uniakʼ ńutumte kiriyạkate uni serma goḍet doe menkeda, “Ar baṅ bilomokʼa.

⁷Menkhan eaeyicʼ serma goḍetakʼ siṅgạ oroṅ dinkore Isorakʼ okoakʼ monsubạko do purạukʼa. Ar Isor do acʼren gutiko ṭhen, metakʼme nạbiko ṭhen okae baḍae ocoletʼ ṭhik onkage hoyokʼa.”

⁸Okoe serma khon katha roroṛiń ańjomlede, uni do arhõe metadińạ, “Okoeṭakʼ serma goḍet jalapuri ar otreye teṅgo akan, uni ṭhen senkate uniakʼ ti khon oṭakʼ akatʼ puthi hataome.”

⁹Unre iń do serma goḍet ṭhen senkate ona puthi imạń lạgitʼ iń metadea. Uni doe metadińạ, “Noa hataokate jom gotʼkakʼme. Noa do amakʼ lacʼe haṛhatʼ ocoetama, menkhan amakʼ mocare do dumur rasa leka heṛemem ạikạua.”

¹⁰Unre serma goḍetakʼ ti khon ona huḍiń puthi hataokateń jom gotʼkada. Ar mocare do dumur rasa lekań ạikạukeda, menkhaniń jomketʼ khan lacʼ do haṛhatʼentińạ.

¹¹Ona tayom noa kathań menocoyena, “Am do arhõ ạḍi utạr disạmko, jạtko, pạrsiko ar rajko reaṅ nạbi kathako roroṛ hoyokʼtama.”