Read Santali Johan sodor 15 Bible Online

Johan sodor 15 - Santali bible

Johan sodor 15

¹Tayomte iń do sermare ar mitʼṭen maraṅ ar hahaṛa cinhạń ńelkeda. Ona do eae goṭen serma goḍet ar onkoakʼ tire mucạtʼ eae goṭecʼ sạjại kana. Noako do mucạtʼ sạjại ńumogokʼ kana, ente noakote Isorakʼ edre do cabakʼa.

²Ona tayom iń do seṅgel mesal akatʼ mitʼṭen kãc reakʼ jalapuri lekań ńelkeda. Okoe uni janwar ar uniakʼ muṭhạn ar uniakʼ ńutum reakʼ lekha cetanreko jitạu akan onko hõń ńelketʼkoa. Isorakʼ peṛesaṅ tire sepeńkate onko do ona kãc reakʼ jalapuri aṛereko teṅgo akan tahẽkana.

³Onko do Isorren golam Mose ar uni Bheḍa Hoponakʼ noa sereńko sereńetʼ tahẽkana: “Sanam daṛean Probhu Isor, tinạkʼ maraṅ ar hahaṛagea amakʼ kạmiko do! E sanam jạtren raj, tinạkʼ dhorom ar sạriakʼgea amakʼ horko do!

⁴E Probhu okoe baṅ am do bae botoram? Ar okoe baṅ amakʼ ńutum bae sarhaotam? Eken amge coṅ sonoticʼ ma. Sanam jạtrenko do am ṭhenko hijukʼa, ar jotoge amko sewawama; ente amakʼ dhorom bicạr do sodor akana.”

⁵Noa tayom iń doń ńelkeda, serma reakʼ ona mundil, metakʼme goha tạmbu do jhicʼena.

⁶Unre onko eae goṭen serma goḍet do eae goṭecʼ sạjạiante mundil khonko oḍok hecʼena. Onko do sapha jhak jhak kicricʼko horokʼ akatʼ tahẽkana ar koṛam do sona reakʼ pạṭkạteko tol ạcurakan tahẽkana.

⁷Onko ponea jiwiyankoren mitʼṭen do onko eae goṭen serma goḍetko eae goṭecʼ bạṭiye ematʼkoa. Ar Isor, okoe do jug jug khon jaejug hạbicʼ jiwetʼ menae, uniakʼ edrete onako bạṭi do perecʼ akan tahẽkana.

⁸Isorakʼ mạhima ar daṛe khon okaṭakʼ dhũạ oḍokokʼkan tahẽkan ona dhũạte mundil oṛakʼ do perecʼena. Onko eae goṭen serma goḍetkoakʼ eae goṭecʼ sạjại ạuri cabakʼ hạbicʼ okoe hõ ona mundilre do bako bolo daṛeada.