Read Santali Johan sodor 16 Bible Online

Johan sodor 16 - Santali bible

Johan sodor 16

¹Inạ tayom iń doń ańjomkeda, ona mundil khon onko eae goṭen serma goḍetko do mitʼ hoṛ ãṭ aṛaṅteye metako kana, “Ape do senkate Isorakʼ edrete perecʼ eae goṭecʼ bạṭi dhạrtire dulpe.”

²Unre pạhilicʼ serma goḍet do senkate acʼakʼ bạṭi dhạrtireye dulkeda. Onate okoere uni janwarakʼ cinhạ tahẽkan ar okoe do uniakʼ muṭhạnko sewawakʼkan tahẽkan onkoakʼ hoṛmore ạḍi bạṛicʼ ar dạrun ghao ńamketʼkoa.

³Dosaricʼ serma goḍet do acʼakʼ bạṭi jalapurireye dulkeda. Unre jalapuri reakʼ dakʼ do gocʼ hoṛkoakʼ mãyãm leka hoyena ar jalapuriren sanam jiwiyanko doko gocʼena.

⁴Tayomte tesaricʼ serma goḍet do gaḍa dakʼ ar jharna dakʼ kore acʼakʼ bạṭiye dulkeda. Onate onako do mãyãm reakʼ gaḍa ar dakʼ jharnako hoyena.

⁵Ar dakʼ cetanre okoeṭakʼ serma goḍetakʼ ektiạri tahẽkantae uni do noa katha roroṛiń ańjomkedea: “E sonoticʼ, am do menamgea arem tahẽkana. Am dom dhoromgea, ente am do noako sạjạiyem emakana.

⁶Noko hoṛko do Isorren hoṛko ar nạbikoko khũnakatʼkoa. Onate am do onko noa mãyãm ńũi lạgitʼem emakatʼkoa ar noage onko lạgitʼ do lek kana.”

⁷Iń do pinḍ khon mitʼ hoṛ noa katha roroṛiń ańjomkedea: “Sanam daṛeạnicʼ Probhu Isor, amakʼ sanam bicạrko do sạrigea ar dhoromte perecʼgea.”

⁸Ponicʼ serma goḍet do siń cando cetanre acʼakʼ bạṭiye dulkeda. Onate siń cando do hoṛko seṅgelte jhạusạuko lạgitʼ ektiạriye emocoyena.

⁹Unre ãṭ elaṅte hoṛko loyena, ar noako sạjại cetanre okoeakʼ ektiạri menakʼtako onko do uni Isorko henostawadea. Menkhan onko do enrehõ mon bako ạcurleda ar Isor bako sabasiwadea.

¹⁰Tayomte mõṛẽyicʼ serma goḍet do uni janwarakʼ siṅghạson cetanre acʼakʼ bạṭi reakʼe dulkeda. Onate uni janwarakʼ rajosṭi do ńutena. Ar hasote hoṛko do akoakʼ alaṅko togocʼkeda ar haso ar ghao iạte onko do sermaren Isorko henostawadea, menkhan enrehõ akoakʼ bạṛicʼ kạmiko khon mon do bako ạcurletʼtakoa.

¹²Ona tayom turuyicʼ serma goḍet do maraṅ gaḍa Phurạtre acʼakʼ bạṭi reakʼe dulkeda. Onate purub disạmren rapajkoakʼ calakʼ hor tearokʼ lạgitʼ ona gaḍa reakʼ dakʼ do ańjetʼena.

¹³Unre iń do roṭe lekan pea bạṛicʼ jiu iń ńelketʼkoa. Onko do uni biń, uni janwar ar uni eṛe nạbiakʼ moca khonko oḍok hijukʼkan tahẽkana.

¹⁴Onko bạṛicʼ jiu do hahaṛa kạmiko kạmikan tahẽkana. Ar sanam daṛean Isorakʼ ona maraṅ dinre lạṛhại lạgitʼ onko do goṭa dhạrtiren rapajko mitʼ ṭhenko jarwaketʼkoa.

¹⁵Jisui meneda, “Ńelme, iń do kombṛo lekań hijukʼa. Bhạgangeae uni hoṛ, one okoe do jagware tahenkan ar acʼakʼ kicricʼkoe jogao dohoyetʼ, jemon laṅgaṭ alaoe dãṛãn ar hoṛko hõ uniakʼ lajaotetʼ aloko ńeltae.”

¹⁶Ibri pạrsite oka jaega reakʼ ńutum do Harmagedonko metakʼkan, bạṛicʼ jiuko do onko rapajko onḍeko jarwaketʼkoa.

¹⁷Ar eaeyicʼ goḍet do acʼakʼ bạṭi reakʼ hoe secʼe dulkeda. Unre mundil reakʼ siṅghạson khon ãṭ aṛaṅte noa katha roṛena, “Oka hoyokʼ reakʼ ona do hoyena.”

¹⁸Unre bijli malkaokʼ lagaoena, ạḍi botor saḍe ar huḍurko hoyena, ar ạḍi ãṭ dhạrti laṛaoena, one dhạrtire manwa sirjạu tayom ar tisge baṅ hoeakan. Ar ona dhạrti laṛao do ạḍi botorge tahẽkana.

¹⁹Ar ona maraṅ nagraha do pe hạṭińte hạṭińena ar jạt jạtrenkoakʼ nagrahako do lạnduṛena. Tayomte ona maraṅ nagraha Babel reakʼ katha Isor do disạ hecʼadea, uni do acʼakʼ edre reakʼ botoranakʼ bubulakʼte perecʼ bạṭi reakʼ ńũi lạgitʼ Babele emadea.

²⁰Unre mitʼke mitʼ dip do ńir pharakena ar buruko do ar baṅ ńel ńamlena.

²¹Serma khon lạṭu lạtu dhiri lekan arel manwako cetanre ńurokʼ ehopʼena. Ona mitʼke mitʼ reakʼ hamal do mitʼ mongan tahẽkana. Noa arel reakʼ sạjạite hoṛko do Isorko henostawadea, ente ona arel reakʼ sạjại do ạḍi botorge tahẽkana.