Read Santali Johan sodor 22 Bible Online

Johan sodor 22 - Santali bible

Johan sodor 22

¹Ona tayom uni serma goḍet do jion dakʼ reakʼ gaḍae udukʼ ạdińạ. Ona do dhiri hisir leka rilạ mala tahẽkana ar Isor ar Bheḍa Hoponakʼ siṅghạson ṭhen khon ạtu oḍokkate nagraha reakʼ kulhi talate ạtukʼkan tahẽkana. Ona gaḍa reakʼ dene banar aṛere jion dare tahẽkana. Onare do gelbar lekan jo jokʼa. Ar jao candoge onare do jokʼa ar ona reakʼ sakamte sanam jạtren hoṛko bogekʼ kana. Sarap do ar baṅ tahena.

³Isor ar Bheḍa Hoponakʼ siṅghạson do ona nagrahare tahena ar uniren golamko do uniko sewawaea.

⁴Onko do uniakʼ mẽtʼãhãko ńeltaea ar uniakʼ ńutum do onkoakʼ moloṅre ol tahena.

⁵Ńindạ do ar baṅ tahena ar onko do diuhe reakʼ marsal se siń cando reakʼ marsal hõ baṅ jạruṛakoa, ente Probhu Isor do acʼge onkoren marsale hoyokʼa. Ar jaejug hạbicʼ onko do rajko calaoa.

⁶Tayomte uni serma goḍet doe metadińạ, “Noako katha do pạtiạr ar sạrigea. Probhu Isor, one okoe do nạbiko hoteteye roṛletʼ tahẽkan, uni do acʼren goḍete kolakadea, jemon thoṛa ghạṛicʼ khange okaṭakʼ hoy lạgidokʼkan, ona do acʼren golamkoe udukʼ daṛeako.”

⁷Jisui meneda, “Ńelpe, iń do ạḍi usạrageń hijukʼ kana. Noa puthi reakʼ sanam katha, metakʼme Isorakʼ kathako okoeye manao uni doe bhạgangea.”

⁸Iń Johan do noakoń ańjom akada ariń ńel akada. Ar jotowakʼ ańjom ar ńel tayom, okoeṭakʼ serma goḍet noakoe udukʼ ạdiń, uni sewawae lạgitʼ uniakʼ jaṅga ṭheniń ombakʼena.

⁹Menkhan uni doe metadińạ, “Men, alo; iń do am ar amren biswạsi boehako, metakʼme nạbiko ar okoe do noa puthi reakʼ sanamakʼ kathako manaoetʼkan onkoren são golam kạnạń. Isorge baṛe sewawae me.”

¹⁰Ona tayom uni doe metadińạ, “Noa puthi reakʼ sanamakʼ kathako, metakʼme Isorakʼ katha am do alom oko dohokakʼa, ente oktetetʼ do sor akana. Bedhoromicʼ do, bedhoromtegeye tahenma,

¹¹ar okoe mạilạyicʼ uni do mạilạ iditegeye tahenma. Dhoromicʼ do dhorom iditegeye tahenma ar okoe doe sonotge uni do sonot iditegeye tahenma.”

¹²Jisui meneda, “Ńelme, hako pakogeń hijukʼkana ar mimitʼko akoakʼ kạmiko reakʼ kuṛại do iń soṅgerege menakʼa.

¹³Ińge Alpha ar Omega, pạhilicʼ ar sesicʼ, etohopʼ ar mucạtʼicʼ do.

¹⁴“Bhạgangeako onko do, one okoe do akoakʼ kicricʼko ạrupʼetʼkan jemon jion dare reakʼ jo jom reakʼ ạidạriko ńam ar duạr secʼte nagrahateko bolo daṛeakʼ.

¹⁵Setako lekan bạṛicʼ hoṛko, jạdu udukʼko, laṭghaṭko, khũniạhiko, murhutʼ sewako, eṛeakʼ dulạṛko ar eṛeakʼ kạmiko, onko sanamkoge bahrereko tahena.

¹⁶“Iń Jisuge ińren goḍet iń kolakadea, jemon uni do ape ṭhen manḍerko lạgitʼ noako reaṅ gohae em daṛeakʼ. Ińge Dạud reakʼ rehetʼ ar bõs, ar ḍag ḍagaokʼkan bhurkạ ipil do.”

¹⁷Sonot Jiu ar bạhu kuṛi dokin meneda, “Dela hijukʼme,” Ar okoe noa kathae ańjometʼ uni hõe menma, “Dela hijukʼme.” Okoe tetaṅede kan uni doe hijukʼma ar okoe dakʼ ńũi menetʼkan uni do begor damte jion dakʼe ńũ idi joṅma.

¹⁸Okoe hoṛ noa puthi reakʼ sanam katha, metakʼme Isorakʼ kathakoe ańjometʼkan, iń do uni ṭhen noa gohań emeda je, jãhãege noare jãhãnakʼe juṭicʼakʼ, enḍekhan Isor hõ noa puthire olakan sanam dukko uniakʼ jionreye juṭicʼaea.

¹⁹Ar noa puthi reakʼ sanam katha, metakʼme Isorakʼ katha khon jãhãege thoṛagane kaṭao enḍekhan Isor hõ noa puthire olakan jion dare ar ona sonot nagraha reakʼ ạidạri uniakʼ jion khone kaṭaoa.

²⁰Okoe noako reaṅe gohayetʼkan uniye meneda, “Sạrige iń do hako pakogeń hijukʼkana.” Amen. Probhu Jisu, dela hijukʼme.

²¹Probhu Jisuakʼ bhor Isorren sanam hoṛko lạgitʼ tahenma. Amen.