Read Santali Johan sodor 9 Bible Online

Johan sodor 9 - Santali bible

Johan sodor 9

¹Ona tayom mõṛẽyicʼ serma goḍet siṅgại oroṅkeda, ar unre mitʼṭen ipiliń ńel ńamkedea. Uni do serma khon dhạrtiteye ńurhạ akan tahẽkana. Ar uni ipil do athan kunḍ reakʼ choṛane emocoyena.

²Khan uni ipil do ona athan kunḍe jhicʼkeda; ar maraṅ okocʼ culhạ khon dhũạ oḍokokʼ leka, ona kunḍ khon dhũạ oḍokokʼ ehopʼena. Ona kunḍ reakʼ dhũạte siń cando ar serma do ńutena,

³ar ona dhũạ khon ạḍi utạr pohoko dhạrtiteko oḍok hecʼena. Onko do dhạrtiren kidiń kaṭkom leka ektiạriko emocoyena.

⁴Arko menocoyena dhạrti reakʼ ghãs se hạriạṛ jãhãnakʼ se jãhãn dareko alo jemonko nosṭoe; eken okoe hoṛkoakʼ moloṅre Isorakʼ mohor chap bạnukʼtako onkoko hạnko.

⁵Noko hoṛko gocʼko reakʼ jãhãn ektiạri do bako emocolena, menkhan mõṛẽ cando hạbicʼ saset emako reakʼ ektiạriko emocoyena. Kidiń kaṭkomkoko totoṛre cetʼleka hasoa, onkage noko pohoko hõko haso ocoa.

⁶Unre hoṛko do gujukʼko ńam baṛaea, menkhan okalekatege bako ńama; onko do gujukʼko khoja, menkhan gujukʼ do onko khone ńir pharakokʼa.

⁷Onko pohoko do ńelokʼte lạṛhại sapṛao akatʼko sadom leka. Onkoakʼ bohokʼre sona reakʼ mukuṭ lekanakʼ jinis tahẽkana, ar onkoakʼ mẽtʼãhã reakʼ rup do manwa leka tahẽkana.

⁸Onkoakʼ upʼ do maejiukoakʼ upʼ leka ar ḍaṭa do dhạcri kulakʼ ḍaṭa leka.

⁹Onkoakʼ koṛamre mẽṛhẽtʼ reakʼ aḍonakʼ leka kicricʼ tahẽkana. Ar ạḍi utạr sadomko lạṛhại gạḍiko kamsao idiyetʼ reakʼ sabad leka, onkoakʼ phạ̃kṛạ̃kʼ reakʼ sabad hõ tahẽkana.

¹⁰Onkoakʼ canḍbol ar suṅgạ do kidiń kaṭkomakʼ canḍbol ar suṅgạ leka tahẽkana. Mõṛẽ cando hạbicʼ hoṛko hạnko reakʼ ektiạri onkoakʼ canḍbolre tahẽkana.

¹¹Ar athan kunḍren goḍetge noko pohokoren raje tahẽkana. Ibri pạrsite uni goḍetakʼ ńutum do tahẽkana Abaddon, ar Greek pạrsite do Appoluon, metakʼme ḍahao maraoicʼ.

¹²Pạhilakʼ muskilakʼ do parom calaoena. Ar ńelme, noa tayom do arhõ barea muskilakʼ hijukʼkana.

¹³Ona tayom turuyicʼ serma goḍet do acʼakʼ siṅgại oroṅkeda. Ar Isor samaṅre okaṭakʼ sona reakʼ pinḍ menakʼ ona pinḍ reakʼ ponea dereń khon mitʼṭen hoṛ do katha roroṛiń ańjomkedea. Okoe ṭhen siṅgạ tahẽkan, uni turuyicʼ serma goḍete metadea,

¹⁴“Okoe ponea goḍet maraṅ gaḍa Phurạt ṭhenko tolakan onko raṛakakome.”

¹⁵Unre onko ponea goḍet doko raṛa ocoyena. Niạ bochor reakʼ niạ cando, niạ din ar niạ ghonṭa lạgitʼ onko goḍet doko sapṛao doho ocoakan tahẽkana jemon onko do pe hạṭiń reakʼ mitʼ hạṭiń manwako gocʼko.

¹⁶Ar tayomteń ańjomkeda, sadomre decʼakan palṭonko do lekhare gel hajar gun gel hajar reakʼ dobṛa tahẽkana.

¹⁷Dorsonte sadomko ar onko cetanre decʼakanko onkoakʼ koṛam reakʼ aḍonakʼ do seṅgel leka arakʼ, lil ar gondhok leka sasaṅ iń ńelketʼtakoa. Sadomkoakʼ bohokʼ do dhạcri kulakʼ bohokʼ leka ar onkoakʼ moca khon do seṅgel, dhũạ ar gondhok oḍokokʼkan tahẽkana.

¹⁸Seṅgel, dhũạ ar gondhok, noa pea dukte manwa do pe hạṭiń reakʼ mitʼ hạṭińko gocʼ ocoyena.

¹⁹Onko sadomkoakʼ do moca ar canḍbolrege daṛe tahẽkana, ente onkoakʼ canḍbol do biń leka tahẽkana. Onko do canḍbolko reakʼ agalte manwakoko hạnetʼko kan tahẽkana.

²⁰Menkhan noako duk tayom hõ okoeko manwa jiwetʼko tahẽyen, onko do apnar tite benao muṭhạnko khon mon bako ạcurletʼtakoa. Onko do bạṛicʼ jiuko ar baṅ ńeńelko, baṅ ańjomko, baṅ taṛam daṛeakʼ sona, rupạ, pitạl, dhiri ar kaṭren muṭhạnko benaokateko sewawakokan tahẽkana.

²¹Ona chaḍa khũn, jạdu, laṭghaṭ ar kombṛo, noako khon hõ mon bako ạcurleda.