Read Sayula Popoluca San Mateo 1 Bible Online

San Mateo 1 - Sayula Popoluca bible

San Mateo 1

¹Ayʉ̱́j libru nas̈actujawigap Jesucristu ifamiliajat. Je' min David ifamiliani'c mit David min Abraham ifamiliani'c.

²Abraham iwat Isaac, mit Isaac iwat Jacob, mit Jacob iwatcʉs̈ Judá mit ije̱wajyat.

³Mit Judá iwatcʉs̈ Fares mit Zara jeme itumuwatway Tamar, mit Fares iwat Esrom, mit Esrom iwat Aram.

⁴Mit Aram iwat Aminadab, mit Aminadab iwat Naasón, mit Naasón iwat Salmón.

⁵Mit Salmón iwat Booz jeme itumuwatway Rahab, mit Booz iwat Obed jeme itumuwatway Rut, mit Obed iwat Isaí.

⁶Mit Isaí iwat rey David, mit rey David iwat Salomón mit ayé itumuwajtau Urías ito's̈ay.

⁷Mit Salomón iwat Roboam, mit Roboam iwat Abías, mit Abías iwat Asa.

⁸Mit Asa iwat Josafat, mit Josafat iwat Joram, mit Joram iwat Uzías.

⁹Mit Uzías iwat Jotam, mit Jotam iwat Acaz, mit Acaz iwat Ezequías.

¹⁰Mit Ezequías iwat Manasés, mit Manasés iwat Amón, mit Amón iwat Josías.

¹¹Mit Josías iwatcʉs̈ Jeconías mit ije̱wajyat meru ayé tiempu Israelway jayajwat iguimunʉ́s̈caj to'ctʉgʉyic pa Babiloniajway na̱s̈.

¹²Cʉs̈ iguimunʉ́s̈caj pa Babiloniajway na̱s̈, Jeconías iwat Salatiel, mit Salatiel iwat Zorobabel.

¹³Mit Zorobabel iwat Abiud, mit Abiud iwat Eliaquim, mit Eliaquim iwat Azor.

¹⁴Mit Azor iwat Sadoc, mit Sadoc iwat Aquim, mit Aquim iwat Eliud.

¹⁵Mit Eliud iwat Eleazar, mit Eleazar iwat Matán, mit Matán iwat Jacob.

¹⁶Mit Jacob iwat José, María ina'u, mit María je' ayé ima̱m Jesús jeme inʉ'jywayey Cristu.

¹⁷Mit catorce familiajat i-ijt desde Abraham hasta David, mit it jacatorce familiajat desde David hasta iguimunʉ́s̈caj Israelway jayajwat pa Babiloniajway na̱s̈, mit desde iguimunʉ́s̈caj pa Babiloniajway na̱s̈ hasta imijn Cristu it jacatorce familiajat.

¹⁸Yʉname i-ijt Jesucristu. Ima̱m María nʉmic pa inicʉ'pa̱jtʉwa'n mit José, po antes inicʉ'pa̱tcʉjʉwa'n, wayaj itsʉ̱naj, mit ayé iway igui-acmijnau Espíritu Santu.

¹⁹Mit José jeme María ipʉgámpay pa ina'u, ayé tu'c jayau yacs̈icway mit igawanu igui-acwinchu̱cyo'ywa'n. Je' inʉm ni'c igajapʉgáj po iga-actujawiyáj nepʉn.

²⁰Po iguipensa̱jt wename, tu'c ángel iguique's̈ta̱jcau cucma'ni'c mit iguinʉjmau: —José, mi̱ nije'yu David ifamilia, campʉ̱twit is̈pʉcwa'n María pa into's̈ay, ni'c iway tsʉ̱napay ijo̱jtugum Espíritu Santu igui-acmijnau.

²¹Mit je' ijtʉ̱́j tu'c iway, mit inyajcáj inʉ'jy JESUS, ayé inʉmo'jcʉp ni'c je' isalva̱tcʉs̈áj ijayajwat mit ichi'tcʉs̈áj nu'pʉjʉn mal iwatcaway.

²²Nu'pʉjʉn ayʉ̱́j jat pa ma cumplia̱t lo que el Señor i-actunʉmway ayé profeta cuandu iguinʉjm:

²³Tu'c quis̈ay waya-iyáj, mit ijtʉ̱́j iway, mit iyajcajáj inʉ'jy Emanuel. Ayé inʉmo'jcʉp ni'c Dios tsʉ̱nap mit ʉjtsat.

²⁴Ima̱jutujc José, iwat as̈am iguinʉjmau el Señor i-ángel, mit ipʉctso̱u María pa ito's̈ay,

²⁵po iga-aguepu as̈am ito's̈ay hasta iguita̱jc iprimer-wáy, mit José iyajcau inʉ'jy JESUS.