Read Sayula Popoluca San Mateo 10 Bible Online

San Mateo 10 - Sayula Popoluca bible

San Mateo 10

¹Mit Jesús iya̱s̈cʉs̈ ma minga mam je' ayé doce ipʉctampajyat, mit imoygʉs̈ poder pa igui-acpichingawa'n demo̱nyujat mit pa igui-ac-oytangawa'n nu'pʉjʉn tu'nijatway.

²Mit yename inʉ'jyat ayé doce apóstojlat: Primeru Simón jeme inʉ'jywayey Pedro, mit i-ajch Andrés, Jacobo mit imajtsʉc Juan, ayé Zebedeo iwajyat.

³Mit Felipe, Bartolomé, Tomás, Mateo jeme ique'chumway impuestu, Jacobo Alfeo iway, mit Lebeo inʉ'jywayey Tadeo.

⁴Simón inʉmgajapay cananista, mit Judas Iscariote jeme ito'ctʉgʉyway Jesús.

⁵Jesús i-ajyu'tcʉs̈ ayé doce apóstojlat mit imanda̱tcʉs̈, inʉm: —Camnʉs̈ca nejʉm mam itsʉ̱nga caje'jatway judíujat, ne camtutʉgʉyga netu'c nʉ'jcopac mam itsʉ̱nga Samariajatway,

⁶po nʉ́s̈ca mam itsʉ̱nga Israelway jayajwat ni'c je'jat yo'ygap as̈am borregujat togoyijcatway.

⁷Mit inyʉmdacyo'ygáj ni'c tomo'ganu pa imanda̱twa'n Dios.

⁸Ac-oytánga tu'nijatway mit jeme itcʉjʉpay lla̱gas. Acjutuctá̱jca nam-o'guijcatway mit acpíchinga demo̱nyujat. Impʉctsougau ayʉ̱́j poder we'nu, we'ney camque'chumga neti.

⁹’Cammunʉs̈ca nejʉmay tumi̱n inbolsani'jcat, ne oro, ne plata, ne cobre.

¹⁰Ne cammunʉs̈ca morral to̱uni'c, ne cammunʉs̈ca mechc chec, ne mechc par cʉ'ac, ne porto̱n, ni'c tu'c yos̈watpay merecia̱tp iguimoygawa'n ma cay.

¹¹’Mit jʉmaygapa'tu nʉ'jcopac intutʉgʉygámpay, che'nga pʉn is̈pʉctsougámpay oy, mit tánga jem hasta inyʉs̈canuwa'n.

¹²Intʉgʉygawa'n en ayé tʉjc, saludá̱tca jeme tsʉ̱ngapay jem.

¹³Mit te jeme tsʉ̱ngapay jem is̈pʉctsougap oy, inyo'tcajáj Dios ma bendiciona̱tcʉs̈, po te is̈capʉctsougap oy, ingayo'tcajáj Dios neti pa je'jat.

¹⁴Mit te tambʉn is̈capʉctsougap ne igamaraugap lo que inyʉmgapay, píchinga en ayé tʉjc o en ayé nʉ'jcopac mit cus̈ícs̈ca pu's̈na' jeme itpay inta'ni'jcat pa ma jawiga ni'c je'jat ma̱lo'jcat.

¹⁵Iyacs̈ta'cway tʉnʉmgʉs̈ap ni'c ayé nʉ'jcopac jayajwat itunas̈cáj más mʉgʉc que ayé maljayajwat Sodomajatway mit Gomorrajatway en ayé s̈ʉjw ijuzga̱twa'n Dios.

¹⁶’Márauga. Tʉ-ajyu'tcʉs̈áj as̈am borregujat pa̱ju-awa'tsam. Tsʉ̱́nga listu as̈am tsanajyat, po camwatcaja mal nepʉn, niwátcʉjʉ as̈am palomajat.

¹⁷Nicuidá̱tcʉjʉ mit jayajwat ni'c is̈-entrega̱tcáj icʉ'jugujmat judíujat ijefejat, mit is̈raunipʉ'ngáj mam i-adora̱tca judíujat.

¹⁸Mit is̈munʉs̈cáj mam itsʉ̱nga gobernadojrat mit rejyat. Is̈munʉs̈cáj ni'c ʉ̱ is̈wangap, mit we'n inactujawigáj je'jat mit jeme caje'jatway judíujat ni'c ʉ̱ is̈cupʉjcap.

¹⁹Cuandu is̈-entrega̱tcáj, campensa̱tca nat inyicowangʉjʉwa'n o ti inyʉmgámpay. Ni'c en ayé hora Dios is̈actujawigáj ti inyʉmgámpay.

²⁰Ni'c caje' mijchat micotscáj, po is̈ajcotscáj ayé Espíritu Santu i-ajyu'tway Dios Nate̱jat.

²¹’Tu'c jayau i-ac-ago'jcʉ̱́j i-ajch, mit jatu'c jayau i-ac-ago'jcʉ̱́j iway, mit jayajwat tsuguinwatcáj mit ite̱jtat, mit i-ac-ago'jcʉjʉ̱́j.

²²Mit nu'pʉjʉn jayajwat is̈-angáj ni'c ʉ̱ is̈cupʉjcap. Po jeme imajmo'ámpay hasta icʉs̈pʉ'nwa'n ayʉ̱́j cosajat, ayé jayau nisalva̱jtʉ̱́j.

²³Cuandu is̈po'ctangáj en tu'c nʉ'jcopac, po'jca pa jatu'c. Iyacs̈ta'cway tʉnʉmgʉs̈ap ni'c ingatuyo'ybʉ'ngáj nu'pʉjʉn nʉ'jcopajcat Israejlatway antes tʉmi'nwa'n ʉ̱ jeme tʉjatway jayau.

²⁴’Tu'c pʉctampay catsʉ̱náj más oyninʉmic as̈am i-amayipay, mit tu'c yos̈watpay catsʉ̱námpey más oyninʉmic as̈am ijayc.

²⁵Oy te tu'c pʉctampay jajtʉpey as̈am i-amayipay. Mit oy te tu'c yos̈watpay iwatp nu'pʉjʉn as̈am ijayc. Te tu'c tʉjcajway inʉmgajau ni'c imuyos̈watp mʉjway demo̱nyu, más imalninʉmgáj jeme itʉcm tsʉ̱ngapay.

²⁶’Jemni'c campʉ̱tca jayajwat. Ca-itáj nejʉmay cosa naga-e'pcámpay, mit najawigáj nu'pʉjʉn cosa iwatcapay cuyu'tsic.

²⁷Lo que tʉnʉmgʉs̈apay anu'mu, nʉmga jayau-awa'tsam. Mit lo que inmaraugapay anu'mu, nʉmdacyo'yga mam iguimárauga nu'pʉjʉn jayajwat.

²⁸Mit campʉ̱tca jeme i-ago'gámpay incuerpujat ni'c je' iga-ago'gáj in-espíritu. Más oy pi pʉ̱tca ayé jeme oyámpay igui-actogoy in-espíritu mit incuerpujat jʉngʉtʉm.

²⁹’Najawigap ni'c oyap nas̈to'c mechc jonwájat por tu'c centavu, po te Dios igawamp, igamo'áj laj ne tu'c jojn ma ca'u na̱s̈ni'c, ni'c je' icuida̱tcʉs̈pey jonwájat.

³⁰Mit Dios ijawip pʉjʉn cuaypʉjc is̈aguepca incopacni'jcat.

³¹Jemni'c campʉ̱tca ni'c más mivalia̱tcap que jonwájat.

³²’Pʉmba'tu cawinchu̱gámpay iguinʉmwa'n ni'c tʉs̈-is̈cap, ʉ̱ we'ney tʉnyʉmáj ni'c tʉnis̈cap je' mam iguimarawa'n tʉnte̱t Dios jeme tsʉ̱napay tsajpni'c.

³³Po jeme winchu̱gámpay iguinʉmwa'n ni'c tʉs̈-is̈cap, ʉ̱ tʉnyʉmámpey ni'c tʉnga-is̈cap je' mam iguimarawa'n tʉnte̱t Dios jeme tsʉ̱napay tsajpni'c.

³⁴Inʉm Jesús: —Campensa̱tca ni'c tʉmín solo pa tʉs̈yacwa'n paz na̱s̈ni'c. Po como tʉmín, itáj lucha ni'c catsʉ̱ngáj de acuerdu jeme tʉs̈cupʉjcapay mit jeme tʉs̈cacupʉjcapay.

³⁵Jemni'c tu'c jayau imutsuguinwatáj ite̱t, mit tu'c to's̈ay imutsuguinwatáj ima̱m, mit tu'c jays̈e'p imutsuguinwatáj is̈ac.

³⁶Mit jayajwat tsuguintsʉ̱ngáj mit ifamiliajat.

³⁷’Jeme iwampay ite̱t mit ima̱m más que ʉ̱, ayé tʉnga-e'páj as̈am tʉnjayau. Mit jeme iwampay iwajyat más que ʉ̱, ayé tʉnga-e'pámpey as̈am tʉnjayau.

³⁸Mit jeme catsʉ̱námpay dispuestu iguitunas̈wa'n, ayé tʉnga-e'páj as̈am tʉnjayau.

³⁹Jeme icuida̱támpay ivida pa je'yu, i-actogoyáj. Mit jeme i-actsʉ̱námpay ivida por togoyic ni'c tʉs̈wamp ʉ̱, iguarda̱táj pa tu'c vida cacʉs̈ámpay.

⁴⁰Inʉm Jesús: —Jeme is̈pʉctsougapay mijchat, casi ʉ̱ tʉs̈pʉctso̱p. Mit jeme tʉs̈pʉctso̱pay ʉ̱, ipʉctso̱pey Dios Nate̱jat jeme tʉs̈ajyu'tway.

⁴¹Jeme ipʉctso̱pay tu'c profeta ni'c je' Dios igui-ajyu't, je' ipʉctsowámpey nije'yu premiu ipʉctso̱pay tu'c profeta. Mit jeme ipʉctso̱pay tu'c jayau oyway ni'c je' iwatp puru cosa oyway, je' ipʉctsowámpey nije'yu premiu ipʉctso̱pay tu'c jayau oyway.

⁴²Mit jeme imo'ámpay tu'c taza maja-oynʉ'aj tu'c tʉmpʉctampay, iyacs̈ta'cway je' ipʉctsowámpey ipremiu.