Read Sayula Popoluca San Mateo 13 Bible Online

San Mateo 13 - Sayula Popoluca bible

San Mateo 13

¹Cʉs̈ pichinatu Jesús en ayé tʉjc mam itsʉ̱na mit nitsʉ̱nda̱jcʉu laguna-auni'c.

²Mit ni-apʉcmujcʉjʉu mayo'c jayau mam je' itsʉ̱na. Mit je' tʉgʉy en tu'c aj mit nitsʉ̱nda̱jcʉu. Mit nu'pʉjʉn ayé jayajwat tangau laguna-auni'c.

³Mit Jesús i-ajque's̈cʉs̈au mayo'c cosajat, itumuquips̈cʉs̈au cuentujat, inʉm: —Márauga. Tu'c ni̱payna' nʉcs̈ iguini'p trigu.

⁴Mit mam iguis̈ics̈ ayé semilla, una̱c ca'ugau to̱u-auni'c. Mit mingau jonwájat, icaygau ayé semilla.

⁵Ja-una̱c semilla ca'ugau tsa-awa'tsam mam iga-ijt may na̱s̈, mit s̈u̱mgau jaran ni'c cajucu itʉ́gʉygaj.

⁶Po ipichijn s̈ʉjw, toygau ayé matawájat mit tʉ̱tscau ni'c caticchictʉgʉyu.

⁷Ja-una̱c semilla ca'ugau apit-awa'tsam mit iye'jcaj apitna'jat, igamoygawu laj pa iye'jcawa'n ayé matawájat.

⁸Mit japu̱t semilla ca'ugau mam i-oyi na̱s̈ mit tʉmwatcau. Una̱c semilla iyajcau hasta cien trigupu̱jwájat, mit ja-una̱c iyajcau sesenta mit ja-una̱c iyajcau hasta treinta.

⁹Jeme ijtʉpay ita̱tsʉc pa iguitumarawa'n, ma marau lo que tʉnyʉmpay.

¹⁰Mit cʉs̈ Jesús ipʉctampajyat iguicutomigau mit iguinʉmgajau: —¿Tini'c is̈mucotscʉs̈ ayé jayajwat mit cuentujat?

¹¹Mit Jesús ipo'ngʉs̈: —Dios is̈actujawigap mijchat jeme tsʉ̱naway cuyu'tsic nat imanda̱twa'n, po japu̱t jayajwat ca-oyap iguijawiga ayé.

¹²Ni'c pʉmba'tu jeme ijtʉpay may, imoygáj pa ma ijtʉ más may. Po jeme ca-ijtʉpay may, ichi'tcajáj nu'pʉjʉn ijtʉway.

¹³Jemni'c je'jat tʉnmucotscʉs̈p mit cuentujat ni'c e'pcap po iga-is̈capcap lo que i-e'pcapay. Mit maraugap po igajawigap ti imaraugapay ne iga-entendia̱tcap.

¹⁴Iguijatcap we'n pa ma cumplia̱t lo que inʉmway profeta Isaías, inʉm: Mijchat inmaraugáj po inga-entendia̱tcáj, mit in-e'pcáj po inga-is̈capcáj ti in-e'pcapay.

¹⁵Ni'c ayʉ̱́j jayajwat niwatcʉjʉu mʉgʉc ijo̱tni'jcat, mit igamaraugap oy ita̱tsʉcni'jcat, i-api'chcau iwijnat maga-e'pca, i-atujcau ita̱tsʉjcat magamarauga, ne ca-oyap igui-entendia̱tca ijo̱tni'jcat, iwatcap we'n pa tʉs̈cacupʉjcáj, mit we'n ca-oyáj tʉs̈ac-oytangʉs̈.

¹⁶’Po mijchat mitsʉ̱ngap oy ni'c intu-e'pcap inwijnat mit intumaraugap inta̱tsʉjcat lo que tʉnʉmgʉs̈apay.

¹⁷Iyacs̈ta'cway tʉnʉmgʉs̈ap ni'c may profetajat mit may jayajwat yacs̈ijcatway ijawangau igui-e'pcawa'n lo que in-e'pcapay jinap, po iga-is̈cawu. Mit ijawangau iguimaraugawa'n lo que inmaraugapay jinap, po igamaraugawu.

¹⁸’Márauga lo que inʉmo'jcʉpay ni̱payna' icuentu.

¹⁹Cuandu tu'c jayau iguimarau lo que inʉmway Dios nat imanda̱twa'n mit te iga-entendia̱tp, ayé as̈am semilla jeme ca'way to̱u-auni'c. Ni'c mimp ayé ma̱lwayna' mit iguichi'jtap lo que Dios iguiyajcaway ijo̱tni'c.

²⁰Mit ayé semilla jeme ca'way tsa-awa'tsam, ayé as̈am tu'c jayau jeme imarapay lo que Dios inʉmway, mit ipʉctso̱p jaran, mit ji'cp ijo̱jt.

²¹Po je' as̈am ayé mata ca-ijtʉpay ticchic, jecp s̈ʉ̱nu. Mit i-itwa'n pʉ̱tna̱s̈ mit iguipo'ctangáj jayajwat ni'c je' icupʉcp ayé inʉmway Dios, je' icuyaguip jaran lo que icupʉcway.

²²Mit ayé semilla jeme ca'way apit-awa'tsam, ayé as̈am tu'c jayau imarapay lo que inʉmway Dios, po pensa̱to'cp ti iwatámpay en ayʉ̱́j mundu. Más niwe̱jtʉp iguiwa'nwa'n may tumi̱n hasta ca-oyap iguimutanga mʉgʉc lo que inʉmway Dios.

²³Mit ayé semillajat jeme ca'ugaway mam i-oyi na̱s̈, ayé as̈am tu'c jayau jeme imarapay lo que inʉmway Dios, mit i-entendia̱tp ayé, mit yos̈watp más pa Dios. Mit ayé jayajwat as̈am ayé trigupu̱jwájat, tu'c iyac hasta cien, mit jatu'c sesenta, mit jatu'c treinta.

²⁴Mit Jesús i-ampiugʉs̈au jatu'c cuentu, inʉm: —Tʉ-actujawigʉs̈áj nat imanda̱t Dios. Ayé as̈am tu'c jayau jeme ini̱pway oyway trigu-semilla icamni'c.

²⁵Po en tu'c tsu' cuandu imá̱gaj jayajwat, min imutsuguin mit ini̱pey malma'jts isemilla mam iguini̱jp ayé trigu, mit nʉcs̈nuatu jaran.

²⁶Mit is̈u̱jm ayé trigu mit itʉmwajt, s̈u̱mey ayé malma'jts.

²⁷Mit ayé mozojat oy igui-ajque's̈caja ijaycat, mit inʉmgajau: “Señor, mi̱ inyi̱p oyway semilla incamni'c. ¿Jʉmpaj imijn ayé malma'jts?”

²⁸Je' inʉmgʉs̈au: “Tu'c tʉnmutsuguin ini̱p ayé.” Ayé mozojat i-ucyo'tcau: “¿Inwamp tʉnʉs̈cawa'n tʉs̈wis̈ca ayé malma'jts?”

²⁹Je' inʉmgʉs̈au: “Ca̱j, pigatumuwis̈ca trigu ayé malma'jts.

³⁰Tsac ma ye'jca inimechcatij hasta nas̈tujcawa'n, mit tʉnyʉmgʉs̈áj tucpayna'jat: Apʉcmujcʉ'jca ayé malma'jts mit atsumújca pa is̈no'jcawa'n. Mit apʉcmújca ayé trigu mam tʉs̈guarda̱t.”

³¹Mit i-ampiugʉs̈au jatu'c cuentu pa ma jawiga ni'c Dios ijayajwat mayigáj, inʉm: —Tʉ-actujawigʉs̈áj nat imanda̱t Dios. Ayé as̈am tu'c mostaza-semilla. Ni'c tu'c jayau imunʉcs̈ ayé semilla mit ini̱p icamni'c.

³²Mit ayé mostaza-semilla más titic de nu'pʉjʉn semilla, po iye'cwa'n mʉj, ayé jatp más mʉj que nu'pʉjʉn ma'jts, mit ye'cp as̈am tu'c cujy, mit mingap jonwájat, mit iwatcap ipe'jnat i-awecni'jcat.

³³Mit i-ampiugʉs̈au jatu'c cuentu, inʉm: —Tʉ-actujawigʉs̈áj nat imanda̱t Dios, ayé as̈am levadura. Ni'c tu'c to's̈ay ipʉc ayé levadura mit iyac en tu̱gup medida de harina, mit iwat bien motic hasta itimajm mʉj.

³⁴Jesús imucotscʉs̈ ayé jayajwat mit puru cuentujat, mit siempre itumuquips̈cʉs̈au cuentujat.

³⁵Iwat we'n pa ma cumplia̱t lo que inʉmway ayé profeta, inʉm: Tʉnmucotscʉs̈áj mit puru cuentujat. Tʉnyʉmáj jeme tsʉ̱naway cuyu'tsic desde ichu̱chij ayʉ̱́j mundu.

³⁶Mit cʉs̈ Jesús i-acnʉs̈cʉs̈nuw ayé jayaujuc, mit tʉgʉy tujugum. Mit iguicutomigau ipʉctampajyat, iguinʉmgajau: —Actujawigac ayé cuentu mam tu'c maljayau iguini̱jp malma'jts camni'c.

³⁷Jesús ipo'ngʉs̈: —Jeme ini̱pay oyway semilla, ayé inʉmo'jcʉp ʉ̱ jeme tʉjatway jayau.

³⁸Ayé cam inʉmo'jcʉp ayʉ̱́j mundu, mit ayé oyway semilla inʉmo'jcʉp Dios ijayajwat jeme imanda̱tcʉs̈pay, mit ayé malma'jts inʉmo'jcʉp ma̱lwayna' ijayajwat.

³⁹Mit ayé mutsuguin jeme ini̱pway malma'jts, ayé inʉmo'jcʉp Awayagatsna'. Ayé cosecha inʉmo'jcʉp ayé tiempu icʉs̈wa'n nu'pʉjʉn, mit ayé tucpayna'jat inʉmo'jcʉp Dios i-ángejlat.

⁴⁰As̈am iguiwis̈ca ayé malma'jts mit ino'jcap jʉngʉtʉm, wename-ey ijatwa'n cuandu icʉs̈wa'n nu'pʉjʉn.

⁴¹Mit ʉ̱ jeme tʉjatway jayau tʉnajyu'tcʉs̈áj tʉn-ángejlat ma aparta̱tca ayé jayajwat, mit mam tʉmanda̱twa'n tʉngamoygʉs̈áj laj ma tʉgʉyga nu'pʉjʉn jeme i-actuwatcapay mal japu̱jtat, mit nu'pʉjʉn iwatcapay mal.

⁴²Mit ica'tstʉgʉygáj en tu'c hornu mam itinin mʉgʉc, mit jem jayajwat ijʉygawa'n mit iguitunas̈cawa'n mʉgʉc.

⁴³Wejpu'n jeme iwatcapay iyacs̈ta'cway que's̈cáj oymanac mam imanda̱t Dios Nate̱jat as̈am s̈ʉwáy ique's̈ oymanac. Jeme ijtʉpay ita̱tsʉc pa iguitumarawa'n, ma marau lo que tʉnyʉmpay.

⁴⁴’Mit Jesús i-ampiugʉs̈au jatu'c cuentu pa ma jawiga ni'c más valia̱tp nas̈manda̱tcáj Dios, inʉm: Tʉ-actujawigʉs̈áj nat imanda̱t Dios, ayé natumuquips̈p as̈am tu'c tumi̱njuc jeme tsʉ̱naway cuyu'tsic cuyjugum. Mit tu'c jayau icupa̱tiu ayé tumi̱njuc mit icuyu'tsatu, mit ji'c ijo̱jt, mit oy iguito'c nu'pʉjʉn ijtʉway, mit ijuy ayé na̱s̈.

⁴⁵’Ni-as̈amu natumuquips̈p nat imanda̱t Dios. Ayé as̈am tu'c juypayna' jeme iche'mpay puru oyway perlajat, ayé ipʉjcap pa ta̱tsʉctʉy.

⁴⁶Mit iguipa̱jt tu'c perla jeme tsowajway, je' nʉcs̈ iguito'c nu'pʉjʉn ijtʉway mit ijuy ayé perla.

⁴⁷Inʉm Jesús: —Tʉ-actujawigʉs̈áj nat imanda̱t Dios, ayé as̈am tu'c tsamac ica'tstʉgʉygapay lama̱tni'c, mit i-actamp nu'pʉjʉn clase de acs̈wájat.

⁴⁸Mit ipats ayé tsamac, i-acpichingap pa lama̱t-auni'c, mit nitsʉ̱nda̱jcʉjʉp pa iguicupiugawa'n acs̈ jeme oyway mit icomgap ca'cni'c. Mit jeme ca-oyway icucachigap.

⁴⁹Wename-ey ijatwa'n cuandu icʉs̈wa'n nu'pʉjʉn. Mingáj Dios i-ángejlat mit icupiugáj ayé jayajwat jeme iwatcaway oy, mit jayajwat iwatcaway mal iyajcáj jatu'c laj.

⁵⁰Mit ica'tstʉgʉygáj en tu'c hornu mam itinin mʉgʉc, mit jem ijʉygawa'n mit iguitunas̈cawa'n mʉgʉc.

⁵¹Jesús i-ucyo'tcʉs̈ ipʉctampajyat: —¿In-entendia̱tcau nu'pʉjʉn tʉnʉmgʉs̈away? Iguipo'ngau: —Jo̱, Señor.

⁵²Mit inʉmgʉs̈au: —Jemni'c nu'pʉjʉn jayau i-is̈capay ley, te ipʉctamp nat imanda̱t Dios, je' jatáj as̈am tu'c tʉ́jcajway ijtʉpay nu'pʉjʉn, cosa namay mit cosa ampayway.

⁵³Mit cʉs̈ Jesús igui-ampiugʉ́s̈aj ayʉ̱́j cuentujat, pichin jem.

⁵⁴Mit icojy itʉcmayna̱s̈, i-ajque's̈cʉs̈au mam judíujat i-adora̱tca hasta nigu-épigʉjʉu, mit inʉmgau: —¿Pʉn iguimoy lo que ijawipay, mit pʉn iguimoy pa iguiwatwa'n majatway milagrujat?

⁵⁵Ayʉ̱́j ayé cuys̈echpayna' iway, mit ima̱m inʉ'jy María, mit imajtsʉjcat inʉ'jyat Jacobo, José, Simón mit Judas.

⁵⁶Mit imajtsʉcmá̱jmat yam itsʉ̱nga ʉjtsat nanʉ'jcopacni'jcat. ¿Jʉmpaj iguimijnau nu'pʉjʉn ijawipay? We'n iguipensá̱tcaj ayé jayajwat.

⁵⁷Jemni'c ca-oyawu iguicupʉ́jca. Po Jesús inʉmgʉs̈au: —Tu'c profeta tsʉ̱nap oyninʉmic jʉmba'tu, po catsʉ̱nap oyninʉmic je' inʉ'jcopacni'c ne mit itʉcm tsʉ̱ngapay.

⁵⁸Mit Jesús igawatu jem may milagrujat ni'c igacupʉjcawu je'.