Read Sayula Popoluca San Mateo 14 Bible Online

San Mateo 14 - Sayula Popoluca bible

San Mateo 14

¹En ayé tiempu Herodes manda̱t Galileajway na̱s̈, mit imarau lo que iwatpay Jesús,

²mit Herodes inʉmgʉs̈au imozojat: —Ayʉ̱́j dejuru Juan nʉ'gutempay. Je' jutucta̱gatu mam itsʉ̱nga á̱nimajat, mit jemni'c ijtʉp may poder pa iguiwatwa'n milagrujat.

³Ni'c cuandu Juan iyo'jy, Herodes manda̱t ma actanga mit icutsumda̱jcau cuytujugum. Iwat we'n ni'c Herodes ipʉjcau Felipe ito's̈ay, ayé to's̈ay inʉ'jy Herodías, mit Felipe ayé Herodes ije̱way.

⁴Herodes icom cuytujugum Juan ni'c iguinʉjmau: —Ca-oy is̈pʉjcawa'n inje̱way ito's̈ay.

⁵Mit Herodes iwan igui-ago'cwa'n, po ipʉ̱t nʉ'jcopac jayau ni'c inʉmgau ni'c Juan tu'c profeta i-ajyu'tway Dios.

⁶Po cuandu Herodes iguitsojw is̈ʉjw, Herodías iwaymá̱m ech mam itsʉ̱nga imvitá̱tijcatway, mit Herodes inijat.

⁷Mit je' ijura̱jtau iguimo'wa'n tiyu iguiyo'jtámpay.

⁸Po ayé quis̈ay igui-acochiu ima̱m ti iyo'támpay, mit inʉjmau Herodes: —Mojyac puna̱tuni'c Juan nʉ'gutempayna' icopac.

⁹Mit cʉs̈ rey Herodes tu'no'c ijo̱jt, po ni'c ijura̱jtau mit imaraugawey jeme tsʉ̱ngaway mit je' me̱s̈ani'c, je' manda̱t ma entrega̱tcaja Juan icopac.

¹⁰Mit i-ajyu'tcʉs̈ imozojat ma pus̈tújcaja Juan icopac mam itsʉ̱na cuytujugum.

¹¹Mit cʉs̈ imumingajau Juan icopac en tu'c puna̱tu, mit i-entrega̱tcajau ayé quis̈ay, mit je' imunʉs̈au ima̱m.

¹²Mit cʉs̈ mingau Juan ipʉctampajyat mit imunʉs̈cajau icuerpu mit ini̱pcajau. Mit nʉs̈ igui-ajque's̈caja Jesús.

¹³Mit iguimarajw we'n Jesús, pichin jem en tu'c aj pa tu'c lugar mam igatsʉ̱na nepʉn. Mit iguijáwigaj ayé jayaujuc, inatspoguigau ta'nam desde ayé nʉ'jcopajcat.

¹⁴Mit icojy Jesús laguna-auni'c, je' pichin ajni'c mit i-is̈ ayé jayaujuc mit i-ayo̱wis̈cʉs̈. Mit i-ac-oytangʉs̈ tu'nijatway jeme imuyo'ygaway ayé jayajwat.

¹⁵Mit icutsu'ij, iguicutomigau ipʉctampajyat, iguinʉmgajau: —Yam ca-itp tʉjcat mit tsu'jito'ganu. Acnʉs̈cʉs̈ ayʉ̱́j jayaujuc pa nʉ'jcopacni'jcat pa iguijuygawa'n ti icaygámpay.

¹⁶Po Jesús ipo'ngʉs̈: —Canesita̱tp inʉs̈cawa'n. Moyga mijchat ti icaygámpay.

¹⁷Mit je'jat iguinʉmgajau: —Tʉnaguepcap yam cinco ma̱s̈anʉ̱nwájatu, mit mechc acs̈wájat.

¹⁸Mit Jesús inʉmgʉs̈au: —Mumingajac yam.

¹⁹Mit inʉmgʉs̈au ayé jayajwat ma nitsʉ̱ndá̱jcʉjʉ mʉyni'c. Iguipʉjcʉs̈ ayé cinco ma̱s̈anʉ̱nwájat mit ayé mechc acs̈wájat, yuc-e'p tsajpni'c mit ibendiciona̱t ayé cayan. Mit cʉs̈ i-emgada̱c mit imoygʉs̈ ipʉctampajyat ayé ma̱s̈anʉ̱n, mit ayé pʉctampajyat i-acpas̈angau pa ayé jayaujuc.

²⁰Mit caybʉ'ngau mit cu̱s̈cʉjʉu. Mit cʉs̈ i-apiumujcanuw doce ca'c patsijcat mit ayé ma̱s̈anʉ̱ncutucwájat jeme icaytangaway.

²¹Mit it cinco mil jayajwat jeme caygaway, aparte to's̈ajyat mit ya̱wájat.

²²Mit cʉs̈ Jesús inʉmgʉs̈au ipʉctampajyat ma tʉgʉyga ajni'c mit ma nʉs̈ca tuganʉ-ájw mientras je' i-acnʉs̈cʉs̈p ayé jayaujuc.

²³Mit inʉ́s̈canuj ayé jayaujuc, je' cu't itu'gumu en tu'c copac pa i-ora̱twa'n. Mit jem itsʉ̱na itu'gumu hasta tsu'm.

²⁴Po wejpu'n ayé aj tsʉ̱nau hasta es̈pu̱t laguna, mit ayé nʉ-ola iguitsactsougau ni'c mʉgʉgo'c s̈e'm i-it.

²⁵Mit jopoytsu'mnaj iguicutomigau Jesús, mit je' yo'y lagunayucuinm.

²⁶Mit igui-ís̈caj ayé pʉctampajyat ni'c yo'yp lagunayucuinm, je'jat ni-apʉ̱tigʉjʉu, inʉmgau: ¡Mimp tu'c á̱nima! Mit ya̱s̈cau ni'c pʉ̱to'jcau.

²⁷Po Jesús imucotscʉs̈ jaran, inʉm: —Camdesmaya̱tca, ni'c ʉ̱ tʉmimp. Campʉ̱tcawit.

²⁸Mit cʉs̈ Pedro po'n jaran: —Señor, te mi̱j ayé, nʉm tʉnʉ́s̈ey ʉ̱ nʉ'yucuinm mam intsʉ̱na.

²⁹Jesús inʉjmau: —Yam mi'n. Mit cʉs̈ Pedro imanajc ajni'c, yo'y nʉ'yucuinm pa inʉs̈wa'n mam Jesús.

³⁰Po igui-is̈ ni'c s̈ujo'c mʉgʉc ayé s̈e'm, pʉ̱jtʉgʉy mit chu̱chiu cutogoypay. Mit ya̱s̈ mʉgʉc, inʉm: —Señor, salva̱tac.

³¹Mit cʉs̈ Jesús i-actan jaran, mit inajau: —¡Mi̱ migacupʉcp may! ¿Tini'c induda̱t?

³²Mit itʉ́gʉygaj ajni'c, tentan ayé s̈e'm.

³³Mit jeme tsʉ̱ngaway ajni'c, iguicutomigau mit i-adora̱tcau, inʉmgau: —Iyacs̈ta'cway mi̱j ayé Dios is̈wáy.

³⁴Mit inas̈tújcaj en ayé laguna, coygau Genesaretway na̱s̈.

³⁵Iguijawigaj ni'c coy Jesús, i-ajque's̈cajau nu'pʉjʉn tsʉ̱ngaway en ayé na̱s̈, mit je'jat imumingajau nu'pʉjʉn tu'nijatway.

³⁶Mit ayé tu'nijatway iyo'tcajau favor Jesús ma iguimoygac laj iguitsʉjcajawa'nu ijamuc-au-á̱m. Mit nu'pʉjʉn itsʉjcajaway oytangau jaran.