Read Sayula Popoluca San Mateo 2 Bible Online

San Mateo 2 - Sayula Popoluca bible

San Mateo 2

¹Cuandu Jesús i-ijt en ayé nʉ'jcopac Belén Judeajway na̱s̈, ma̱gujat orienteway coygau Jerusalén, mit wejpu'n manda̱t rey Herodes,

²mit je'jat i-ucyo'tcau: —¿Jʉm itsʉ̱na ayé jeme itway pa ijatwa'n judíujat irejyat? Ni'c tʉn-is̈cajau ima̱jts mam tʉtsʉ̱́ngaj oriente mit tʉmingau pa tʉs̈-adora̱tcawa'n.

³Iguimarajw we'n rey Herodes, je' pensa̱to'c mit we'ney nu'pʉjʉn jayajwat tsʉ̱ngapay Jerusalén.

⁴Mit ayé rey igui-apʉcmujcʉs̈ nu'pʉjʉn judíujat imʉjpa̱nijat mit jeme i-ajque's̈capay ley nʉ'jcopacni'c, i-ucyo'tcʉs̈ jʉm i-itwa'n Cristu.

⁵Mit je'jat inʉmgajau ni'c Cristu itáj nʉ'jcopac Belén Judeajway na̱s̈ ni'c we'n iguija'jy ayé profeta, inʉm:

⁶Ayé nʉ'jcopac Belén tsʉ̱napay Judeajway na̱s̈, ayé tsʉ̱náj más mʉjninʉmic que japu̱t nʉ'jcopajcat mam itsʉ̱nga manda̱tpajyat Judeajway na̱s̈, ni'c jem pichináj tu'c jeme más manda̱támpay, mit je' imanda̱táj tʉnjayajwat Israejlatway.

⁷Cʉs̈ Herodes iya̱s̈cʉs̈ anu'mu ayé ma̱gujat, mit i-ucyo'tcʉs̈ oymanac mu̱tij ique's̈ta̱jc ayé ma̱jts.

⁸Mit je' i-ajyu'tcʉs̈ pa Belén, inʉm: —Nʉ́s̈ca jem, che'nga oymanac ayé qui'chwáy. Mit is̈pa̱tcawa'n, is̈ajyu'tcajáj razón pa we'n tʉnʉs̈ámpey pa tʉs̈-adora̱twa'n.

⁹Iguimáraugaj ayé rey, pichingau jem. Mit ayé ma̱jts i-is̈caway oriente nʉcs̈ jʉpm de je'jat hasta icojy ayé lugar mam itsʉ̱na qui'chwáy, mit jem itentajn.

¹⁰Igui-ís̈caj ayé laj mam itentajn ayé ma̱jts, ji'cta̱jcau ijo̱jtat.

¹¹Mit itʉ́gʉygaj tujugum, i-is̈cau ayé qui'chwáy mit ima̱m María, mit nicos̈atenda̱jcʉjʉu mit i-adora̱tcau je'. Igui-awá̱tscaj ayé caja itumuyo'ygaway regalu, iyajcajau regalu de oro, po̱m mit tu'c po't pa'cs̈u'cpay inʉ'jyway mirra.

¹²Mit Dios i-actujawigʉs̈ cucma'ni'c magajapítujca mam itsʉ̱na Herodes. Cʉs̈ je'jat pichingau pa jatu'c to̱u pa itʉcmayna̱s̈at.

¹³Mit cʉs̈ inʉ́s̈canuj ayé ma̱gujat, el Señor i-ángel ique's̈ta̱jcau José cucma'ni'c mit inʉjmau: —Ca's̈ʉ'c, munʉs̈cʉs̈ ayé qui'chwáy mit ima̱m, mit po'jca pa Egiptojway na̱s̈, mit tan jem hasta tʉnʉjmawa'n, ni'c Herodes iche'náj ayé qui'chwáy pa igui-ago'cwa'n.

¹⁴Mit cʉs̈ je' ca's̈ʉ'c mit imunʉs̈cʉs̈ tsu'm ayé qui'chwáy mit ima̱m pa Egiptojway na̱s̈,

¹⁵mit jem itángaj hasta i-o'jc Herodes. Ayʉ̱́j jat pa ma cumplia̱t lo que el Señor i-actunʉmway ayé profeta, inʉm: “Tʉnya̱s̈ tʉnwáy ma pichin de Egiptojway na̱s̈.”

¹⁶Cʉs̈ Herodes igui-is̈ ni'c iguiwe̱jta̱jcau ayé ma̱gujat, je' awa'niu mʉgʉc, mit manda̱t ma ago'jca nu'pʉjʉn qui'chwájat tsʉ̱ngaway Belén mit nu'pʉjʉn tsʉ̱ngaway en ayé na̱s̈. I-ago'jcʉs̈ jeme itcʉjʉpay mechc s̈iwit o más yajwatnajway. Je' ipʉc ayé tiempu cuandu igui-ucyo'tcʉs̈ ayé ma̱gujat.

¹⁷Wenajpu'n icumplia̱jt lo que inʉmway ayé profeta Jeremías, inʉm:

¹⁸Namarap ijʉ́yga to's̈ajyat Ramájway na̱s̈, mit jʉygap mʉgʉc ni'c tu'ngap ijo̱jtat, Israelway to's̈ajyat inijʉygap iwajyat, mit ca-oyap itsʉ̱nga consola̱tic ni'c togoybʉ'ngau iwajyat.

¹⁹Po i-o'jc Herodes, el Señor i-ángel ique's̈ta̱jcau José cucma'ni'c mam itsʉ̱na Egiptojway na̱s̈,

²⁰inʉjmau: —Ca's̈ʉ'c, munʉs̈cʉs̈nuatu ayé qui'chwáy mit ima̱m pa Israelway na̱s̈ ni'c o'jcaway ayé jeme iche'ngaway ayé qui'chwáy pa igui-ago'jcawa'n.

²¹Mit cʉs̈ je' ca's̈ʉ'c mit imunʉs̈cʉs̈ ayé qui'chwáy mit ima̱m pa Israelway na̱s̈.

²²Po José iguimarajw ni'c Arquelao manda̱tp Judeajway na̱s̈ ilugarni'c ite̱t Herodes, je' pʉ̱t inʉs̈wa'n jem, mit i-actujawigawatu cucma'ni'c maganʉs̈wit jem, mit je' nʉcs̈ pa Galileajway na̱s̈.

²³Mit icojy jem, tan en tu'c nʉ'jcopac inʉ'jyway Nazaret. Ayʉ̱́j jat pa ma cumplia̱t lo que inʉmgaway profetajat: Inʉmgáj ni'c Jesús Nazaretway.