Read Sayula Popoluca San Mateo 20 Bible Online

San Mateo 20 - Sayula Popoluca bible

San Mateo 20

¹’Mit natumuquips̈p nat imanda̱t Dios. Ayé as̈am tu'c jayau ijtʉpay tu'c uvajuc. Je' pichin jopoyit iguiche'n mozojat pa iyos̈watcawa'n i-uvajugum.

²Mit iwat tu'c acuerdu mit ayé mozojat ni'c itso̱jcʉs̈áj diez pesu tu'c s̈ʉjw, mit i-ajyu'tcʉs̈ i-uvajugum.

³Mit a las nueve pichinatu, mit i-is̈ plazani'c japu̱t jayajwat jeme ca-itcʉjʉpay yos̈.

⁴Mit inʉmgʉs̈au: “Nʉ́s̈ca-ey yos̈wátca tʉn-uvajugum mit tʉtso̱jcʉs̈áj tu'c sueldu oyway.” Mit je'jat nʉs̈cau.

⁵Mit je' pichinatu pu̱ts̈ʉjw mit we'ney a las tres de la tarde, mit ipa̱t más jayajwat mit inʉmgʉs̈au ni-as̈amu.

⁶Mit ipichijn a las cinco de la tarde, ipa̱t japu̱t jayajwat jeme ca-itcʉjʉpay yos̈, mit inʉmgʉs̈au: “¿Tini'c yam mitsʉ̱ngapu najs̈ʉjw, mit migayos̈watcap?”

⁷Mit iguipo'ngau: “Ni'c nepʉn tʉs̈caniche'ngap.” Mit je' inʉmgʉs̈au: “Nʉ́s̈ca-ey yos̈watca tʉn-uvajugum mit impʉctsougáj tu'c sueldu oyway.”

⁸Icutsu'ij, ayé uvajuc ijayc inajau tu'c jayau encarga̱ticway: “Ya̱s̈cʉs̈ ayé mozojat mit tso̱jcʉ́s̈a isueldujat. Primeru intso̱jcʉs̈áj ayé tʉgʉygaway últimu, mit cʉs̈wa'n intso̱jcʉs̈áj ayé jeme cojyʉ'jcaway.”

⁹Mit imíngaj ayé mozojat jeme tʉgʉygaway yos̈ni'c a las cinco de la tarde, cada jayau ipʉctso̱u nu'tsic diez pesu.

¹⁰Mit imíngaj ayé jeme cojyʉ'jcaway, je'jat inʉmgapayta ni'c ipʉctsougáj más. Po cada jayau ipʉctsougau ni-as̈amu diez pesu.

¹¹Mit iguipʉctsóugaj ayé sueldu, niqueja̱tcʉjʉu mit ijaycat.

¹²Inʉmgajau: “Ayʉ̱́j jeme tʉgʉygaway últimu, yos̈watcau tu'c horajyu, mit ni-as̈amu is̈tso̱jcʉs̈, mit ʉjtsat tʉyos̈watcau mʉgʉc s̈ʉujugum najs̈ʉjw.”

¹³Mit je' ipo'n tu'c ayé jayajwat: “Amigu, tʉgawajtap nejʉmay mal. Nawatcau tu'c acuerdu pa tʉtso'cwa'n diez pesu s̈ʉjw.

¹⁴Pʉc is̈toca̱tpay mit nʉs̈. Ʉ̱ tʉnwamp tʉs̈tso'cwa'n ni-as̈amu ayé jeme coyway últimu.

¹⁵¿Is̈jawi ca-oy tʉs̈watwa'n lo que tʉnwampay mit tʉntumi̱n? o ¿Is̈jawi in-ampʉgáj inmupro̱wije̱way ni'c tʉnwajtap oy?”

¹⁶Mit cʉs̈ Jesús inʉm: —Jeme tʉgʉygámpay últimu, tangáj primeru. Mit ayé jeme ipensa̱to'jcapay itangawa'n primeru, tangáj últimu. Ni'c mayo'c Dios iguiya's̈ jayajwat, po icupiugʉs̈áj jeme jayaumaygapay.

¹⁷Inʉjcs̈ Jesús to̱uni'c pa Jerusalén, imunʉs̈cʉs̈ aparte ayé doce ipʉctampajyat, mit inʉmgʉs̈au:

¹⁸—Injawigap ni'c nanʉs̈cap pa Jerusalén, mit ʉ̱ jeme tʉjatway jayau tʉs̈yajcáj icʉ'jugujmat judíujat imʉjpa̱nijat mit jeme i-ajque's̈capay ley, mit tʉs̈ac-ago'jcʉjʉ̱́j.

¹⁹Mit je'jat tʉs̈yajcáj icʉ'jugujmat pe'ta̱majyat pa tʉs̈burla̱tcáj, tʉs̈raunipʉ'ngáj mit tʉs̈yajcáj cunu̱s̈ni'c, po imutu̱gupay s̈ʉjw tʉjutucta'gájatu.

²⁰Mit cʉs̈ coy ima̱jmat Jacobo mit Juan, ayé Zebedeo iwajyat. Je' coy mit iwajyat mam itsʉ̱na Jesús, mit nicos̈atenda̱jcʉu ita'ná̱m pa iguiyo'jtawa'n tu'c favor.

²¹Mit Jesús i-ucyo't: —¿Ti inwamp? Je' iguipo'n: —Manda̱t pa tʉnwajyat ma tsʉ̱nga tu'c in-oyimaycʉ'ni'c mit jatu'c in-anajyimaycʉ'ni'c cuandu inmanda̱twa'n.

²²Cʉs̈ Jesús ipo'ngʉs̈: —Ingajawigap ti inyo'tcapay. ¿Oyáj is̈tu-u̱jca ayé vasu tʉntu-u'gámpay? Ayé inʉmo'jcʉp ni'c tʉ-o'gáj. ¿Oyáj intsʉ̱nga nʉ'gutemic as̈am ʉ̱ tʉtsʉ̱́na nʉ'gutemic? Ayé inʉmo'jcʉp ni'c tʉntunas̈áj. Mit je'jat iguinʉmgajau: —Jo̱, oyap.

²³Jesús inʉmgʉs̈au: —Iyacs̈ta'cway oyáj is̈tu-u̱jca ayé vasu tʉntu-u'gámpay ni'c mi-o'jcáj, mit oyáj intsʉ̱nga nʉ'gutemic as̈am ʉ̱ tʉtsʉ̱nawa'n nʉ'gutemic ni'c intunas̈cáj. Po ca-oyáj tʉmoygʉs̈ laj pa intsʉ̱ngawa'n tʉn-oyimaycʉ'ni'c ne tʉn-anajyimaycʉ'ni'c. Ni'c ayé lugar tʉnte̱t Dios i-aguep oyaguic pa jeme icupiugʉs̈way.

²⁴Iguimáraugaj we'n ayé diez pʉctampajyat, imu-awa'nigau Jacobo mit Juan.

²⁵Cʉs̈ Jesús iya̱s̈cʉs̈ ayé pʉctampajyat, mit inʉmgʉs̈au: —Injawigap ni'c jeme manda̱tcapay en tu'c na̱s̈ manda̱tcap mʉgʉc, mit mʉjayajwat manda̱tcapey mʉgʉc.

²⁶Po cajatáj we'n mit mijchat, ni'c pʉn iwampay ijatwa'n mʉj mam intsʉ̱nga, ayé jayau itp ti iguiservia̱jtawa'n japu̱jtat.

²⁷Mit pʉn iwampay itsʉ̱nawa'n primeru mam intsʉ̱nga, je' tanáj as̈am tu'c mozo pa is̈servia̱tcajáj.

²⁸Mit we'ney ʉ̱ jeme tʉjatway jayau tʉgaminu pa jayajwat tʉs̈servia̱tcajáj. Ʉ̱ tʉmín pa tʉs̈servia̱tcʉs̈awa'n jayajwat, mit pa tʉs̈yacwa'n tʉmvida pa tʉs̈tso̱jcʉs̈awa'n nu'pʉjʉn jayajwat ima̱jlat jeme tʉs̈cupʉjcámpay.

²⁹Mit inás̈caj nʉ'jcopac Jericó, tu'c jayaujuc inatspoguigau Jesús.

³⁰Mit mechc winchat tsʉ̱ngau to̱u-auni'c, mit iguimáraugaj ni'c nas̈p Jesús, ya̱s̈cau, inʉmgau: —¡Señor, mipichin David ifamiliani'c pa is̈salva̱tcáj, ayo̱wis̈cac!

³¹Po ayé jayaujuc iche'jcau ayé winchat pa ma tis̈to'pca, po je'jat ya̱s̈cau más, inʉmgau: —¡Señor, mi̱ David ifamiliani'cway, ayo̱wis̈cac!

³²Mit cʉs̈ Jesús tentan mit iya̱s̈cʉs̈, inʉmgʉs̈au: —¿Ti inwangap tʉwatcʉs̈awa'n?

³³Iguinʉmgajau: —Señor, tʉnwangap tʉ-e'pta̱jcawa'n.

³⁴Cʉs̈ Jesús i-ayo̱wis̈cʉs̈, mit itsʉjcʉs̈au iwijnat, mit e'pta̱jcau jaran, mit je'jat iguinatspoguigau.