Read Sayula Popoluca San Mateo 21 Bible Online

San Mateo 21 - Sayula Popoluca bible

San Mateo 21

¹Mit cuandu icóygaj tom Jerusalén, nas̈ʉ'jcau nʉ'jcopac Betfagé mam i-it ayé copac los Olivos. Cʉs̈ Jesús i-ajyu't mechc ipʉctampajyat,

²inʉmgʉs̈au: —Nʉ́s̈ca en ayé nʉ'jcopac yajyʉ'nway laj mit impa̱tcáj jaran tu'c burra cujupiyic, mit tsʉ̱náj mit je' tu'c burruwáy. Quéjca mit mumingajac.

³Mit te tambʉn is̈nʉmgajap tanti, inyʉmgajáj ni'c el Señor inesita̱tp ayé aníma̱jtat, po i-acpitucnú̱jatu jaranu.

⁴Jat we'n pa ma cumplia̱t lo que ija'yway ayé profeta, inʉm:

⁵Nʉmgʉ́s̈a Judeajatway: “E'pca, coyp inrejyat mam intsʉ̱nga, mit je' humilde, mit coyp burruyucuinm, mit ayé burru imuyo'yp ima̱m.”

⁶Ayé pʉctampajyat oygau mit iwatcau as̈am iguinʉmgajau Jesús.

⁷Mit imumingau ayé burra mit ayé burruwáy, mit iyajcajau ijamujcat, mit Jesús nitsʉ̱nda̱jcʉu burruyucuinm.

⁸Mit it mayo'c jayajwat, mit itsapcau ijamujcat to̱uni'c, mit japu̱jtat ipus̈cau cuy-awecwájat mit is̈ics̈cawey to̱uni'c.

⁹Mit ayé jayajwat jeme nʉs̈capay jʉpm mit mingapay mugus̈á̱m ya̱s̈cau mʉgʉc, inʉmgau: —¡Na-oyninʉ́mga jeme pichinway rey David ifamiliani'c pa nas̈salva̱tcáj! ¡Na-oyninʉ́mga ayé jeme igui-ajyu'tway el Señor Dios! ¡Na-oyninʉ́mga Dios!

¹⁰Mit icojy Jesús Jerusalén, nu'pʉjʉn jeme tsʉ̱ngaway en ayé nʉ'jcopac cotscada̱jcau, mit ni-ucyo'tcʉjʉu: —¿Pʉn ayʉ̱́j jeme mimpay?

¹¹Mit ayé jayaujuc inʉmgau: —Ayʉ̱́j ayé Jesús, ayé profeta jeme tsʉ̱napay Nazaret Galileajway na̱s̈.

¹²Mit cʉs̈ Jesús tʉgʉy Dios itempluni'c mit i-acpichingʉs̈ nu'pʉjʉn jeme to'jcapay mit jeme juygapay templuni'c, mit i-acchi'tpitujcʉs̈au ime̱s̈ajat ayé tumi̱ntigatspayna'jat mit we'ney ipa̱ngujat ayé jeme ito'jcapay palomajat.

¹³Jesús inʉmgʉs̈au: —Ja'yic itsʉ̱na Dios ilibruni'c: “Tʉntʉjc nʉmic pa tu'c lugar mam na-ora̱tcawa'n”, po mijchat impʉjcap as̈am nu'mpajyat itʉjcat.

¹⁴Mit cʉs̈ winchat mit cu̱s̈ujat mingau mam Jesús itsʉ̱na templuni'c, mit i-ac-oytangʉs̈.

¹⁵Po judíujat imʉjpa̱nijat mit i-ajque's̈capay ley i-is̈cau ayé milagrujat iwatpay, mit imaraugawey nat iya̱s̈ca ya̱wájat templuni'c, inʉmgap: “Na-oyninʉ́mga ayé jeme pichinway rey David ifamiliani'c.” Mit cʉs̈ ayé jayajwat awa'nigau ni'c we'n iguimáraugaj.

¹⁶Mit i-ucyo'tcau Jesús: —¿Ingamarap lo que inʉmgapay ayʉ̱́j ya̱wájat? Mit Jesús ipo'ngʉs̈: —Tʉnmarap, mit mijchat ingani-entendia̱tcap jeme tsʉ̱napay ja'yic Dios ilibruni'c mam iguinʉm: Ya̱wájat mit jeme tsu'tscapnajway, Dios imoygʉs̈p ma igui-oyninʉmgac.

¹⁷Mit iyajcʉs̈ jem, Jesús pichin en ayé nʉ'jcopac mit nʉcs̈ pa nʉ'jcopac Betania, mit jem itajn tu'c tsu'.

¹⁸Icus̈ʉwij jatu'c s̈ʉjw, Jesús pituc pa ayé mʉjway nʉ'jcopac Jerusalén, mit cayo'jcʉu.

¹⁹Mit igui-is̈ tu'c higueracujy jeme tsʉ̱naway to̱u-auni'c, je' icutomiu ayé cujy, po cʉs̈ igapa̱jtawu itʉjm, ijtʉu puru i-ajy. Mit imaldiciona̱t ayé higueracujy pa magajawat nunca itʉjm. Mit cʉs̈ tʉ̱ts jaran ayé higueracujy.

²⁰Igui-ís̈caj we'n ipʉctampajyat, nigu-épigʉjʉu, mit inʉmgau: —¿Tini'c itʉ̱jts jaran ayé higueracujy?

²¹Mit Jesús ipo'ngʉs̈: Iyacs̈ta'cway tʉnʉmgʉs̈ap: —Te micupʉjcap mʉgʉc mit te migaduda̱tcap, inwatcáj tu'c milagru as̈am tʉs̈wajt mit ayé higueracujy. Mit caje' aye'yu inwatcáj, po te inmucotscap tu'c copac ma niju'jpʉ mit ma nica'tstʉgʉjyʉ lama̱tjugum, wename ijatwa'n.

²²Mit te micupʉjcap mʉgʉc, impʉctsougáj nu'pʉjʉn inyo'tcajámpay Dios.

²³Mit itʉgʉjy Jesús templuni'c, judíujat imʉjpa̱nijat mit na'waywájat nʉ'jcopacni'jcatway nigutomigʉjʉu mam je' i-ajque's̈, mit iguinʉmgajau: —¿Pʉn is̈manda̱t pa is̈ajque's̈wa'n we'n? mit ¿pʉn is̈moyp laj is̈watwa'n ayʉ̱́j cosajat?

²⁴Mit Jesús ipo'ngʉs̈: —Ʉ̱ tʉwatcʉs̈ámpey tu'c pregunta mit te is̈po'ngajap, ʉ̱ tʉnʉmgʉs̈ámpey pʉn tʉs̈manda̱t pa tʉs̈watwa'n ayʉ̱́j cosajat.

²⁵¿Pʉn iguimanda̱t Juan pa inʉ'gutemwa'n? ¿Dios tsajpni'cway o jayajwat? Cʉs̈ je'jat ni-ucyo'tcʉjʉu, mit inʉmgau: —Te nanʉmgap ni'c iguimanda̱t Dios tsajpni'cway, nas̈nʉmgajáj, ¿Tini'cpaj is̈cacupʉ́jca?

²⁶Mit te nanʉmgap ni'c iguimanda̱tcau jayajwat, napʉ̱tcap nʉ'jcopac jayajwat ni'c je'jat icupʉjcap ni'c Juan tu'c profeta i-ajyu'tway Dios.

²⁷Mit inʉmgajau Jesús: —Tʉngajawigap. Mit Jesús inʉmgʉs̈awey: —Ʉ̱ tʉganʉmgʉs̈ámpey pʉn tʉs̈manda̱t pa tʉs̈watwa'n ayʉ̱́j cosajat.

²⁸Oy pi pensa̱tca ayʉ̱́j cuentu tʉntumuquips̈ámpay. Tu'c jayau ijtʉu mechc iwayna'jat, mit inʉjmau primeruway: —Tʉnwáy, nʉs̈ yos̈wat jinap tʉn-uvajugum.

²⁹Mit je' iguipo'n: “Nes̈ʉ̱n tʉganʉs̈o'jcʉp.” Mit cʉs̈ pensa̱t oy, mit nʉcs̈.

³⁰Mit cʉs̈ inʉjmau jatu'cway iway ni-as̈amu. Mit ipo'n ite̱t ni'c nʉs̈áj, mit ca-oyu.

³¹¿Jʉmay ayé mechcway iwayna'jat ijayaumay ite̱t lo que iguinʉjmaway? Mit je'jat iguipo'ngau: Jayaumay primeruway. Mit Jesús inʉmgʉs̈au: —Iyacs̈ta'cway tʉnʉmgʉs̈ap ni'c tʉgʉjyʉ'jcáj mam imanda̱t Dios ayé maljayajwat jeme ique'chumgapay demás impuestujat, mit we'ney malto's̈ajyat.

³²Ni'c Juan min iguiyac tu'c to̱u yacs̈icway po mijchat ingacupʉjcawu. Po jeme ique'chumgapay impuestujat mit malto's̈ajyat iguicupʉjcau. Po mijchat in-is̈cau je' mit ingacuyaguigawu inma̱lway to̱jwat pa is̈cupʉjcawa'n je'.

³³’Márauga jatu'c cuentu. It tu'c jayau jeme ijtʉway tu'c na̱s̈, mit jem iguini̱jp tu'c uvajuc. Mit i-acerca̱t mit cujy, mit itáj tu'c cʉt pa uvacoman, mit iwat tu'c cuyche's̈ yucmay mam iguicuida̱tcawa'n. Mit ayé uvajuc itumuyajcʉs̈ una̱c yos̈watpajyat, mit je' nʉcs̈ yagats.

³⁴Mit icojy itiempu pa iguicosecha̱tcawa'n uva, i-ajyu't imozojat mam itsʉ̱nga ayé yos̈watpajyat pa iguimunʉs̈cajawa'n je' iparte.

³⁵Po ayé yos̈watpajyat i-actangajau imozojat, tu'c imoyta̱jcau mit jatu'c i-ago'jcau, mit jatu'c ipojcajau mit tsa'.

³⁶Mit cʉs̈ i-ajyu't japu̱t mozojat, más may que primeruway, mit ni-as̈amu iguiwatcajau.

³⁷’Mit últimu i-ajyu'tcʉs̈au iway, inʉmpayta ni'c irespeta̱tcáj.

³⁸Po ayé yos̈watpajyat igui-ís̈caj ni'c mimp iway, inʉmgau je'jatu: “Ayʉ̱́j ayé imutanámpay nu'pʉjʉn. Jaga na-ago'jca mit ʉjtsat napʉjcajáj lo que imutanámpay.”

³⁹Mit igui-actángaj, i-acpichingau uvajugum, mit i-ago'jcau.

⁴⁰Mit Jesús i-ucyo'tcʉs̈: —Imi'nwa'n uvajuc ijayc, ¿ti iwatcʉs̈áj ayé yos̈watpajyat?

⁴¹Iguipo'ngau: —I-ago'jcʉs̈áj ayé maljayajwat mit iga-ayo̱wis̈cʉs̈áj, mit i-uvajuc itumuyajcʉs̈áj jatu'c yos̈watpajyat jeme iguimoygámpay i-uva itiempuni'c.

⁴²Jesús inʉmgʉs̈au: —¿Inganicotscap nunca Dios ilibruni'c? Inʉmp yename: Ayé tsa' igawangaway tʉcwatpayna'jat, ayʉ̱́j ayé iyajcámpay esquinani'c pa itsʉmwa'n más. Ni'c el Señor iwat ayé, mit ayé nas̈acnigu-épigʉjʉp.

⁴³Jemni'c tʉnʉmgʉ́s̈a ni'c is̈chi'tcajáj inlugajrat mam imanda̱t Dios mit imoygáj jatu'c jayajwat jeme iwatcámpay más oy.

⁴⁴Mit jeme ca'wámpay tsa' iyucuinm, totscada'gáj, mit jeme iguituca'wámpay ayé tsa', iguipichcada'gáj. Wename-ey iguijatcáj jeme tʉs̈cacupʉjcapay. Dios ijuzga̱tcʉs̈áj mʉgʉc.

⁴⁵Mit judíujat imʉjpa̱nijat mit fariseujat iguimáraugaj ayé cuentujat itumuquips̈way Jesús, ijawigau ni'c cots de je'jat.

⁴⁶Mit ja-iche'ngajau ilaj pa igui-actangawa'n, po ipʉ̱tcau nʉ'jcopac jayajwat ni'c je'jat icupʉjcau ni'c Jesús tu'c profeta i-ajyu'tway Dios.