Read Sayula Popoluca San Mateo 23 Bible Online

San Mateo 23 - Sayula Popoluca bible

San Mateo 23

¹Mit cʉs̈ Jesús inʉmgʉs̈au ayé jayajwat mit ipʉctampajyat, inʉm:

²—Jeme i-ajque's̈capay ley mit fariseujat i-ajque's̈cap lo que inʉmway Moisés.

³Jemni'c guardá̱tca mit watca nu'pʉjʉn is̈nʉmgajapay, po camwatca as̈am je'jat iguiwatca, ni'c je'jat inʉmgap tu'c cosa po igacumplia̱tcap lo que inʉmgapay.

⁴Je'jat i-acyagachigap ayé ley hasta itanwa'n as̈am tu'c tsʉm u'tspay ni'c majo'c pa iguicumplia̱tcawa'n, mit ayé tsʉm i-ajcu'tcap jayajwat iquejcopacni'jcat, po je'jat igatsʉmajyigap ne mit icʉ'jʉjpat.

⁵Po iwatcap nu'pʉjʉn pa jayajwat ma igui-e'pcac. Mit i-acmʉjigap ayé noc imuyo'ygapay ja'yic iwimpacni'jcat, mit i-acyagachigap ijamuc-ájwat.

⁶Mit iwangap lugajrat más ojyatway mam iguiwatca cayna̱s̈, mit iwangap pa̱ngujat más ojyatway mam i-adora̱tca judíujat.

⁷Mit iwangap jayajwat ma iguisaluda̱tcac plazani'c mit respetu, mit iwangap jayajwat ma nʉmga ni'c je'jat mʉjway ajque's̈pajyat.

⁸’Po mijchat camwanga is̈nʉmgajáj ni'c mi-ajque's̈pajyat ni'c inaguepcap tu'c inajque's̈pajyat mit ayé Cristu, mit mijchat minu'pʉjʉjnat mihermanujat.

⁹Mit camte̱tjátca nepʉn en ayʉ̱́j mundu, ni'c inaguepcap tu'c inte̱jtat jeme tsʉ̱napay tsajpni'c, mit ayé Dios.

¹⁰Ne pi is̈canʉmgajac nepʉn ni'c mimanda̱tpajyat ni'c inaguepcap tu'c inmanda̱tpajyat, mit ayé Cristu.

¹¹Jeme más mʉjninʉmicway mam intsʉ̱nga, ma is̈servia̱tcajac as̈am tu'c mozo.

¹²Mit pʉmba'tu jeme nimʉjninʉjmʉpay, Dios iguimalninʉmáj. Mit pʉmba'tu canimʉjninʉjmʉpay, Dios iguimʉjninʉmáj.

¹³’Po ¡pro̱wij de mijchat inajque's̈capay ley mit fariseujat! ¡Mijchatu miniwe̱tcʉjʉp! Ni'c inatujcap jayajwat magatʉgʉyga mam imanda̱t Dios. Ni'c ne mijchat migatʉgʉygap ne ingamoygap laj ma tʉgʉyga jeme tʉgʉyo'jcʉjʉpay.

¹⁴’¡Pro̱wij de mijchat inajque's̈capay ley mit fariseujat! ¡Mijchatu miniwe̱tcʉjʉp! Ni'c inchi'tcajap cu-o'cwájat itʉjcat mit cʉs̈ jego'cp in-orátca magajawi nepʉn ni'c miwe̱tpajyat. Jemni'c Dios is̈actutso̱jcáj más.

¹⁵’¡Pro̱wij de mijchat inajque's̈capay ley mit fariseujat! ¡Mijchatu miniwe̱tcʉjʉp! Ni'c as̈am inyas̈capay lama̱t mit na̱s̈ pa is̈pa̱tcawa'n tu'c jayau jeme is̈mutʉgʉygámpay mijchat. Mit ijatwa'n as̈am mijchat, inactuwatcáj más mal que mijchat.

¹⁶’¡Pro̱wij de mijchat! Miwejnu'pcap mit miga-e'pcap. Inyʉmgap ni'c te tu'c jayau jura̱tp por ayé templu, ayé caje' neti. Po te ayé jayau jura̱tp por ayé oro templuni'cway, je' itp ti iguicumplia̱twa'n lo que ijura̱tway.

¹⁷¡Mitontojat ni'c inga-entendia̱tcap neti! ¿Jʉmay más oy, ayé oro, o ayé templu? Ayé templu más valia̱tp que oro ni'c Dios i-oyninʉm ayé templu, mit oro solo valia̱tp ni'c tsʉ̱nap templuni'c.

¹⁸Mit inyʉmgapey: “Te tu'c jayau jura̱tp por ayé laj mam nas̈yac ofrenda pa Dios, ayé caje' neti. Po te ayé jayau jura̱tp por ayé ofrenda jeme tsʉ̱napay en ayé laj, je' itp ti iguicumplia̱twa'n lo que ijura̱tway.”

¹⁹¡Mitontojat ni'c inga-entendia̱tcap neti! Más valia̱tp ayé laj mam nas̈yac ofrenda, mit ayé ofrenda solo valia̱tp ni'c tsʉ̱nap en ayé laj mam nas̈yac ofrenda pa Dios.

²⁰Jemni'c jeme jura̱tpay por ayé laj mam nas̈yac ofrenda pa Dios, je' jura̱tp por ayé laj mit we'ney por nu'pʉjʉn jeme tsʉ̱napay en ayé laj.

²¹Mit jeme jura̱tpay por ayé templu, je' jura̱tp por ayé templu mit we'ney por Dios jeme tsʉ̱́napay templuni'c.

²²Mit jeme jura̱tpay por tsajp, je' jura̱tp por Dios itrono mit we'ney por Dios jeme tsʉ̱napay itrononi'c.

²³’¡Pro̱wij de mijchat inajque's̈capay ley mit fariseujat! ¡Mijchatu miniwe̱tcʉjʉp! Ni'c inyajcap ofrenda ayé ma'tswájat jeme pa'cs̈u'jcapay mit ingawatcap cuenta asuntujat más mʉjway itpay leyni'c. Más oy nas̈watwa'n iyacs̈ta'cway, na-ayo̱wis̈wa'n, mit nas̈cupʉcwa'n Dios. Pi watca ayʉ̱́j as̈am is̈watca cuenta japu̱t cosajat.

²⁴¡Miwejnu'pcap mit miga-e'pcap! Incuji'cs̈igap tu'c titic yos̈wáy po ingawatcap cuenta tu'c yos̈ mʉjway.

²⁵’¡Pro̱wij de mijchat inajque's̈capay ley mit fariseujat! ¡Mijchatu miniwe̱tcʉjʉp! Ni'c incupo'tcap tu'c vasu mit tu'c puna̱tu iyucuinm. We'ney mijchat mi-oyque's̈cap inyucuinmat po injo̱jtugujmat ma̱lo'c itsʉ̱na ni'c minu'mgap mit ingawatcap iyacs̈ta'cway.

²⁶¡Fariseujat, inga-entendia̱tcap neti! Cupo'jtʉ'c ijo̱jtugum tu'c vasu mit we'ney tu'c puna̱tu, mit we'n tanámpey iyucuinm cupo'tic.

²⁷’¡Pro̱wij de mijchat inajque's̈capay ley mit fariseujat! ¡Mijchatu miniwe̱tcʉjʉp! Ni'c mijchat inmu-e'pcap as̈am tu'c bóbida pinta̱ticway po'p, ni'c iyacs̈ta'cway iyucuinm que's̈p oymanac po ijo̱jtugum ijtʉp puru á̱nimapajc mit feojo'c itsʉ̱na.

²⁸We'ney mijchat inque's̈ca inyucuinmat, ni'c jayajwat is̈-e'pcap as̈am inwatcapay oy, po injo̱jtugujmat itp puru we̱t mit mima̱lo'jcat.

²⁹’¡Pro̱wij de mijchat inajque's̈capay ley mit fariseujat! ¡Mijchatu miniwe̱tcʉjʉp! Ni'c inwatcajap profetajat ibóbidajat, mit inadorna̱tcajapey ibóbidajat ayé jayajwat yacs̈ijcatway.

³⁰Mit inyʉmgap: “Tʉgatsʉ̱́ngaj itiempuni'c tʉnte̱jtat, ámbanuway, tʉngamutʉgʉygapate ayé i-ago'jcaway profetajat.”

³¹Jemni'c mijchatu mini-acniguque's̈cʉjʉp, ni'c mijchat mipichingau nije'yu familiajat jeme i-ago'jcaway ámbanu ayé profetajat.

³²Mit jinap inwatcáj as̈am inte̱jtat iguiwátcaj ámbanu.

³³’¡Mijchat mima̱lo'jcat as̈am tsanajyat! ¿Nat impo'jcawa'n pi is̈cacondena̱tcac Dios jʉngʉtʉm?

³⁴Jemni'c tʉ-ajyu'tcʉs̈awa'n profetajat mit jeme i-is̈capcapay may mit ajque's̈pajyat. Mit una̱c inago'jcáj mit inyajcáj cunu̱s̈ni'c. Mit una̱c inraunipʉ'ngáj mam inadora̱tca, mit inacpo'ctacyo'ygáj en cada nʉ'jcopac.

³⁵Ni'c we'n impo'ngajáj ivida nu'pʉjʉn jayau yacs̈icway jeme i-ago'jcaway en ayʉ̱́j mundu desde i-o'jc Abel ayé jayau yacs̈icway hasta i-o'jc Zacarías Berequías iway. Mit mijchat infamiliajat i-ago'jcau ámbanu ayé jayau templuni'c mam nas̈yac ofrenda pa Dios.

³⁶Iyacs̈ta'cway tʉnʉmgʉs̈ap ni'c ayʉ̱́j jinapay jayajwat ipo'ngajáj ividajat ayé jayajwat.

³⁷’Mijchat mitsʉ̱ngapay nʉ'jcopac Jerusalén inago'jcau profetajat mit impojcajau mit tsa' jeme is̈ajyu'tcajaway Dios. May veces jatʉnwan tʉs̈cuida̱tcʉs̈wa'n injayajwat as̈am tu'c piyu iguicuida̱tcʉs̈ iwaywájat ique̱gampa'tcʉm, po mijchat ingawangawu.

³⁸Jawiga ni'c inyʉ'jcopajcat tanáj cuyaguiyic.

³⁹Tʉnʉmgʉs̈ap ni'c jinap pa jʉpm ʉ̱ is̈caja-e'pcáj hasta tʉmi'nwa'natu, mit wejpu'n inyʉmgáj: “Oyninʉmic ayé jeme mimpay, ni'c el Señor igui-ajyu't.”