Read Sayula Popoluca San Mateo 24 Bible Online

San Mateo 24 - Sayula Popoluca bible

San Mateo 24

¹Ipichijn Jesús templuni'c mit inʉjcs̈, iguicutomigau ipʉctampajyat pa igui-actu-e'pcáj ayé templu mit tʉjcat itpay jem.

²Po Jesús inʉmgʉs̈au: ¿Inyijatcap nu'pʉjʉn ayé? Iyacs̈ta'cway tʉnʉmgʉs̈ap ni'c yʉnʉnmanajcáj ayé tʉjcat, mit catanáj netu'c tsa' ʉ'picway.

³Nitsʉ̱nda̱jcʉu Jesús en ayé copac los Olivos, mit iguicutomigau ipʉctampajyat anu'mu, mit iguinʉmgajau: Nʉmgajac ¿jutim ijatwa'n ayʉ̱́j cosajat, mit ti tʉn-e'pcáj pa tʉs̈jawigawa'n ni'c mimimp, mit jutim icʉs̈wa'nnu'pʉjʉn?

⁴Jesús ipo'ngʉs̈: Nicuidá̱tcʉjʉ pi is̈cawe̱jta̱jcac nepʉn.

⁵Ni'c mingáj mayo'c we̱tpajyat, mit i-ataynʉmgáj ni'c je'jat Cristu, mit iwe̱jta̱jcáj mayo'c.

⁶Mit inmaraugáj ni'c itp tsuguin mit is̈nʉmgajáj ni'c itámnaj más tsuguin, po campʉ̱tcawit ni'c itp ti ijatwa'n wenamé, po canije' tiempu pa icʉs̈pʉ'nwa'n nu'pʉjʉn.

⁷Ni'c jayajwat en tu'c na̱s̈ imutsuguinwatcáj jayajwat jatu'c na̱s̈atway, mit tsuguinwatcáj rejyat, mit mayo'c jayajwat tu'ngʉjʉ̱́j, itáj yu', mit nas̈áj us̈ jʉmgapa'tu.

⁸Mit ijatwa'n wename, ayé ni'c chu̱chipnaj iguitunas̈ca jayajwat.

⁹’Wejpu'n is̈actunas̈cáj, is̈ago'jcáj mit is̈-angáj nu'pʉjʉn jayajwat ni'c ʉ̱ is̈wangap.

¹⁰Mit jayajwat icuyaguigáj lo que icupʉjcaway, nitraiciona̱tcʉjʉ̱́j mit ni-angʉjʉ̱́j.

¹¹Mit mingáj mayo'c we̱tpajyat, inʉmgáj ni'c Dios igui-ajyu'tcau, mit iwe̱jta̱jcáj may jayajwat.

¹²Mit may jayajwat caniwangʉjʉ̱́j ni'c mayo'c mal i-itwa'n.

¹³Po jeme imajmo'ámpay hasta icʉs̈pʉ'nwa'n nu'pʉjʉn jeme jatámpay, ayé nisalva̱jtʉ̱́j.

¹⁴Mit inʉmdacyo'ygáj jʉmgapa'tu ayʉ̱́j oyway noticia ni'c Dios manda̱táj, pa we'n ijawigáj nu'pʉjʉn jayajwat en ayʉ̱́j mundu mit wejpu'n cʉs̈pʉ'náj nu'pʉjʉn.

¹⁵’Mit in-e'pcáj ayé jeme i-actogoyda̱jcapay sin winchu̱jc cosa oyway, mit ayé tsʉ̱náj en ayé templu i-oyninʉmway Dios. We'n iguinʉjm ayé profeta Daniel. Jeme icotspay ayʉ̱́j noc ma entendia̱t.

¹⁶Wejpu'n jeme tsʉ̱ngapay Judeajway na̱s̈ ma po'jca pa copac-awa'tsam.

¹⁷Jeme tsʉ̱napay tʉcyucuinm ma po'c jaran, magatʉgʉywit itujugum pa igui-acpichinwa'n tanti.

¹⁸Mit jeme tsʉ̱napay camni'c magapitucwit pa iguipʉcwa'n ijamuc.

¹⁹¡Pro̱wij de aye to's̈ajyat jeme wáyajatway mit jeme way-acye'jcapay en ayé s̈ʉjwat!

²⁰Orá̱tcaja Dios maga-it payic cuandu impo'jcawa'n, ne magajat po'cs̈ans̈ʉuni'c.

²¹Ni'c wejpu'n itáj tu'c mʉjway pʉ̱tna̱s̈, ni'c cani-itp tu'c pʉ̱tna̱s̈ ni-as̈amu desde ichu̱chij ayʉ̱́j mundu hasta jinap, ne caja-itáj ni-as̈amu.

²²Mit majégate ayé s̈ʉjwat pa iguitunas̈cawa'n, nepʉnate ca-oyáj inisalva̱jtʉ, po ni'c Dios iwangʉs̈p jeme icupiugʉs̈way, iga-acjegáj ayé s̈ʉjwat.

²³’Wejpu'n te tambʉn is̈nʉmgajap: “¡E'pca, yam itsʉ̱na Cristu!” o “¡Jem itsʉ̱na!” camcupʉjca ayé.

²⁴Ni'c mingáj we̱tpajyat inʉmgámpay ni'c je'jat Cristu, mit mingáj we̱tpajyat, inʉmgáj ni'c Dios igui-ajyu'tcau, mit iwatcáj majatway milagrujat mit is̈acnigu-epigʉjʉ̱́j. Mit te oyap, iwe̱jta̱jcájate hasta jeme Dios icupiugʉs̈way.

²⁵Jinap que tʉnʉmgʉs̈away nu'pʉjʉn antes ijatwa'n.

²⁶Jemni'c te is̈nʉmgajap: “¡Nʉs̈i e'pca! Cristu tsʉ̱nap mam iga-it tʉjcat.” Camnʉs̈cawit jem. Mit te inʉmgap: “¡E'pca! Yam itsʉ̱na cuyu'tsic Cristu.” Camcupʉjca jeme is̈nʉmgajapay we'n.

²⁷Ni'c as̈am ániway iquijan desde mam ipichin s̈ʉjw hasta mam itʉgʉynu, wename-ey ijatwa'n cuandu tʉmi'nwa'n ʉ̱ jeme tʉjatway jayau, ni'c nu'pʉjʉn jayajwat i-e'pcáj tʉmi'nwa'n.

²⁸Ni'c mam itsʉ̱nawa'n tu'c á̱nima, jeméy ica'ugawa'n nu'pna'jat. Mit we'ney mam itsʉ̱nga maljayajwat, jem ayé icastiga̱twa'n Dios.

²⁹’Icʉs̈wa'n ayé pʉ̱tna̱s̈ en ayé s̈ʉjwat, s̈ʉwáy cuchitimiyáj, mit po'wáy cajata'cs̈áj, mit ma̱tswájat ca'ugáj tsajpni'c, mit nu'pʉjʉn cosa ijtʉpay poder tsajpni'c s̈is̈cada'gáj.

³⁰Mit wejpu'n que's̈áj ayé milagru tsajpni'cway, mit ayé tʉnwatáj ʉ̱ jeme tʉjatway jayau, mit jʉygáj nu'pʉjʉn jayajwat na̱s̈ni'cway mit tʉs̈-e'pcáj ʉ̱ jeme tʉjatway jayau cuandu tʉmi'nwa'n tsajpni'c mit poder, mit oymanago'c tʉmi'nwa'n.

³¹Mit tʉnajyu'tcʉs̈áj tʉn-ángejlat mit ya's̈áj mʉgʉc tu'c trompeta mit je'jat i-apʉcmujcáj nu'pʉjʉn tʉncupiugʉs̈way jʉmgapa'tu mam itsʉ̱́nga en ayʉ̱j mundu.

³²’Tʉntumuquips̈áj tu'c higueracujy pa pi jáwiga. I-ayawiwa'n i-awec mit ipichinwa'n iyau-ajy, injawigap ni'c tominup s̈ʉutim.

³³Wename-ey cuandu is̈-e'pcawa'n ni'c jatnup lo que tʉnyʉmway, injawigáj ni'c tomo'ganu pa icʉs̈pʉ'nwa'n nu'pʉjʉn.

³⁴Iyacs̈ta'cway tʉnʉmgʉs̈ap ni'c cani-o'jcáj jinapay jayajwat hasta ijatwa'n nu'pʉjʉn lo que tʉnyʉmway.

³⁵Cʉs̈áj tsajp mit na̱s̈, po tanáj pa siempre lo que tʉnyʉmpay.

³⁶’Nepʉn igajawip ti s̈ʉjw ne ti hora icʉs̈pʉ'nwa'n nu'pʉjʉn, ne igajawigap ángejlat tsajpni'cway, solo tʉnte̱t Dios ijawip.

³⁷’Mit as̈am ayé tiempu itsʉ̱naj Noé, wename-ey ijatwa'n cuandu tʉmi'nwa'n ʉ̱ jeme tʉjatway jayau.

³⁸Ni'c as̈am ayé s̈ʉjwat antes ipatscunas̈ mundu mit nʉ', jayajwat caygau, u̱jcau, mit nicʉ'pa̱tcʉjʉu, mit i-acnicʉ'pa̱tcʉjʉu iquis̈ajyat hasta ayé s̈ʉjw itʉgʉjy Noé barcuni'c.

³⁹Mit igawatcawu cuenta hasta ipatscunas̈ mundu mit nʉ', mit ayé nʉ' imunʉs̈cʉs̈ nu'pʉjʉn jayajwat. Wename-ey ijatwa'n cuandu tʉmi'nwa'n ʉ̱ jeme tʉjatway jayau, ni'c tʉmi'náj de repente.

⁴⁰Wejpu'n mechc jayajwat tsʉ̱ngáj camni'c. Tu'c imunʉs̈cáj mit tu'c iyajcáj.

⁴¹Mechc to's̈ajyat jʉtscáj pa̱wani'c. Tu'c imunʉs̈cáj mit tu'c iyajcáj.

⁴²’Tsʉ̱́nga prepara̱tic ni'c ingajawigap ti hora imi'nwa'n el Señor.

⁴³Pi jawiga ayʉ̱́j. Ni'c tu'c jayau tʉ́jcajway ma jawiate ti hora imi'nwa'n nu'mpayna', je' cuida̱tájate mit igamo'ájate laj ma iguitʉctʉgʉyac.

⁴⁴Jemni'c mijchatey pi tsʉ̱nga prepara̱tic ni'c ʉ̱ jeme tʉjatway jayau tʉmi'náj cuandu is̈cajawigawa'n.

⁴⁵’Tʉ-actujawigʉs̈áj tu'c mozo cumplia̱tpay mit jeme i-is̈capay. Ijayc itumuyajcʉs̈ ifamiliajat ayé mozo, mit je' imoygʉs̈ icayan en ayé hora itucaygámpay.

⁴⁶Oyninʉmic ayé mozo te we'n iguiwat cuandu imi'nwa'n ijayc.

⁴⁷Iyacs̈ta'cway tʉnʉmgʉs̈ap ni'c ayé tʉ́jcajway itumuyagáj ayé mozo nu'pʉjʉn ijtʉpay.

⁴⁸Po te ayé mozo pichimp mal, inʉmáj ijo̱tni'c: Tʉnjayc jego'gámnaj pa imi'nwa'n.

⁴⁹Je' chu̱chip iguimoyta̱jcʉs̈ imumozoje̱wajyat, mit imucaygʉs̈p mit imu-u̱jcʉs̈p mu'gajayajwat.

⁵⁰Te iwatp wename ayé mozo, mi'náj ijayc en tu'c s̈ʉjw igatsʉ̱nawa'n prepara̱tic, mit en tu'c hora iguigajawiwa'n.

⁵¹Mit icastiga̱táj mʉgʉc, mit i-actutso'gáj ayé mozo as̈am tu'c we̱tpay, ni'c we̱tpajyat jʉygáj mit itunas̈cáj mʉgʉc.